काठमाडौं- देशकै एक तिहाई मुद्दाको बोझ बोकेको उच्च अदालत पाटनमा २ वर्ष पुराना मुद्दा २४ थानमात्र भेटिएको छ। १० हजार मुद्दाको लगत रहेको उच्च अदालत पाटनमा आर्थिक वर्ष २०७६/०७७का लागि २ वर्ष नाघेका दुई दर्जन मुद्दामात्र फैसलाको लागि बाँकी रहेको हो।
उच्च अदालतले गत वर्षभन्दा यो वर्ष फैसला दरमा पनि वृद्धि गरेको छ। गत आर्थिक वर्षमा २ सय ६७ थान दुई वर्ष पुराना मुद्दा रहेकोमा यो वर्ष उल्लेख्य मात्रमा फैसला भएको उच्च अदालत पाटनका मुख्य न्यायाधीश नहकुल सुवेदीले बताए।
उच्च अदालतमा २१ दिनभित्र फैसला लेख्ने कार्य पनि सफलतातर्फ उन्मुख भएको मुख्य न्यायाधीश सुवेदीले बताए।
चेक वाउन्सका मुद्दा बढे
उच्च अदालत पाटनमा रहेको वाणिज्य इजलाशमा बैंकिङ कसुरका मुद्दामा चेक वाउन्सको अभियोगमा धेरै मुद्दा दायर हुने गरेको पाइएको छ। जम्मा २०३८ थान मुद्दा वाणिज्य इजलाशमा विचाराधीन रहेका छन्।
तीमध्ये १८४३ थान बैंकिङ कसुरका रहेका छन्। अधिकांश मुद्दा चेक वाउन्समा दायर भएका मुद्दा रहेको उच्च अदालतले जनाएको छ। किर्ते जग्गाधनी खडा गरी बैंकलाई नोक्सान पुर्याएको र बैंक ह्याकिङका मुद्दा उच्च अदालतमा विचाराधीन रहेका छन्।
२१ दिनमै फैसला तयार
उच्च अदालतले २१ दिनमै फैसला तयार गरेर दिन थालेको छ। पक्ष र विपक्षले पुनरावेदन गर्न सहज हुने भएकाले उच्चले फैसला भएको ३ हप्तामा फैसला दिन थालेको हो। सर्वोच्च अदालतमा अझै पनि फैसला आउन ६ महिना लागिरहेको अवस्थामा उच्चले यस्तो अभ्यास गरिरहेको मुख्य न्यायाधीश सुवेदीले बताए। मुलुकी फौजदारी संहिताले समयमा फौसला दिनुपर्ने व्यवस्था गरेकाले समयमा दिने अभ्यास थालिएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749202449.png)
-1749200817.png)
