सुर्खेत– कर्णाली प्रदेश सरकारले प्रधानमन्त्री केपी शर्मा ओलीलाई आफ्नो प्रदेशका प्रमुख पर्यटकीयस्थल घुम्नका लागि निम्तो दिएको छ। प्रदेश सरकारका मुख्यमन्त्री महेन्द्रबहादुर शाहीले बिहीबार साँझ प्रधानमन्त्री निवास बालुवाटार पुगेर ओलीलाई औपचारिक निम्तो दिएका हुन्।
कर्णाली–रारा पर्यटन वर्ष २०७५ को उद्घाटनका साथै यहाँका प्रमुख पर्यटकीय स्थलहरुको अवलोकनका लागि मुख्यमन्त्री शाहीले प्रधानमन्त्री ओलीलाई आमन्त्रण गरेका हुन्। आउँदो वैशाख १ देखि मुगुको राराबाट कर्णाली–रारा पर्यटन वर्षको उद्घाटन हुँदैछ।
मुख्यमन्त्री शाहीका प्रेस सल्लाहकार ध्रुव बुढाथोकीका अनुसार पर्यटन वर्षको उद्घाटनसँगै कर्णाली प्रदेशमा हुने प्रधानमन्त्रीका अन्य कार्यक्रम पनि तय गरिएको छ। जसअन्तर्गत प्रधानमन्त्री ओलीले वैशाख १ मै राराबाट पर्यटन वर्षको उद्घाटन गर्ने, राष्ट्रका नाममा सम्बोधन गर्ने कार्यक्रम छ। त्यसैगरी, कर्णाली प्रदेशका प्रमुख पर्यटकीय क्षेत्रहरु रारा ताल, सेफोक्सुन्डो ताल, छायाँनाथ मन्दिर, हिल्सा नाका, पातालझरना लगायतको अवलोकन गर्ने कार्यक्रम बनाइएको बुढाथोकीले जानकारी दिए। कर्णाली स्वास्थ्य विज्ञान प्रतिष्ठानको बैठकको अध्यक्षता समेत प्रधानमन्त्रीले गर्ने कार्यक्रम तय भएको छ।
प्रदेश सरकारको निम्तोलाई प्रधानमन्त्री ओलीले स्वीकार गरेका छन्। निम्तोपत्र ग्रहण गरेपछि प्रधानमन्त्री केपी शर्मा ओलीले पर्यटन वर्षको उद्घाटनका लागि आफू रारामा आउने प्रतिबद्धता व्यक्त गरेका हुन्। उनले पर्यटन वर्ष मनाउने प्रदेश सरकारको निर्णय प्रशंसनीय भएको भन्दै केन्द्र सरकारले पनि सहयोग गर्ने बताए।
प्रचण्डले पनि पाए निम्तो
यसैगरी, पर्यटन वर्ष उद्घाटन कार्यक्रममा सरिक हुन मुख्यमन्त्री शाहीले पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल (प्रचण्ड) लाई पनि निम्तो दिएका छन्। मुख्यमन्त्री शाहीले शुक्रबार बिहान निजी निवास खुमलटार पुगेर प्रचण्डलाई निम्तोपत्र दिएका हुन्।
प्रदेश सरकारको आयोजनामा पर्यटन वर्ष मनाउन लागिएको हो। मन्त्रिपरिषद्को पहिलो वैठकले नै कर्णाली–रारा पर्यटन वर्ष २०७५ मनाउने निर्णय गरेको थियो। एक वर्षमा पाँच लाख पर्यटक कर्णालीमा भित्र्याउने लक्ष्यसहित पर्यटन वर्ष मनाउन लागिएको हो। कर्णालीमा पर्यटन प्रवद्र्धनका लागि यसले सघाउ पुग्ने विस्वास प्रदेश सरकारको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
