काठमाडौं- नेपाली कांग्रेसका वरिष्ठ नेता रामचन्द्र पौडेलले १४औं महाधिवेशन केन्द्रित भएको जनाउ दिएका छन्।
वि. सं. २०७७ को फागुनमा हुने महाधिवेशन लक्षित गर्दै नेता पौडेलले राजधानीको अनामनगरमा सम्पर्क कार्यालय स्थापना गरेका छन्।
सोमबारदेखि औपचारिक रूपमा शुरु गरिएको कार्यालयलाई सम्पर्क कार्यालय भन्ने नामाकरण भने भनिएको छैन।
सामाजिक लोकतन्त्र अध्ययन केन्द्रका नाममा कार्यालय सञ्चालनमा ल्याइए पनि अन्तिम लक्ष्य १४औं महाधिवेशन भएको पौडेल निकट नेताहरूको भनाइ छ।
औपचारिक रुपमा सुरु गरिएको कार्यालयलाई नेता पौडेलले महाधिवेशन केन्द्रित कार्यालय भनी खुला रूपमा स्वीकार गरेका छैनन्।
पत्रकारहरूलाई निम्तो गरिएको कार्यालयमा शुभारम्भ कार्यक्रममा उनले धेरै समय सरकार विरुद्ध खर्चिए।
आफू निकटका ४ जना व्यक्तिलाई दायाँबायाँ राखेर गरिएको कार्यक्रममा नेता पौडेलले सरकारविरुद्धमा सशक्त आन्दोलनको आवश्यकता रहेको बताए।
आधा घन्टा बोलेका नेता पौडेलले पत्रकार सामु नयाँ विषय भने कुनै उठाएनन्।
सरकारविरुद्ध कांग्रेसले लगाएका विगतकै आरोप दोहोर्याए। सरकार अधिनायकवाद उन्मुख,राज्यको कम्युनिस्टीकरण, भ्रष्टाचार, जग्गा प्रकरण, नेपाल ट्रस्टलगायतका विषय उठाएका थिए।
‘देशलाई नै कम्युनिस्ट ढाँचामा ढाल्ने प्रयत्न भइरेहको छ,’ नेता पौडेलले भने। केन्द्रीय कार्यालयमा पौडेलको आफ्नै कार्यकक्षसमेत छ। किन पार्टी कार्यालयमा कार्यक्रम नराखेको भनी पत्रकारको जिज्ञासामा उनले भने, ‘तपाईंहरूलाई सजिलो होस् भनी यहाँ राखिएको हो।’
सरकारले झन्डै दुई तिहाइ मतको दुरुपयोग गरेको आरोप लगाए। सर्वसत्तावादतिर प्रस्थानका लागि नेकपाले संसदको संख्यालाई दुरुपयोग गरेको बताए।‘ वामदेव गौतमलाई प्रधानमन्त्री बनाउने गरी संविधान संसोधन गर्ने तयारी सर्वासत्तावादको ज्वलन्त उदाहरण हो,' पौडेलले भने, ‘जनता प्रतिको उत्तरदायित्व नहुने गरी राष्ट्रियसभाको सदस्य प्रधानमन्त्री बनाउने बाटोमा नेकपा छ।’ नेताले मनोनित गरेर राष्ट्रियसभामा पुगेको व्यक्ति जनता प्रति उत्तरदायित्व नहुने पौडेलको बुझाइ छ। संसदीय व्यवस्थाको मूल मर्ममाथि नेकपाले प्रहार गरेकाले कांग्रेस राष्ट्रिय सभाबाट प्रधानमन्त्री बन्ने प्रावधान मान्न तयार नहुने प्रष्टाए।
नेकपाको केन्द्रीय कमिटीमा उठेको बहसप्रति समेत उनले आपत्ति जनाए। नेकपाको केन्द्रीय कमिटिको बैठकमा वर्तमान निर्वाचन प्रणालीमा सुधार गर्न राष्ट्रपतिय व्यवस्थामा जानुपर्ने प्रस्ताव आएका थिए। पौडेलले भने, ‘राष्ट्रपतीय प्रणाली समानुपातिक समावेशी प्रणाली विरुद्धको प्रणाली हो। समावेशी प्रणाली प्रति प्रधानमन्त्री केपी ओलीको कहिले पनि निष्ठा छैन।’
भ्रष्टाचार काण्डमा नेकपाको संस्थागत निर्णय भएको पौडेलले आरोप लगाएका थिए। गत निर्वाचनमा नेकपाका उम्मेदवारले अधिक खर्च गरेको जनाउँदै पौडेलले त्यसकै पूर्ति गर्न संस्थागत रुपमा नेकपा लागेको आरोप लगाए। उनले भने, ‘सत्ता बाँदरको हातमा नरिवल भएको छ। जनमतको दुरुपयोग गरिएको छ।’
सरकारको कार्यशैली र भ्रष्टाचारविरुद्धमा शसक्त रुपमा प्रतिरोध गर्ने समय आएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790151426.jpg)
-1786602170.png)
-1789631269.jpg)
