एजेन्सी- अमेरिकी राष्ट्रपति डोनाल्ड ट्रम्प साेमबार भारत आउँदै छन्। उनी भारतीय समयअनुसार बिहान ११ बजेर ४० मिनेटमा भारत आइपुग्ने छन्।
ट्रम्प भारतको २ दिने भ्रमणका लागि प्रस्थान गरिसकेका छन्। ट्रम्प वासिङ्टन डिसीको संयुक्त एन्ड्रयुज बेसबाट एयरफोर्स वन जहाजमार्फत आइतबार भारत भ्रमणमा निस्किएका हुन्। उनकाे याे पहिलो भारत भ्रमण हाे।
दुईदिने भ्रमणको पहिलो दिनमा ट्रम्प गुजरातको अहमदाबाद जानेछन्। अहमदाबादबाट ट्रम्प उत्तर प्रदेशको आग्रा जानेछन् र ताजमहल अवलाेकन गर्ने छन्। उनी सोमबार साँझ ढिलो दिल्ली पुग्नेछन्।
ट्रम्पकाे याे भ्रमणलाई चासाेका साथ हेरिएकाे छ। भारत अमेरिकाको आठौं ठूलो व्यापार साझेदार देश हो। ट्रम्पले भ्रमणका क्रममा भारतसँग ठूलो व्यापार सम्झौता गर्न सक्ने सम्भावना छ। जसका लागि दुवै देशमा दुई महिनादेखि तयारी भइरहेको बताइएकाे छ। यद्यपि भ्रमणको केहि दिन अघि ट्रम्पले भारतसँग कुनै ठूलो सम्झौता नगर्ने स्पष्ट पारेका थिए।
अमेरिकी व्यापार प्रतिनिधि रोबर्ट लाइटजाइन्जरले दुई देशबीचकाे व्यापार भिन्नताका कारण गत हप्ता भारत भ्रमण रद्द गरेका थिए। मतभेदकै कारण ट्रम्प र मोदीबीच यसअघि भएकाे भेटमा व्यापार सम्झौता हुन सकेकाे थिएन।
विज्ञहरूका अनुसार ट्रम्प प्रशासनले साना मुद्दाहरूमा संलग्न भएर व्यापारिक सम्बन्ध बिगार्छ भने भविष्यमा यसले भारतलाई रणनीतिक साझेदारको रूपमा नजीक राख्न सक्दैन।
ट्रम्पकाे भ्रमणक क्रममा भारत र अमेरिकाबीच रक्षा सम्झौता पनि हुन सक्ने सम्भावना छ। भारतीय विदेश मन्त्रालयका प्रवक्ता रविश कुमारका अनुसार 'राष्ट्रपति ट्रम्पको दुईदिने भ्रमणमा भारतले अमेरिका र भारतबीच रणनीतिक विश्वाव्यापी सम्बन्ध अझ मजबुत हुने आशा राखेको छ।' द्विपक्षीय वार्तामा क्षेत्रिय र विश्वव्यापी मुद्दा, व्यापार, रणनीतिक छलफल, आतंकवादको मुकाबिलालगायतका विषयमा छलफल हुनेछ।
बीबीसीका अनुसार राष्ट्रपति ट्रम्पले कश्मीर मुद्दामा भारत र पाकिस्तानबीच मध्यस्थता गर्न प्रस्ताव गरिसकेका छन्। गत वर्ष अगस्टमा भारतले कश्मीरको विशेष राज्यको दर्जा खारेज गरेकाे थियाे। त्यसपछि ट्रम्पले मध्यस्थताको लागि आग्रह गरेका थिए।
भारतले यसलाई स्पष्ट रूपमा अस्वीकार गर्दै यो उनीहरूको आन्तरिक मामला भएकाे बताएकाे थियाे। ट्रम्पको भ्रमणको क्रममा हिंसा भड्किन सक्ने आशंकामा कश्मिरमा स्थानीय पञ्चायतकाे चुनाव स्थगित गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
