भैरहवा- भारतमा अप्रत्यासित रुपमा कोरोना भाइरस फैलँदै गएपछि भारतमा रोजगारी गर्ने नेपाली धमाधम रुपमा नेपाल फर्किन थालेका छन्। भारत सरकारले भारतका विभिन्न स्थानमा जनता कर्फ्यु लगाएपनि सीमा नाका बेलहियालगायतका नाकाबाट नेपाल आउनेको भिड लागेको छ।
सुनौली नाका हुँदै दैनिक १६ देखि १८ हजारसम्म नेपाली नेपाल फर्किने गरेको जिल्ला प्रशासन कार्यालय रुपन्देहीले जनाएको छ। गत बर्ष यो समयमा दैनिक ४/५ हजारको तुलनामा नेपाल आउने गरेको तथ्याङक छ।
नेपालबाट भारत जाने नेपालीलाई भने निरुत्साहित गरिएको प्रमुख जिल्ला अधिकारी महादेव पन्थले जानकारी दिए। रोजगारी र अन्य काम विशेषले भारतमा गएका नेपालीहरु ठूलो संख्यामा अहिले स्वदेश फर्किरहेका हुन्।
रूपन्देहीस्थित बेलहिया-सुनौली नाकाबाट नेपाल प्रवेश गर्नेको संख्यामा झण्डै तेब्बरले वृद्धि भएको छ । नेपाल आउनेको संख्या अत्याधिक बढेपछि भीड तथा स्वास्थ्य जाँचको व्यवस्थापनका लागि तीनवटै सुरक्षा निकायलाई खटाइएको छ। नेपाली सेनासहितका सुरक्षाकर्मीले सीमा नाकामा निगरानी बढाएका छन्।
सीमा नाका बेलहियामा नेपाल प्रहरी, सशस्त्र प्रहरी तथा नेपाली सेना लगाएर भीड व्यवस्थापन गरिएको स्थानीय प्रशासनले जनाएको छ। स्वास्थ्य जाँचलाई पनि प्रभावकारी बनाइएको पन्थले जानकारी दिए। उनले नेपाल आउने नागरिकहरुलाई दुईवटा लाइनमा राखेर स्वाथ्य जाँच गराएरमात्र नेपाल भित्र्याइएको बताए। उनले भारतबाट आउने पर्यटक गाडीलाई रोकिने जनाए।
त्यसयता प्रदेश ५ का सानाठूला गरी १७ नाकामा सर्वसाधारणको आउजाउ ह्वात्तै बढेको छ। ती नाका बन्द गर्नुको साटो प्रशासनले हेल्थ डेस्क सञ्चालन गरेर सहजीकरण गर्दै आएको छ । धेरै आवागमन हुने नाकामा जम्मा दुई जना स्वास्थ्यकर्मी परिचालन गरिएको र उनीहरूसँग उपकरण नभएको आलोचना भएपछि स्थानीय प्रशासनले शनिबारबाट प्रदेश ५ का नाकामा नेपाल प्रहरी, सशस्त्र प्रहरी र नेपाली सेना परिचालन गरेको हो।
रूपन्देहीको बेलहिया नाकामा स्वास्थ्यकर्मी र स्वास्थ्य परीक्षणका लागि उपकरणको अभाव थियो। शनिबारबाट दसगजाबाटै स्वास्थ्य परीक्षण प्रभावकारी बनाइएको र आउनेलाई कडाइ गरिएको पन्थले बताए। ‘स्वास्थ्य परीक्षण व्यवस्थित बनाउन जनशक्ति उपलब्ध गराइएको छ,’ उनले भने, ‘मुख्यबाहेक अन्य नाकाबाट हुने आवागमनमा पनि कडाइ गरेका छौं।’
सशस्त्र प्रहरी बल रूपन्देहीका सशस्त्र प्रहरी उपरीक्षक तेजप्रसाद पोखरेलले मूल र स्वास्थ्य सहायता कक्ष सञ्चालन गरिएका सहायक नाकाबाट आवागमन भइरहेको बताए। तीबाहेक खुल्ला नाकाबाट आउजाउ नियन्त्रण गर्न सीमा क्षेत्रमा गाडीबाट मोबाइल गस्ती सुरु गरिएको उनले बताए।
‘जहाँ पायो त्यहीँबाट हुने आवातजावात रोक्छौं,’ उनले भने, ‘स्वास्थ्य सहायता कक्ष सञ्चालन गरिएका चार सहायक नाकामा पनि आवतजावतलाई निरुत्साहित बनाएर सकभर मूल नाकाबाटै आवतजावतका लागि स्थानीयलाई अनुरोध गरिनेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
