सुर्खेत– कर्णाली प्रदेशका विमानस्थलहरुको बिस्तार तथा स्तरोन्नति गरिने भएको छ। आईतवार कृषि मन्त्रालयमा पत्रकार सम्मेलनमार्फत कर्णाली प्रदेश मन्त्रिपरिषदका निर्णय सार्वजनिक गर्दै प्रदेश सरकारका प्रवक्ता एवं भूमि व्यवस्था तथा सहकारी मन्त्री बिमला केसीले यस्तो जानकारी दिएकी हुन्।
मन्त्री केसीले प्रदेश राजधानी वीरेन्द्रनगर सुर्खेतलगायत संघीय सरकारको प्राथमिकतामा परेका विमानस्थलको बिस्तार तथा स्तरोन्नति गरिने बताइन्। यस्तै मन्त्रिपरिषद् बैठकले माघ २४ गते प्रदेश सभाको पाँचौँ अधिवेशन आह्वान गर्ने निर्णय गरेको छ। सरकारले आन्तरिक मामिला तथा कानून मन्त्रालयको प्रस्तावमा कानूनी सहायतासम्बन्धी कार्यविधि २०७६ र विपद् जोखिम बिमासम्बन्धी कार्यविधि २०७६ स्वीकृत गरेको मन्त्री केसीले बताइन्।
‘बैठकबाट कानूनी सहायतासम्बन्धी कार्यविधिअनुसार २० सहजकर्ता नियुक्त गरिने छ,’ उनले भनिन्, ’नियुक्त सहजकर्तामा १० जिल्लामा प्रमुख सहजकर्ता र १० जना स्थानीय तहमा सहजकर्ता नियुक्त गर्ने बैठकले निर्णय गरेको छ।’
त्यस्तै, उद्योग, पर्यटन, वन तथा वातावरण मन्त्रालयको प्रस्तावमा कर्णाली प्रदेश खानी अन्वेषण तथा व्यवस्थापनसम्बन्धी विधेयक तर्जुमा गर्न सैद्धान्तिक स्वीकृति प्रदान गर्ने, कर्णाली प्रदेश वाणिज्यसम्बन्धी विधेयक तर्जुमा गर्न सैद्धान्तिक स्वीकृति प्रदानका साथै कर्णाली प्रदेशको वातावरण संरक्षण सम्बन्धमा व्यवस्था गर्न बनेको विधेयकलाई प्रदेशसभामा पेश गर्न स्वीकृति प्रदान गर्ने निर्णय गरिएको मन्त्री केसीले जनाइन्।
उनका अनुसार भौतिक पूर्वाधार विकास मन्त्रालयको प्रस्तावमा कर्णाली प्रदेश पूर्वाधार विशेष कार्यक्रम सञ्चालन तथा व्यवस्थापन कार्यविधि २०७६ (प्रथम संशोधन) गर्ने, आर्थिक मामिला तथा योजना मन्त्रालयको प्रस्तावमा आर्थिक वर्ष २०७७/७८ मा समपूरक तथा विशेष अनुदानबाट सञ्चालन गर्ने योजना तथा कार्यक्रम स्वीकृत गर्ने निर्णय गरिएको छ। मूलतः आगामी वर्षबाट समपूरक तथा विशेष अनुदानबाट सञ्चालित योजनालाई प्रदेश सरकारले प्राथमिकताका साथ अघि बढाउने योजना निर्माण गरेको छ।
त्यसैगरी बैठकले कर्णाली प्रदेशमा कार्यरत कर्मचारीलाई प्रोत्साहन भत्ता उपलब्ध गराउने, पचालझरना गाउँपालिका–५ कालीकोट बस्ने मृतक खेलाडी समिपुरा वडेको बुबा रङ्गे नेपालीलाई आर्थिक सहयोग रकम एक लाख उपलब्ध गराउने निर्णय गरेको जनाइएको छ।
प्रदेश पर्यटन बोर्ड गठन
कर्णाली प्रदेश सरकारले यसअघि लिएको नीतिसँगै प्रदेश पर्यटन बोर्ड पनि गठन गरेको गरेको छ । गठित बोर्डमा कर्णालीका दशवटै जिल्लाबाट प्रतिनिधित्व हुने गरी कर्णाली सरकारको मन्त्रिपरिषद् बैठकले ११ सदस्यलाई नियुक्त गरेको छ। जसमा बबिकिशोर गुरुङ (डोल्पा), ललितजङ्ग महत (जुम्ला), दानसिंह कार्की (मुगु), वेदबहादुर शाही (जाजरकोट), मर्मजङ्ग बम (कालीकोट) र लैकु लामा (हुम्ला) रहेको मन्त्री केसीले बताइन् । बोर्डमा विष्णुप्रसाद शर्मा (दैलेख), पहलसिंह घर्ती मगर (रुकुम पश्चिम), लोकबहादुर हमाल (हुम्ला), चिन्तामणि शर्मा (सुर्खेत) र ईश्वरी बुढाथोकी (सल्यान) लाई सदस्यमा नियुक्ति गरिएको उनले बताइन् ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।