एजेन्सी- काेराेना भाइरसका कारण यात्रा प्रतिबन्ध लगाएकाे इटालीमा मृतकको सङ्ख्यामा वृद्धि भइरहेकाे छ। संक्रमणबाट एकैदिन थप १३३ जनाको मृत्यु भएपछि इटालीमा काेराेनाबाट ज्यान गुमाउने मानिसहरुको संख्या ३६६ पुगेको छ।
बीबीसीका अनुसार इटालीमा सङ्क्रमितहरूको सङ्ख्या २५ प्रतिशत बढेर ५८८३ बाट ७३७५ पुगेको छ। प्रकोप नियन्त्रणका लागि आइतबार दशौँ लाख मानिसहरूको निम्ति नयाँ प्रतिबन्धहरू लगाइएपछि पनि उक्त सङ्ख्या थपिएको हाे।
लोम्बर्डी र १४ वटा प्रान्तका एक करोड ६० लाख मानिसलाई नयाँ क्वारन्टीनअन्तर्गत यात्राको निम्ति विशेष अनुमति लिनुपर्ने व्यवस्था बनाइएको छ। प्रधानमन्त्री जुजेप्पे कोन्टेले देशभरिका विद्यालय, व्यायामशाला, सङ्ग्राहलय, रात्रि क्लब र अन्य स्थल बन्द गर्ने घोषणा पनि गरेका छन्। याे निर्णय अप्रिल ३ सम्म लागू हुनेछ।
चीनबाहिर सबैभन्दा धेरै सङ्क्रमित फेला परेको देश इटाली बनेको छ। इटालीमा पछिल्लो पटक सङ्क्रमण पुष्टि भएकाहरूमा सेना प्रमुख पनि छन्।
कोरोना भाइरस सङ्क्रमण फैलिने आशङ्कामा उत्तर कोरियामा केही हप्तादेखि क्वारन्टीनमा बस्न बाध्य पारिएका झन्डै ६० विदेशी नागरिकहरूले प्योङ्याङ छोडेका छन्। उनीहरूलाई लिएर एक महिनाभन्दा बढी समयपछि एउटा विमान रुस गएको एनके न्यूजले जनाएको छ।
उत्तर कोरियाको उक्त राष्ट्रिय ध्वजावाहक विमान सुदूरपूर्वी रुसको भ्लादिभोस्तोकमा सोमबार बिहान अवतरण गरिसकेको छ। उत्तर कोरिया छोड्नेमा विदेशी कूटनीतिज्ञ र दूतावासका कर्मचारीहरू छन्। फेब्रुअरीदेखि मार्च पहिलो सातासम्म उनीहरूलाई आफ्नो हाताबाट बाहिर निस्किन दिइएको थिएन।
कोरोनाभाइरस सङ्क्रमण फैलिने डरले उत्तर कोरियाले राजधानी प्योङ्याङमा भएका सयौँ विदेशी नागरिकलाई क्वारन्टीनमा बस्न निर्देशन दिएको थियो। रुसका राजदूत एलेक्सान्दर मात्सेगोराले त्यो परिस्थिति "बाध्यकारी" भएको टिप्पणी गरेका छन्।
उत्तर कोरियामा अहिलेसम्म कोरोना भाइरस सङ्क्रमण फेला परेको पुष्टि भएको छैन। तर केही विज्ञहरू त्यसप्रति शङ्का व्यक्त गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
