काठमाडौं- त्रिभुवन आर्मी क्लब सुनसरीको इनरुवामा जारी मनमोहन कप एकदिवसीय राष्ट्रिय क्रिकेट प्रतियोगिताको सेमिफाइनलमा प्रवेश गरेको छ।
इनरुवा क्रिकेट मैदानमा सम्पन्न खेलमा समूह ‘ए’ को खेलमा एमएमसिसी इनरुवालाई १० विकेटले पराजित गर्दै आर्मी समूह विजेता हुँदै सेमिफाइनलमा पुगेको हो।
इनरुवाले दिएको ५७ रनको झिनो लक्ष्य आर्मीले विना विकेट ५ ओभरमै पूरा गरेको हो।
आर्मीका ओपनर कुशल मल्लले अविजित ३५ तथा हरि कृष्ण झाले २० रन बनाए।
मल्लले १९ बलमा ५ चौका र २ छक्का तथा झाले ११ बलमा २ चौका र १ छक्का प्रहार गरे।
सुशानले लिए ७ विकेट
यसअघि टस जितेर ब्याटिङ गरेको एमएमसिसी इनरुवाले १९.३ ओभरमा ५६ रन बनाउँदा सबै विकेट गुमाएको थियो।
इनरुवाको लागि ओपनर सुशान्त तिमिल्सिनाले १५ तथा सोनु मण्डलले १३ रन बनाए पनि अन्य खेलाडीले दोहोरो अंक समेत बनाउन सकेनन्।
आर्मीका लागि बलिङतर्फ सुशान भारीले ७ विकेट लिए। उनले ८.३ ओभर बलिङ गर्दै ३ मेडन ओभरसहित १६ रन खर्चेर ७ विकेट लिए।
७ विकेट लिने क्रममा सुशानले ह्याट्रिक विकेट समेत लिए। ह्याट्रिक पूरा गर्ने क्रममा उनले आफ्नो आठौं ओभरको दोस्रो, तेश्रो र चौथो बलमा क्रमशः विकेट लिएका थिए। यो क्रममा उनले सुशान्त तिमिल्सिना, अल्फाज मन्सुरी र सरोज बस्नेतलाई आउट गरे।
त्यस्तै, आर्मीका हरि बहादुर चौहानले २ तथा शाहब आलमले १ विकेट लिए।
प्रतियोगिता अन्तर्गत बुधबार समुह ‘बि’ मा रहेको नेपाल पुलिस क्लबले कर्णाली प्रदेशसँग प्रतिस्पर्धा गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768372708.png)
-1768370071.png)
-1764146706.png)
-1768288990.png)
