काठमाडौँ- गृहमन्त्री रामबहादुर थापासँग नेपालका लागि दक्षिण कोरियाका राजदुत पार्क योङ्गसिकले शिष्टाचार भेट गरेका छन्।
गृह मन्त्रालयमा शुक्रबार भएको भेटमा पार्कले केही दिन अघि कास्कीको अन्नपूर्ण क्षेत्रमा गएको हिम पहिरोमा परी हराइरहेका आफ्ना चार जना नागरिकको खोजीका विषयमा चासो राखेका थिए।
भेटवार्ताका क्रममा गृहमन्त्री थापाले हिमपहिरो लगत्तै सो क्षेत्रबाट धेरै व्यक्तिको सकुसल उद्धार भएको जानकारी गराउँदै चार कोरियाली र तीन नेपाली अझै हराइरहेको बताए। गृहमन्त्री थापाले उनीहरुको खोजी कार्य जारी रहेकोसमेत जानकारी दिए।
उनले नेपाली सेना, नेपाल प्रहरी र सशस्त्र प्रहरी तथा स्थानीयसमेतको सहयोगमा हराइरहेकाको खोजी गरिरहेको भन्दै छिट्टै उनीहरुको अवस्था पत्ता लाग्ने विश्वास दिलाएका छन्। गत माघ ३ गते अन्नपूर्ण हिमाल क्षेत्रमा परेको हिमपातका कारण उनीहरु हराइरहेका छन्।
भेटवार्ताका क्रममा गृहमन्त्री थापाले नेपालको विकासमा कोरिया सरकारले गरेको सहयोगप्रति धन्यवाद दिँदै आगामी दिनमा सहयोगले निरन्तरता पाउने आशा व्यक्त गरेका छन्।
उनले कोरिया प्रायदिपमा देखिएको समस्या वार्ता र सम्वादको माध्यमबाट समाधान होस् भन्ने चाहना नेपालको रहेको समेत बताए।
दक्षिण कोरियामा ठुलो संख्यामा नेपालीहरु कामका लागि गएको र कतिपय समस्यामा समेत परेको भन्दै उनीहरुको समस्या समाधानमा विशेष ध्यान दिन राजदुतसँग गृहमन्त्रीले आग्रह गरेका छन्।
भेटमा राजदुत पार्कले नेपाल र कोरियाको सम्बन्धको चर्चा गर्दै नेपालको विकासमा कोरियाले सहयोग जारी राख्ने प्रतिबद्धता समेत जनाए।
उनले हराएका कोरियाली नागरिकका केही आफन्त खोजीका लागि नेपाल आएको जानकारी दिँदै उनीहरुलाई नेपाल सरकारले आवश्यक समन्वय गर्ने विश्वास व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
