गृहमन्त्रालयमा आयोजित समारोहमा गृहसचिव महेश्वर न्यौपानेले नवनियुक्त प्रहरी महानिरीक्षक ठाकुरप्रसाद ज्ञवालीलाई दर्ज्यानी चिह्न प्रदान गर्दै। तस्बिर: नारायण ढुङ्गाना- रासस
काठमाडौं– नवनियुक्त प्रहरी महानिरीक्षक (आइजी) ठाकुरप्रसाद ज्ञवालीलाई दर्ज्यानी चिन्ह प्रदान गरिएको छ।
गृहमन्त्रालयमा आयोजित एक कार्यक्रमका बीच गृहसचिव महेश्वर न्यौपानेले ज्ञवालीलाई आइजीको दर्ज्यानी लगाइदिएका हुन्। दर्ज्यानी लगाइसकेपछि सचिव न्यौपानेले नवनियुक्त आइजी ज्ञवालीलाई समग्र संगठनको हितमा काम गर्न निर्देशन दिएका थिए।
‘व्यक्ति केन्द्रितभन्दा पनि समग्र संगठनको हितमा काम गर्नुहोस्। तपाईंको कार्यकालमा शान्ति सुरक्षाकाे अवस्था अझै मजबुत हुने विश्वास गरेका छौं,’ निर्देशन दिँदै सचिव न्यौपानेले भने।
मंगलबार बसेको मन्त्रिपरिसद् बैठकले डिआइजी ज्ञवालीलाई आइजी बनाउने निर्णय गरेको थियो। योसँगै ज्ञवाली नेपाल प्रहरीको २७औं प्रहरी महानिरीक्षकमा नियुक्त भए।
प्रहरी नियमावलीमा भएको अहिलेको कुनै व्यवस्था परिवर्तन नभएको अवस्थामा आगामी असार २४ गते ज्ञवालीले ३० वर्षे सेवा अवधिका कारण अनिवार्य अवकाश पाउनेछन्।
संयोग २०२२ असोज २८ गते प्युठानमा जन्मिएका ज्ञवालीलाई सोहि दिन प्रहरीको सर्वोच्च पद आइजीमा बढुवा गर्ने निर्णय सरकारले गरेको थियो। त्यसको भोलिपल्ट बुधबार उनले आइजीको दर्ज्यानी लगाए।
तर, तिथि अनुसार भने ज्ञवालीको जन्मदिन आज परेका छ। पारिवारिक स्रोतका अनुसार आजै केक काटेर ज्ञवालीले जन्मदिन मनाउँदैछन्।
प्रहरीभित्र सरल छवि बनाएका ज्ञवालीले आइजीको दर्ज्यानी लाएसँगै आजैबाट पदभार ग्रहण गर्नेछन्। नयाँ आइजीको स्वागतका लागि भन्दै एक हप्ताअघि नै प्रहरी प्रधान कार्यालयले मातहतका निकायलाई पत्राचार गरिसकेको छ। पत्राचारमार्फत सिनियर अधिकृत १ नम्बर पोशाकमा अनिवार्य उपस्थित हुन निर्देशन दिइएको थियो।
नवनियुक्त आइजी ज्ञवालीले कार्यभार सम्हाल्दै मातहतका प्रहरी अधिकारीलाई निर्देशन दिनेछन्। यसअघि ज्ञवाली प्रदेश १ प्रमुखको रुपमा कार्यरत थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
