धनगढी- सरकारले राना थारु समुदायलाई अलग जातिका रुपमा सूचिकृत गरेकोमा धनगढीमा दिप प्रज्वलन गरिएको छ। राना थारु समुदायले बिहीबार धनगढीको पार्कमोडमा दिप प्रज्वलन गरेका हुन्।
कार्यक्रममा प्रतिनिधी सभा सदस्य नारदमुनि राना, कृपाराम राना, प्रदेश सभा सदस्य मालामति राना लगायतका रानाथारु समुदायहरुको सहभागिता रहेको थियो।
मन्त्रिपरिषद्को निर्णयले रानाथारुलाई आदिवासी जनजातिमा सूचीकृत गरेको कैलाली क्षेत्र नम्बर ५ का प्रतिनिधि सभा सदस्य नारदमुनि रानाथारुले सञ्चारकर्मीलाई जानकारी दिए। सांसद रानाथारुले भने- हामीले २०५६ सालमा नै हामीलाई आदिवासी जनजातिमा अलग्गै सूचिकृत गर्न माग गरेका थियौं। दुई दशकदेखिको संघर्ष अहिले पुरा भएको छ।
रानाथारुको प्रतिनिधित्व गर्ने प्रतिनिधी तथा प्रदेश सभा सदस्यहरुले सूचिकरण गरेकोमा खुशीयाली व्यक्त गर्दै सरकारलाई धन्यवाद दिएका थिए। यो सँगै सूचिकृतमात्र नभई अब अधिकार पनि प्रदान गरिनुपर्ने माग गरेका थिए।
बिहीबार सरकारका प्रवक्ता एवं सञ्चार तथा सूचना प्रविधि मन्त्री गोकुल बाँस्कोटाले सरकारको २३ वटा निर्णय सार्वजनिक गरेका थिए। सो निर्णयमा राना थारुलाई अलग जातीमा सूचिकृत गरेको उल्लेख छ।
सरकारले विभिन्न जातजातिलाई सूचिकृत गर्दा सुदूरपश्चिमका रानाथारु समुदायलाई अलग जातिका रुपमा सूचिकृत गरेको थिएन। रानाथारु समुदायले सुरुदेखि नै आफूहरूलाई अलग जातिका रुपमा सूचिकत गर्न माग गर्दै आएका थिए।
सरकारले आदिवासी जनजातिको सूचिमा ५९ वटा समुदायलाई सूचीकृत गरेकोमा अब रानाथारु थपिएपछि ६० पुगेका छन्।
नेपालमा कैलाली र कञ्चनपुर जिल्लामा मात्रै रानाथारु समुदायको बसोबास रहेको छ। रानाथारु समुदायको साढे तीन लाख बढि जनसंख्या रहेको छ।
रानाथारु समुदायको मौलिक भाषा, संस्कृति, भेषभूषा तथा रहनसहन छ।
२०६८ को राष्ट्रिय जनगणनामा रानाथारुसहित थारु समुदायको जनसंख्या १७ लाख ३७ हजार ४ सय ७० रहेको छ।
२०६४ सालमा डाक्टर ओम गुरुङको संयोजकत्वमा गठित आदिवासी जनजाति सूची परिमार्जन उच्चस्तरीय कार्यदलले रानाथारु सहित १० जातिको अध्ययन गरी सूची परिमार्जनका लागि सुझाव दिएको थियो।
यसअघि २०४३ मा तत्कालीन राजा विरेन्द्रले पञ्चायती सरकारका भूमिसुधार मन्त्री लबरु रानालाई रानाथारुको पहिचान दिएका थिए।
गत कात्तिक महिनामा भाषा आयोगले रानाथारुसहित ६ भाषा सूचीकृत गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
