काठमाडौं– शिक्षा मन्त्री गिरिराजमणि पोखरेलले विद्यार्थी भर्ना अभियानलाई सार्थक तुल्याउन सबैपक्ष सक्रिय हुनुपर्ने बताएका छन्।
वैशाख १ देखि उच्च हिमाली क्षेत्रबाहेक देशैभरि विद्यार्थी भर्ना सुरु हुने भएकाले विद्यालयमा विद्यार्थी भर्ना गर्ने अभियान सफल पार्न शिक्षामन्त्री पोखरेलले आग्रह गरेका हुन्।
शिक्षा मन्त्रालयमा आयोजित कार्यक्रममा मन्त्री पोखरेलले भने, ‘वैशाख १ देखि नयाँ शैक्षिक सत्र प्रारम्भ हुँदैछ। प्रचारप्रसार, विद्यालय बाहिर रहेका विद्यालय जाने उमेर समूहका बालबालिकाको तथ्याङ्क संकलन, घरदैलो जस्ता सचेतना मूलक कार्यक्रम गरेर आ–आफ्नो क्षेत्र, जिल्ला, गाउँपालिका, नगरपालिका एवं विद्यालयतहसम्म विद्यालय जाने उमेर समूहका कोही पनि बालबालिका छुटाउनु हुँदैन।’
२०७४ को विद्यालयतहको शैक्षिक तथ्यांक अनुसार प्राथमिकतहमा खुद भर्नादरको राष्ट्रिय औसत ९७ दशमलब २ प्रतिशत छ अर्थात २ दशमलब ८ प्रतिशत बालबालिका अझैं विद्यालय बाहिर छन्।
त्यसैगरी आधारभूततह (कक्षा १–८) को (५–१२ वर्ष उमेर समूहको) खुद भर्नादर राष्ट्रिय औसत ९२ दशमलब ३ प्रतिशत पुगेको छ, जसमा ७ दशमलब ७ प्रतिशत बालबालिका विद्यालय बाहिर छन्।
मन्त्री पोखरेलले सर्लाही, धनुषा, रौतहट, पर्सा, वारा र कपिलवस्तु लगायतका केही जिल्लामा सबैभन्दा बढी बालबालिका विद्यालयबाहिर रहेको जनाए। उनले भने, ‘संविधानको मर्म अनुसार पनि विद्यालय शिक्षामा सबै बालबालिकाको समन्यायिक पहुँच पुर्याउनु राज्यको दायित्व हो।’
मन्त्री पोखरेलले, विद्यार्थीलाई आवश्यक पाठ्यपुस्तक भर्ना हुँदाकै बखत उपलब्ध गराउनका लागि स्थानीयतह मार्फत विद्यालयहरुमा २ अर्ब २२ करोड २२ लाख अनुदान रकम उपलब्ध गराइसकिएको जानकारी दिए।
मन्त्रालयले नयाँ शैक्षिक सत्र २०७५ मा विद्यार्थी भर्ना कार्यक्रमका लागि ‘हामी सबैको इच्छा, अनिवार्य निःशुल्क आधारभूत शिक्षा’ नारा तय गरी भर्ना अभियानको प्रचारप्रसार थालेको जनाएको छ।
विद्यालयबाहिर रहेका विद्यालय जाने उमेर समूहका सबै बालबालिकालाई विद्यालयमा सहज पहुँचको सुनिश्चितताका लागि विद्यार्थीे भर्ना तथा पाठ्यपुस्तक वितरण कार्यक्रममा सहयोग पुर्याउन मन्त्री पोखरेलले सम्पूर्ण शिक्षक, विद्यार्थी, अभिभावक, विद्यालय व्यवस्थापन समितिका पदाधिकारी, शिक्षक–अभिभावक संघ, उद्योगी, व्यापारी, वुद्धिजीवी, कलाकार, नागरिक समाज, सरकारी एवं गैरसरकारी संघसंस्था, सञ्चारकर्मी लगायत सबै पेशाकर्मीलाई आह्वान गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
