काठमाडौं- स्पेनिस सुपर कपको सेमिफाइनलमा बिहीबार राति बार्सिलोना एथ्लेटिको मड्रिडसँग ३–२ ले पराजित भयो। त्यसअघि बुधबार राति पहिलो सेमिफाइनलमा रियल मड्रिडले भ्यालेन्सियालाई ३–१ ले हरायो।
आइतबार राति रियल मड्रिड र एथ्लेटिको मड्रिडले साउदी अरबमा रहेको ६२ हजार दर्शक क्षमताको ‘किङ अब्दुलाह स्पोर्टस् सिटी’को मैदानमा फाइनल खेल्नेछन्। रोचक के भने, यसै वर्षदेखि फेरिएको सुपर कपको शैलीले प्रतियोगितामा स्थान बनाएका रियल र एथ्लेटिकोले फाइनलका हकदार टिमलाई नै हराइदिए।
सन् १९८२ देखि स्पेनिस सुपर कपको नियम र शैली गएको वर्षसम्म एउटै नै थियो। ला लिगाको विजेता टिम र कोपा डेल रेको विजेता टिमले ‘होम एण्ड अवे’को आधारमा दुई खेल खेल्थे।
केही वर्षअघिसम्म ला लिगा र कोपा डेलरेको विजेता टिम एउटै भएमा सिधै सुपर कपको उपाधि दिइन्थ्यो। पछिल्ला केही वर्षमा भने ला लिगा विजेता र कोपा डेल रे विजेता एउटै टिम भएमा कोपाको उपविजेताले ला लिगा विजेतासँग सुपर कप खेल्थे। यसैले गएको वर्षको शैलीमा नै सुपर कप भएको भए बार्सिलोना र भ्यालेन्सियाबीच मात्रै प्रतिस्पर्धा हुन्थ्यो।
२०१९ को फेब्रुअरीमा भने दुई टिमले खेल्ने तालिकाबाट सुपर कपको शैली फेरियो र चार टिमले प्रतिस्पर्धा गर्ने बनाइयो। जसमा ला लिगाको विजेता र उपविजेता साथै कोपा डेल रे को विजेता र उपविजेताले सेमिफाइनल खेल्ने तालिका बनाइयो। यसैले अहिले साउदी अरबमा चार टिम खेलेका हुन्। यसअघि अगस्टमा गरिने प्रतियोगिता यसै वर्षदेखि जनवरीमा गर्न थालिएको हो।
.jpg)
बार्सिलोना गएको सिजन ला लिगाको विजेताका रुपमा, एथ्लेटिको मड्रिड ला लिगाको उपविजेताको रुपमा र भ्यालेन्सिया कोपा डेलरेको उपविजेताका रुपमा सुपर कपमा छन्। कोपा डेल रेको उपविजेता पनि बार्सिलोना नै भएकाले सुपर कपमा चौथो टिम ला लिगामा तेस्रो स्थानमा रहेको रियल मड्रिड रहेको छ।
हामीले साह्रै नराम्रा गल्ती गरेका हौँ- मेस्सी
बिहीबार रातिको सेमिफाइनल खेलमा एथ्लेटिको मड्रिडसँग ३–२ ले पराजित भएपछि बार्सिलोनाका कप्तान लियोनल मेस्सीले आफूहरुले नराम्रा गल्तीहरु गरेको बताए।
‘हामीले जस्तो खेल खेल्नुपर्ने हो अहिले त्यस्तो खेल भइरहेको छैन। यो कुरा हामीलाई पनि थाहा छ। अब सुधार गरेर बढ्नै पर्छ’ मेस्सीले खेलपछि भने।
बार्सिलोनाको हारमा धेरैले प्रशिक्षक एर्नेस्टो भालभर्देलाई दोष दिने भए पनि मेस्सीले सबै एक भएर बढ्नुपर्ने धारणा राखे।
.jpg)
‘अब खेल हारिन्छ र लक्ष्यअनुसार काम हुँदैन तब मानिसहरुले कुरा त गर्छन् नै। हामीले अहिले नै सबैभन्दा बढी सामूहिक भएर अगाडि बढ्नुपर्ने आवश्यकता छ। र राम्रो गर्ने प्रयास पनि गरिरहेका छौँ’ उनले भने।
खेलमा ७३ प्रतिशत समय बलमा नियन्त्रण बनाए पनि बार्सिलोनाले गोलमा भने सोचेजस्तो बढ्न सकेन। खेलभर डिफेन्सिभ देखिएको एथ्लेटिको मड्रिडले दुई गोल काउन्टर अट्याकमा गरेको थियो। भने एक गोल काउन्टर अट्याकमा नै बढ्दा बार्सिलोनाका गोलकिपरले फोउल गरेपछि पाएको पेनाल्टीमा गरेको थियो।
एथ्लेटिकोका लागि ४६ औँ मिनेटमा कोकेले गोल गर्दै अग्रता बनाएका थिए। त्यसपछि ५१ औँ मिनेटमा बार्सिलोनाका लागि मेस्सीले बराबरी गोल गरे। ६२ औँ मिनेटमा एन्टोनी ग्रिजम्यानको गोलबाट अग्रता बनाए पनि बार्सिलोनाले त्यसपछि दुई गोल खान पुग्यो।
८१ औँ मिनेटमा अल्भारो मोराटले पेनाल्टीमार्फत एथ्लेटिकोका लागि बराबरी गोल गरे। यस्तै ८६ औँ मिनेटमा एन्जेल कोरेराको गोलमार्फत एथ्लेटिकोले बार्सिलोनालाई हरायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
