काठमाडौं- शिक्षा, विज्ञान तथा प्रविधिमन्त्री गिरिराजमणि पोखरेलले न्युक्लियरसम्बन्धी ऐन पास नहुँदा कोरोनाविरुद्धका कार्यक्रममा समस्या उत्पन्न हुने कुरा नबोलेको बताएका छन्। उनले राष्ट्रिय सभाको विधायन व्यवस्थापन समितिको बैठकमा यस्तो बोलेको बताइएको थियो। यसरी बोलेको बताइएपछि सामाजिक सञ्जालमा उनको आलोचना भइरहेको छ।
बुधबार यही समितिको बैठकमा बोल्दै उनले बुझाइमा फरक परेको हुन सक्ने बताए। त्यसबारे स्पष्ट पार्दै उनले भने, ‘प्रस्तुतिमा त्रुटि वा ग्रहणमा समस्या भए सच्याऊँ। मैले ऐनसँग जोडेर बोलेको होइन।’
अन्तर्राष्ट्रिय आणविक ऊर्जा एजेन्सी (आइएइए)का प्रतिनिधी कोरोनाको त्रासबीच पनि आएर सहयोग गर्न चाहेको उल्लेखमात्रै गरेको बताएका छन्। उनीहरुले आफूलाई कोरोनाको उपचार र सचेतनाका लागि जनशक्तिलाई तालिम दिन चाहेको कुरा आफूले बैठकमा राखेको बताए। उनले भने, ‘आइएइएका प्रतिनिधीहरु आउनुभएको थियो। कोरोना विपद्का बेला जनशक्ति तालिम दिन सहयोग गर्छाैं। संयोजन गरिदिनुहोस् भन्नुभएको थियो।’
कतिपय क्षेत्रमा क्षेत्रमा यसबाट सहयोग लिइरहेको भएपनि व्यवस्थित रुपमा लिन नसकिएको सन्दर्भमा आफूले यो कुरा जोडेको उनले बताए। व्यवस्थित रुपमा लिन ऐन नै जरुरी रहेको बुझाउन उक्त सहयोगको प्रसंगमात्रै उप्काएको तर कोरोनाको न्युक्लियरसम्बन्धी विधेयकसँग कुनै सम्बन्ध नरहेको प्रष्ट पारे। उनले भने, ‘यसलाई न्युक्लियर बिलसँग जोडेको होइन। स्वास्थ्य, कृषिलगायत प्राविधिक क्षेत्रमा सहयोग लिइरहेका छौं। जति लिन सक्नुपर्ने हो लिन सकेका छैनौं। व्यवस्थित ढंगले लिन सकेका छैनौं भन्नका लागि प्रसंग झिकेको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
