जनकपुर- राष्ट्रिय सभा सदस्यको माघ ९ गते हुने निर्वाचनका लागि प्रदेश २ मा पनि विभिन्न दलका उम्मेदवारले मनोनयनपत्र दर्ता गराएका छन्। प्रदेश २ मा रिक्त ४ सीटका लागि ८ जना उम्मेदवारले नारा जुलुससहित मनोनयन पत्र दर्ता गराएका हुन्।
दलहरूको पछिल्लो सहमतिअनुसार राष्ट्रिय जनता पार्टी नेपाल तथा नेपाल कम्युनिष्ट पार्टी (नेकपा) का तर्फबाट ४ उम्मेदवारले मनोयन पत्र दर्ता गराएका हुन्। त्यसैगरी कांग्रेस र समाजवादी पार्टीका तर्फबाट पनि संयुक्त रुपमा ती सिटहरुमा मनोयन दर्ता गराएका छन्। नेकपाका तर्फबाट महिलातर्फ तुलसा दाहाल र दलिततर्फ राधेश्याम पासवान तथा राजपाका तर्फबाट अन्य पुरुष समूह ९खुल्ला० मा मृगेन्द्रसिंह यादव र अल्पंख्यक वा अपांगताबाट शेखर सिंहले मनोनयनपत्र दर्ता गराएका हुन्।
त्यसैगरी कांग्रेसबाट महिलातर्फ नगिना यादव, अपांगता वा अल्पसंख्यकतर्फ भोला पजियार र समाजवादीबाट दलिततर्फ रामप्रित पासवान र अन्य पुरुष समूह (खुल्ला) तर्फ अनिरुद्ध सिंहले मनोनयन दर्ता गराएका छन्। यीमध्ये रामप्रित पासवान यसअघि सदस्य रहिसकेका छन् भने बाँकी सबै नयाँ हुन्। उनलाई यसपटक पनि निरन्तरता दिइएको छ।
उम्मेदवारी दर्ता गराउनुअघि नेकपा र राजपा तथा कांग्रेस र समाजवादी दुई समूहमा विभाजित भई सयौं कार्यकर्तासहित नगरपरिक्रमा गर्दै निर्वाचन आयोगको कार्यालय पुगेका थिए । निर्वाचन कार्यालयले मनोयन पत्र दर्ताका लागि नेकपा र राजपालाई दिउंसो १ बजेदेखि र कांग्रेस तथा समाजवादीलाई २ बजेपछिको समय दिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
