धनुषा- विभत्स तरिकाले हत्या गरिएका पर्यावरण अभियन्ता दिलीप महतोले न्याय पाउनुपर्ने माग गर्दै धनुषाको ढल्केवरमा प्रदर्शन गरिएको छ। उनको टिपरले किचेर हत्या गरिएको थियो।
चुरे तथा वन जङ्गल संरक्षण अभियानले तय गरेको पूर्व निर्धारित कार्यक्रमअनुसार विभिन्न माग राख्दै ढल्केवरमा प्रदर्शन गरिएको हो।
प्रदर्शनकारीहरुले दिलीप महतोलाई प्रथम राष्ट्रिय पर्यावरण सहिद घोषणा, हत्या अनुसन्धानका लागि उच्चस्तरीय छानबिन समिति गठन, पीडित परिवारलाई उचित क्षतिपूर्तिको व्यवस्था, दोषीलाई कडा कारबाही, चुरे तथा वनजङ्गल सुरक्षित हुनुपर्ने माग गरेका थिए।
प्रदर्शनका सहभागीहरुले ढल्केवरचोकको परिक्रमा गरी पश्चिम चोकस्थित रहेको तरकारी बजार अगाडिको पूर्व–पश्चिम राजमार्गमै कोणसभा गरेकाले करिब एक घण्टा सवारीसाधन अवरुद्ध भएको थियो।
कोणसभामा समाजिक अभियन्ता सरोज राय, पिछडावर्ग समाज (ओबिसी)का केन्द्रीय अध्यक्ष रामकुमार महतो, तराई मधेस राष्ट्रिय परिषद्की सदस्य गुञ्जा राय, तराई मधेस चुरे संरक्षण अभियानका अध्यक्ष सुनिल यादवलगायतका वक्ताहरुले सम्बोधन गरेका थिए।
मिथिला नगरपालिका-५ श्रीपुरका रामजीवन महतोको २४ बर्षीय छोरा ओमप्रकाश महतो भनिने दिलीपलाई गएको पुष २५ गते शुक्रबार रडले घोचेर हत्या गरी टिपरले किचेको थियो। दिलीपको हत्या अभियोगमा हालसम्म ६ जनालाई प्रहरीले पक्राउ गरी कानुनी प्रक्रियालाई अगाडि बढाइएको छ भने हत्याकै दिनदेखि देशभर विरोध प्रदर्शन हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
