काठमाडौं– नक्कली भ्याट बिलमार्फत् राजस्व ठगी गरेको आरोपमा मुद्दा खेपिरहेका भाटभटेनी डिपार्टमेन्टल स्टोर्ससहित ४ कम्पनीविरुद्धको मुद्दाकाे आइतबार पेशी तोकिएको छ।
गत आइबार सुनुवाइ भएको मुद्दा हेर्दाहेर्दै आजका लागि तोकिएको थियो। यो मुद्दा फैसलाका लागि अन्तिम सुनुवाइ हुँदै फैसलातर्फ अघि बढेको छ। आइतबार पक्षका कानुन व्यवसायीले बहस सक्दै सरकारी पक्षले आफ्नो कुरा राख्ने छन्।
प्रधानन्यायाधीश चोलेन्द्र शमशेर राणाले उक्त मुद्दा आफूसहित न्यायाधीश प्रकाशकुमार ढुङ्गानाको इजलाशमा हेर्दाहेर्दै राखेर सुनुवाइ गर्दै आएका छन्। पक्षतर्फका २ जना कानुन व्यवसायीले मात्र बहस गर्न बाँकी रहेकाले आज सुनुवाइ सक्ने मनसायमा इजलाश रहेको छ।
भदौ ३० गतेदेखि अन्तिम सुनुवाइ सुरु भएको यो मुद्दा यसअघि पनि ‘हेर्दाहेर्दै’मा थियो। हेर्दाहेर्दै रहेको मुद्दाको आइतबार (आज) तेस्रो पेशी हो। यसअघि कार्तिक १ गते उक्त मुद्दाको सुनुवाइ भएको थियो।
पक्षको बहस समाप्त भएपछि सरकारी पक्षले आफ्नो दाबी ठहर हुनुपर्ने जिकिर पेश गर्नेछ। सरकारी पक्षको बहसपछि भाटभटेनीसहितका व्यवसायीका कानुन व्यवसायीले पुनः प्रतिरक्षा बहस गर्नेछन्। दुवै पक्षको जवाफी बहसपछि अदालतले उक्त विवादमा निर्णय सुनाउने छ। व्यवसायीका तर्फबाट धेरै संख्यामा कानुन व्यवसायी भएकाले मुद्दा लम्बिदै आएको छ।
२०७० सालदेखि यो मुद्दा सर्वोच्चमा घुमिरहेको छ। सरकारी पक्षले फाइल पेशनगर्ने र कानुन व्यवसायीहरुले पटक-पटक पेशी सारिराख्ने हुदाँ यो मुद्दा ६ वर्षदेखि सर्वोच्चमा विचाराधिन भएको हो। यही आर्थिक वर्षदेखि मात्र यो मुद्दाले सुनुवाइमा निरन्तरता पाउन थालेको हो।
यसअघि गत बैशाख १७ मा सर्वोच्चले फाइल मगाउने आदेश गरेको थियो। सर्वोच्च अदालतमा पुनरावेदन भएको दुई वर्षपछि अन्तिम सुनुवाइ चलिरहेको मुद्दामा पक्षका कानुन व्यवसायीहरुको मागपछि फेरि फाइल मगाउने भन्दै लम्बिएको थियो।
नक्कली भ्याट बिल निर्माण गरेको भनि आरोप लगाइएको तर अनुसन्धानको फाइल कुनै पनि अदालतमा पेश नगरेको भन्दै उक्त फाइल पेश नभएसम्म फैसला गर्न नमिल्ने जिकिर कानुन व्यवसायीले लिएका थिए। व्यवसायीका वकिलहरुको उक्त तर्कपछि प्रधानन्यायाधीश राणासहितको इजलाशले आन्तरिक राजस्व कार्यालयसँग सुरुको अनुसन्धान फाइल र अन्य विवरण पेश गर्न आदेश गरेको थियो।
उक्त आदेशपछि राजस्व विभाग आफैंले फाइल र अन्य विवरण सर्वोच्चमा पेश गरेको थियो। लगत्तै प्रधानन्यायाधीश राणासहितको इजलाशले भदौ ३० गतेदेखि उक्त मुद्दाको सुनुवाइ न्यायाधीश प्रकाशकुमार ढुङ्गानाको इजलाशबाट थालनी भएको थिए।
६ वर्षअघि छानबिन भएको नक्कली भ्याट बिल प्रकरणमा भाटभटेनीसहित ४ आरोपीविरुद्धको मुद्दा आन्तरिक राजस्व विभागको प्रशासनिक पुनरावलोकन, राजस्व न्यायाधीकरण हुँदै सर्वोच्चसम्म पुगेको थियो।
यसबीचमा नक्कली भ्याट बिलमा मुछिएका व्यापारीहरुले कानुनी छिद्र खोज्दै चलेखल गर्ने प्रयास गर्दै आएका छन्। सुरुमा उनीहरुले मुद्दालाई पेशीमा चढाउन रोक्न खोजेका थिए। तर, लामो समय अदालतमा विचाराधीन भएकाले उनीहरु त्यसमा सफल हुन नसकेपछि मिसिल खोज्ने नयाँ रणनीति अख्तियार गरेका थिए।
२०६९ सालमा ७ अर्ब रुपैयाँ बराबर भ्याट छलीमा परेका करिब ३ सय कम्पनीले नक्कली भ्याट बिलमार्फत् राजस्व ठगेको खुलासा भएको थियो। त्यसपछि आरोपित व्यापारी र कम्पनीहरु सर्वोच्च अदालत पुगेका थिए। सर्वोच्च अदालतमा भाटभटेनी डिपार्टमेन्टल स्टोर्स, अरुण इन्टरकन्टिनेन्टल, शंकर अक्सिजन ग्यास प्रालि र महेश बानियाँविरुद्धको मुद्दा विचाराधीन छ।
भाटभटेनीले ३७ वटाभन्दा धेरै फर्महरुबाट नक्कली बिल खरिद गरेको राजस्व विभागको अनुसन्धानमा पाइएको थियो भने चौधरी ग्रुपको अरुण इन्टरकन्टिनेन्टलले पनि दुई दर्जन फर्मबाट नक्कली बिल खरिद गरेको भेटिएको थियो।
नक्कली भ्याट बिल प्रकरणमा राजस्व न्यायाधीकरणले उनीहरुलाई दोषी ठहर गरे पनि उनीहरु त्यसविरुद्ध सर्वोच्च पुगेका थिए। आजदेखि सुरु हुने मुद्दाको अन्तिम सुनुवाइमा व्यापारी पक्षका कानुन व्यवसायीको संख्या धेरै भएकाले केही हप्ता सुनुवाइ चल्ने निश्चित छ।
व्यापारीहरुले नक्कली बिलमार्फत् छलेको राजस्वको न्यून मूल्यमात्र धरौटीमा राखेर मुद्दा लडिरहेकाले सके आफ्नो पक्षमा फैसला गराउने नसके पेशी सार्दै जाने रणनीति सुरुदेखि नै अख्तियार गर्दै आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
