काठमाडौं- नेपाल कानुन व्यवसायी परिषद्को बागमती प्रदेशको पार्षद् पदमा वरिष्ठ अधिवक्ता तथा प्राध्यापक गुणनिधि न्यौपाने उम्मेदवारी घोषणा गरेका छन्।
लामो समय नेपाल ल क्याम्पसमा प्राध्यापन गरेर त्रिभुवन विश्वविद्यालयको शिक्षाध्यक्षसमेत भइसकेका न्यौपालेले उम्मेदवारी घाेषाणासँगै घोषणापत्र पनि सार्वजनिक गरेका छन्। यही माघ २५ गते हुने परिषद्को निर्वाचनबाट पार्षद् निर्वाचित भएमा आफूले गर्ने कामहरुको लक्ष्य र प्रतिबद्धता समेटेर उनले घाेषणापत्र सार्वजनिक गरेका हुन्।
वरिष्ठ अधिवक्ता न्यौपानेले परिषद् ऐन २०५० मा समयानुकुल संशोधन गर्न, वरिष्ठ अधिवक्ताको उपाधि परिषद् समेतको सल्लाह र सिफारीसमा निश्चित मापदण्ड अनुसार प्रदान गर्न, कानुन व्यवसायीको शुद्धिकरण र व्यवसायिक मर्यादामा जोड दिई विद्यमान आचार संहिताबाट कारवाही वा निलम्बन गर्ने प्रावधानको सट्टा ऐनमा नै संशोधनमार्फत वा छुटै नँया ऐनमार्फत सो सम्बन्धी कानुन निर्माण गर्न पहल गर्ने अठोट गरेका छन्।
'कानुन व्यवसायीको फर्म-कार्यालय दर्ताको लागि परिषद्लाई नै अधिकार दिने गरी ऐन संशोधन गर्न, कानुन विषयको अध्ययनअध्यापन हुने सबै विश्वविधालयहरुका समन्वय र सहकार्य गर्दै गुणस्तरीय कानुनी शिक्षाको विकासका आवश्यक मापदण्ड निर्धारण गर्न, कानुन व्यवसायीको सामाजिक सुरक्षाको लागि कल्याणकारी कोषको व्यवस्थालाई प्रभावकारी बनाउन म कटिबद्धत छु,' घोषणा पत्रमा लेखिएको छ।
नवोदित कानुन व्यवसायीहरुको पेशाप्रति आर्कषण र आत्मविश्वास बढाउँदै काम गर्ने वातावरण सृजना गरी अल्पकालीन, मध्यकालीन र दिर्घकालीन सीपमूलक व्यवसायिक प्रशिक्षणको लागि पाठ्यक्रम तयार गरी प्रशिक्षण दिन, वरिष्ठ अधिवक्ता र नवप्रवेशी सबै तहका कानुन व्यवसायीहरुलाई आवश्यकता अनुसारको तालिम गराउन छुट्टै प्रशिक्षण केन्द्रको स्थापनामा गर्न विशेष जोड दिने उनले उल्लेख गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।