जनकपुर– मैथिली मधेसी समुदायमा महिलाहरुले शव बोक्नुहुँदैन भन्ने परम्परा छ। तर, बुधबारको दृश्य फरक देखियो। मंगलबार निधन भएका धनुषाको सबैला २ का ६५ वर्षीय रामनारायण यादवलाई छोरीहरुले बोके। ५ महिलाहरुले शव बोकेर निस्किएपछि हेर्नेहरुको लर्को नै लाग्यो।
मृतक यादवका कुनै छोरा छैनन्। ५ छोरीमात्रै छन्। पुरुषहरुले मात्र अर्थि(शव) उठाउने परम्परालाई तोड्दै यादवकी जेठी छोरी ४० वर्षीया नेपुर यादव, माहिली ३७ वर्षीया राजोदेवी यादव, साहिँली ३५ वर्षीया प्रमिलादेवी यादव, ३२ वर्षीया अनितादेवी यादव र ३० वर्षीया गोर्की यादवले बुवाको अर्थिलाई काँधमा बोके। उनीहरुले शवलाई गाउँभन्दा करिब ५ किलोमिटर पूर्व कमलाघाटसम्म काँधमा बोकेर लगे।
बुवाको शव काँधमा बोकेर हिँड्दै गर्दा छोरीहरुको आँखाबाट आँसु पनि थामिएको थिएन र अघिअघि उनीहरुकी आमा पनि हिँडेकी थिइन्।
छोरीहरुले अर्थिलाई काँध दिएर हिडेपछि स्थानीयहरु पनि मलामी भएर सहभागी भएका थिए ।
मृतक यादवको पार्थिव शरीरलाई उनकै पत्नी ६२ वर्षीया रवियादेवी यादवले दागबत्ती दिईन्।
रविया देवीले आफ्नो छोरा नभएले छोरीहरुलाई छोरासरह पालनपोषण गरेको बताउँदै भनिन्, ‘हाम्रा लागि छोरीहरु नै छोरासरह भएकाले मेरा सबै छोरीहरूले नै काँध दिनुपर्ने निर्णय गरेकी हुँ।’
जेठी छोरी नेपुरले आफूले बुवाको पार्थिव शरीरलाई काँध दिन पाउँदा छोराहरुले गर्ने काम छोरीले पनि गर्न सक्छन् भन्ने महसुस गरेको बताईन्। उनले भनिन्, ‘सामाजिक रुपान्तरणका लागि पनि छोरीहरुले छोराले झै काँध दिन र दागबत्ती दिन पाउनु पर्छ भन्ने सन्देश दिन पाएको महसुस गरेकी छु।
’स्थानीय जगतसुन्दर साहले ‘छोरीहरुले ‘कन्धा’ दिनु र पत्नीले दागबत्ती दिएको कुरालाई गाउँ–समाजले पनि सहज रुपले आत्मसात गर्दै प्रशंसा गरेको बताए।
यसअघि छोरी वा महिलाले दागबत्ती दिएको कहिलेकाहीँ कतै कतै देखिए पनि अर्थि ९शव० छोरीहरुले बोकेर मसानघाट लगेकोमा अहिले चर्चा र प्रशंसाको विषय बनेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।