धनगढी- कैलालीको चुरे गाउँपालिका १ स्थित पार्वती सामुदायिक वन उपभोक्ता समूहमा व्यापक आर्थिक अनियमितता भएको उपभोक्ताहरूले आरोप लगाएका छन्।
उपभोक्ताहरूले काठ, सडक विस्तार, श्रमिकको ज्याला, यातायात खर्चलगायतमा आर्थिक अनियमितता भएको आरोप लगाएका हुन्। उपभोक्ताहरूले सामुदायिक वनका अध्यक्षमा हर्कबहादुर सार्कीको कार्यकालमा ५८ हजार दुई सय २९ क्यूफिट काठ कटानी गरिएको, सडकको ब्रेकरमा पाँच लाख र बकेट ४० लाख ५० हजार रुपैयाँ खर्च देखाइएको बताएका छन्।
सो सामुदायिक वनका उपभोक्ताहरूले सामुदायिक वनमा काटिएका रुखबाट के कति आम्दानी भयो भन्नेबारे अहिलेसम्म जानकारी नगराएको बताएका छन्। सामुदायिक वनले निगालीदेखि रिटेखोलासम्मको झण्डै एक किलोमिटर सडक मर्मत गराएको थियो। सो सडक मर्मत गर्दा श्रमिकहरूले १४ लाख ५५ हजार सात सय २५ रुपैयाँ प्राप्त गरेको जनाइएको छ। उपभोक्ताहरूले सामुदायिक वनका पदाधिकारीहरूले आयव्यय स्पष्ट रुपमा सार्वजनिक नगरेको आरोप लगाए।
उपभोक्ताहरूले वनभित्र भएको आर्थिक अनियमितताबारे गत जेठ १८ गते अख्तियार दुरुपयोग अनुसन्धान आयोगमा उजुरी गरिसकेका छन्।
आर्थिक वर्ष २०७२/७३ मा सो वनको बैंक मौज्दात एक करोड ९० लाख रुपैयाँ रहेको थियो। आर्थिक वर्ष २०७४/७५ मा देवबहादुर धामी अध्यक्षमा चयन भएका थिए। निवर्तमान अध्यक्ष सार्कीको कार्यकालमा ८१ लाख ४९ हजार पाँच सय ९९ सय रुपैयाँ खर्च भएको जनाइएको थियो भने वनको आम्दानी एक करोड ११ लाख ६७ हजार आठ सय ३५ रुपैयाँ रहेको उल्लेख छ।
सामुदायिक वनले दिएको खर्च विवरणअनुसार यातायात शीर्षकमा दुई ठाउँ खर्च देखाइएको छ। वनले इन्धन/यातायात खर्च पदाधिकारी भनेर एक लाख ५३ हजार तीन सय १२ र यातायात खर्च भनेर ९४ हजार दुई सय ७२ रुपैयाँ उल्लेख गरेको छ। यस्तै, देवबहादुर धामीले ४२ जनाको किर्ते हस्ताक्षर गरी २१ लाख रकम निकालेको उपभोक्ताहरूले आरोप लगाएका छन्।
वनका अध्यक्ष देवबहादुर धामीले वनभित्र भएका सम्पूर्ण गतिविधिहरू उपभोक्ताहरूलाई सार्वजनिक गरिएको बताए। उनले एक दुई मानिसले सुनियोजित ढंगले वनको वदनाम गरिरहेको प्रतिक्रिया दिए। उनले कृर्ते हष्ताक्षर रकम निकालेको भन्ने गलत भएको बताए।
सो वनमा दुई सय ५१ घरधुरी आवद्ध रहेका छन्। सबडिभिजन वन कार्यालय सहजपुरका वनरक्षक डम्बरराज भट्टले वनको सम्पूर्ण कागजपत्र माग गरिएको बताए। ‘अख्तियारमा पठाउनुपर्ने थियो, अहिलेसम्म पठाएको छैनन्,’ उनले भने, ‘अब कार्यालयका इन्चार्ज आएपछि ती विवरणहरू पठाइने छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
