काठमाडौं- राष्ट्रिय प्रजातन्त्र पार्टीका अध्यक्ष कमल थापाले पार्टीलाई उठाउने सङ्कल्प र त्यसको कार्यान्वयन गर्ने क्रममा केन्द्रीय महाधिवेशन सफलतापूर्वक सम्पन्न गर्नुपर्नेमा जोड दिएका छन्।
पार्टीको बागमती प्रदेशस्तरीय निर्वाचन अभिमुखीकरण बैठकलाई बुधबार काठमाडौंमा सम्बोधन गर्दै थापाले संगठन निर्माणको जगमा पार्टीलाई राष्ट्रिय राजनीतिमा स्थापित गराउने दृढता व्यक्त गरे।
काङ्ग्रेस र कम्युनिष्टको विकल्पको रुपमा राप्रपालाई अगाडि बढाउन देशभरका कार्यकर्ताको प्रतिबद्धता र मेहनतको जरुरी भएको समेत थापाले चर्चा गरे। सक्रिय सदस्यताको आधारमा महाधिवेशन प्रतिनिधि हुने विषयलाई नेताहरुले गम्भीरतासाथ लिई काम गर्न थापाले आग्रह गरेका थिए।
कार्यक्रमलाई सम्बोधन गर्दै वरिष्ठ नेता दिपक बोहराले देशव्यापी रुपमा संगठन सुदृढीकरण अभियानमा लाग्नुपर्नेमा जोड दिए। पार्टीका वरिष्ठ उपाध्यक्ष बुद्धिमान तामाङले पार्टी र नेतृत्वप्रति चलाइएको भ्रम र घेराबन्दीलाई तोडेर अघि बढ्नुको विकल्प नभएको बताए।
कार्यक्रममा बागमती प्रदेशका तेह्र जिल्लाका तीन सय पाँच प्रतिनिधिको सहभागिता थियो। केन्द्रीय पदाधिकारी सदस्य, प्रदेश समिति, जिल्ला-नगर-क्षेत्र र गाउँपालिका प्रमुख र जन वर्गीय संगठनका प्रमुखहरुको सहभागिता रहेको थियो।
कार्यक्रममा निर्वाचन समितिका अध्यक्ष तोरणबहादुर गुरुङ र बागमती प्रदेश अध्यक्ष बिक्रम बहादुर थापाले समेत बोलेका थिए भने जिल्ला अध्यक्षहरुले धारणा राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
