काठमाडौं- अर्थमन्त्री हट्ने हल्लाले सुधार भएको बजार उनको निरन्तरतासँगै घट्न थालेको बजार एक सातामै १९६ अंकले घटेको छ। तीन महिनाअघिदेखि अर्थमन्त्री हट्ने हल्लाले ५२३ अंकले सुधार भएको थियो।
जेठ १९ बाट अर्थमन्त्री डा. युवराज खतिवडा प्रतिनिधि सभाको सदस्य नरहने र उनी अर्थमन्त्रीबाट पनि हट्ने हल्ला फैलाइएको थियो। यसै अवधिमा नयाँ तथा पुराना लगानीकर्ताको प्रवेश भएको थियो। तर पछिल्लो एक साताको राजनितिक घटनाक्रम पूर्ण रुपमा अर्थमन्त्रीकै पक्षमा देखिएपछि बजार घट्ने क्रममै सर्किट लाग्यो।
बजार सुधार हुँदै गर्दा लगानीकर्ताको कन्फिडेन्स बढ्दा कारोबार रकम पौने पाँच अर्ब रुपैयाँसम्मको भयो। यस अवधिमा नेप्सेले अधिकतम कारोबार रकमको ऐतिहासिक रेकर्ड बनायो। साथै बजार पुँजीकरण पनि २० खर्ब नाघ्यो।
अर्थमन्त्रीलाई देखाउँदै घटबढ भएको बजारमा पछिल्ला दिनमा कोरोना भाइरसको सन्त्रासले पनि काम गर्यो। नेपाल कोरोना भाइरसको उच्च जोखिममा रहेको विश्व स्वाथ्य संगठनले जनाएपछि बजारमा नकारात्मक असर गरेको हो।
साताको अन्तिम दिन ५.५० अंकले गिरावट हुने क्रममा नेप्से सूचक १४३५.७० अंकमा रोकिएको छ। कारोबार रकम गएका दिनमा भन्दा दोब्बरले घटेर दुई अर्ब ४५ करोड रुपैयाँमा सिमित भएको छ। बाठा लगानीकर्ताले गएका दिनमा शेयर बेचेर राम्रो मुनाफा बुक गरेका छन्। तर बजार हल्लाको पछाडि पर्ने सोझा लगानीकर्ता भने पुनः फसेका छन्।
सबैभन्दा धेरै सुधार भएको नेपाल लाइफको शेयर सबैभन्दा धेरै ३७ करोड ८७ लाख रुपैयाँको कारोबार भएको छ। एक महिनाअघि ७/८ सय रुपैयाँको शेयर बढेर १४ सय रुपैयाँ पुगेको कम्पनीको शेयर मूल्य अधिकतम कारोबार हुँदै आएको छ।
धेरै पैसा कमाउने प्रलोभनमा लगानीकर्ताको ध्यान माइक्रो फाइनान्स र बीमा कम्पनीमा थियो। यी कम्पनीमा लगानी गर्नेले जसरी कमाएका थिए उही बाटोमा गुमाउन थालेका छन्। वाणिज्य बैंकका शेयरमा भने खासै ठुलो उतार चढाव देखिँदैन। तर बिहीबार वाणिज्य बैंकको सूचक १.११ प्रतिशतले घटेको छ।
नेपाल राष्ट्र बैंकले माइक्रोफाइनान्सले लाभांश वितरण गर्दा लाभांश बराबरको ५० प्रतिशत निक्षेपकर्ताको सुरक्षण कोष तथा बजार प्रवर्द्धनको लागि खर्च गर्नुपर्ने व्यवस्थासँगै विगत दुई दिनमा घट्यो। तर बिहीबार भने माइक्रोफाइनान्सको शेयरमा सुधार आएको छ। माइक्रोफाइनान्सको मूल्य धेरै नै तल झरेको भन्दै लगानीकर्ताको आकर्षण देखिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
