अझै चुप लागेनन् दिलीपहरू

फिचर

काठमाडौं- आवाजको शक्ति भयंकर हुन्छ, यति भयंकर कि सुन्न नचाहानेहरु त्यसलाई दबाउन जे पनि गरिदिन्छन्। ज्यानैसमेत लिइदिन्छन्। तर एउटा आवाज दबाएर, आवाज निकाल्ने एउटा शरीर मारेर त्यो बन्द हुँदैन। इतिहास साक्षी छ, त्यो झन् चर्को सुनिन्छ। थप बेगसँग।

मिथिला नगरपालिका-५ श्रीपुरका २४ वर्षका ओमप्रकाश महतो (दिलीप)को आवाज निकालेकै कारण हत्या भयो। गिट्टी बालुवाको अवैध उत्खनन् र तस्करीले गाउँमा जोखिम बढीरहेको बुझेका दिलीपले त्यसको निरन्तर विरोध गरिरहेका थिए। ‘विरोध गरिरहे जिउमै टिपर कुदाइदिने’ धम्की क्रसर मालिकले यथार्थ बनाइदिए। एउटा आवाज बन्द भयो।

उनै दिलीपलाई श्रद्धाञ्जली दिन शनिबार बेलुका माइतीघर मण्डलमा केही युवा जम्मा भए। उनीहरुले आवाज निकाले। सुन्न नचाहिएको आवाज। दिलीपको हत्याको विरोध गरे। न्यायको माग गरे। चित्त नबुझेको सरकारी शैलीलाई व्यंग्य गर्दै झकझकाउन खोजे।

साँझको सिरेठोले माइतीघरलाई चिस्याइरहेको थियो। एक-दुई गर्दै झण्डै एक सय जनाजति युवा जम्मा भए। हातमा मैनबत्ती र केही प्लेकार्डसहित दिलीपको श्रद्धाञ्जलीमा सहभागी भए। हरेक दिनजसो केही न केही विरोधको स्वर सुनिरहेको माइतीघरले यसपटक हुनुनपर्ने कामको विरोध गरेर ज्यान गुमाएका दिलीपको आवाज सुन्यो।

‘म दिलीप हुँ, म बोलिरहेको छु। हामी सबै दिलीप हौँ नि, होइन त साथीहरू?’ मैनबत्ती बालेर दिलीपको श्रद्धाञ्जलीमा सहभागी एक युवक बोले। अरुले उसैगरी समर्थन गरे- ‘हो हामी सबै दिलीप हौँ, हामी बोल्छौँ अब मार हामीलाई।’

उनीहरुले नेपाली कथानक चलचित्र बलिदानमा रामेश श्रेष्ठ र ओम श्रेष्ठको स्वरमा रहेको ‘कोही त भने जहाजमा हरर, कोही त भने पसिना तरर हाम्रो नेपालमा’ गीतको शैलीमा अन्यायविरुद्ध व्यंग्य गीत गाए।

‘दिलीपको हत्यालाई बिर्सनौँ, उखान टुक्के राष्ट्रवाद मान्दैनौँ’, ‘क्रसर मालिक सरकारको मतियार टिपर भयो सरकारको हतियार’ जस्ता नारा लगाउँदै माइतीघरमा उनीहरुले सरकारको पनि विरोध गरे।

शुक्रबार टिपरबाट किचेर भएको हत्यामा संलग्न रहेको आरोपमा प्रहरीले शनिबार चारजनालाई पक्राउ गरेको छ। पिडित परिवारले बिहान जिल्ला प्रहरी कार्यालय धनुषामा किटानी जाहेरी दर्ता गराए लगत्तै प्रहरी सक्रिय भएको हो। दिलीपका लागि सामाजिक सञ्जालदेखि माइतीघरसम्म आवाज उठिरहे पनि उनकी आमाको अझै होस् खुलेको छैन।

श्रद्धाञ्जली सभाका केही तस्वीर