काठमाडौं- सत्तारुढ दल नेपाल कम्युनिष्ट पार्टी (नेकपा)को केन्द्रीय कमिटी बैठकमा अमेरिकी सहयोग परियोजना एमसिसीमा पार्टीको स्पष्ट धारणा सार्वजनिक हुनुपर्ने माग गरिएको छ।
१५ समूह बनाएर समूहगत छलफलमा केन्द्रीय सदस्यहरुले एमसिसीका विषयमा तल्लो तहसम्मका कार्यकर्ताहरुले बुझ्ने गरी पार्टीको आधिकारीक धारणा माग गरिएको हो। नेकपा केन्द्रीय सदस्य गंगालाल तुलाधरले विज्ञ समूह नै बनाएर एमसिसीका विषयमा राम्ररी अध्ययन गर्नुपर्ने माग गरे।
पार्टीभित्र एमसिसीका विषयमा धारणा राख्दै नेताहरुले महाकाली सन्धिपछिको अवस्था आउन नदिन शीर्ष नेताहरुलाई चेतावनीसमेत दिएका छन्। पार्टीले उपयुक्त समयमा एमसिसीको विषयमा प्रष्ट गर्न नसक्दा समस्या उत्पन्न हुने प्रति नेतृत्वलाई सचेत बनाए।
तुलाधारले एमसिसीका लागि अध्ययन समूह बनाउनुपर्ने बताए। नेपाल लाइभसँग कुरा गर्दै उनले भने, ‘हिजो महाकालीको विषयले पार्टी फुटेको अवस्था छ। अहिले एमसिसीको विषयले पनि नेकपालाई त्यही ठाउँमा लैजान्छ कि भन्ने आशंका भएका छन्। उनले भने, ‘त्यसैले एमसिसी के हो? भन्ने कुरामा स्पष्ट हुनुनपर्छ भन्ने कुरा आएका छन्।’
एमसिसीको सन्दर्भमा तीन प्रकारका धारणा आएको केन्द्रीय सदस्य सुरेश कुमार राईले बताए। नेपालको हितमा भएकाले पारित गर्नुपर्ने पहिलो तर्क रहेको उल्लेख गर्दै उनले भने, ‘पास गरेर सरकारले कार्यान्वयनमा लैजानुपर्छ भन्ने एउटा धारणा छ।' अमेरिका जस्तो शक्तिशाली राष्ट्रले नेपाललाई यति ठूलो सहयोग गर्नुको रहस्य के हो भन्ने आशंका समेत व्यक्त भएको उनले राइले बताए। उनले भने,‘पार्टीको तल्लो तहसम्म अनावश्यक बहस भएको छ।’
एउटा विपन्न राष्ट्रलाई अमेरिकाले दिने सहयोग भनेर प्रचारप्रसारमा आएको अर्का केन्द्रीय सदस्य शिवनारायण यादवले बताए। पार्टीले उच्चस्तरीय समूह बनाएर एमसिसीको तथ्य बाहिर ल्याउन उनले नेतृत्वलाई सुझाव दिए। ‘जनताको हितमा छ भने सहयोग स्वीकार गर्नुपर्ने तर राष्ट्रलाई अहित गर्छ भने लिनु हुन्न,’ उनले भने।
नेतृ कमला रोक्काले पार्टीका सबै तहमा न्यूनतम ३३ प्रतिशत महिलाको प्रतिस्पर्धा हुनुपर्ने बताइन्। प्रत्येक कमिटीमा अध्यक्ष र उपाध्यक्ष हुनेगरी विधान संशोधन गर्ने र दुई पदमध्ये एउटामा महिलाको सहभागिता हुनुपर्ने उनको विचार थियो। रोक्काको मतमा केन्द्रीय सदस्य रेखा शर्मा धारणा मिलेको छ। माथिदेखि तलसम्म अध्यक्ष र उपाध्यक्ष राखि एकजना महिलाको हुनुपर्ने उनको माग छ। पार्टीका हरेक तहमा एक तिहाई महिलाको सहभागिता सुनिश्चित हुनुपर्ने बताइन्।
एमसिसीको विषयमा अझ स्पष्ट पार्न नेता कार्यकर्ताहरुर्लाइ प्रशिक्षण दिनुपर्ने केन्द्रीय सदस्य दिनानाथ शर्माले राय राखे। सीमा विवादका विषय कुटनीतिक, राजनीतिक र जनस्तरबाट समाधान निकाल्नुपर्ने उनको विचार थियो।
नेकपाको बैठकमा शुक्रबारबाट समूहगत छलफलमा उठेका विषयहरुलाई समूह नेताहरुले प्रस्तुत गरिरहेका छन्। शुक्रबार ४ वटा समूह र प्रदेश अध्यक्षहरुले आफ्नो प्रस्तुति राखेका थिए। बैठक शनिबार पनि जारी रहने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
