काठमाडौं- रियल मड्रिडका प्रशिक्षक जिनेदिने जिदानले नयाँ वर्षमा क्लबले उपाधि जित्ने या नजित्ने भन्दा मेहनतमा विश्वास गरेर अगाडि बढ्ने बताएका छन्। उनले प्रयास नगर्नु असफलता भए पनि प्रयास गर्दागर्दै नहुनुलाई असफलता भन्न नमिल्ने बताएका हुन्।
सन् २०२० मा रियल मड्रिडले पहिलो खेलमा ला लिगा अन्तर्गत गेटाफेविरुद्ध शनिबार राति पौने ९ बजे खेल्दैछ। नयाँ वर्षमा पहिलो खेल खेल्नुअघि नै रियल मड्रिडलाई लिएर बढेको आशमा जिदानले आफ्नो धारणा राखेका हुन्।
‘असफलता प्रयास नगर्नु हो, आफूले सक्ने जति मेहनत नगर्नु हो। त्यसैले हामी यो वर्ष पनि आफूले सक्ने जति शतप्रतिशत मेहनत गर्नेछौँ, बाँकी कुरा हेरौँ के हुन्छ’ उनले भने।
‘एउटा टिमले लिग जित्ला, एउटा टिमले च्याम्पियन्स लिग नै जित्ला, त्यसो भए के बाँकी सबै टिम बेकार हो त? मलाई त त्यस्तो लाग्दैन’ उनले अघि भने।
त्यसमा च्याम्पियन्स लिग र ला लिगा उपाधिमा एउटा छान्नुपर्दा भन्ने प्रश्नमा प्रशिक्षक जिदानले एकीन जवाफ दिएनन्। ‘हामीलाई थाहा छ उपाधिका लागि सजिलो हुँदैन। च्याम्पियन्स लिगमा बलियो टिमहरुसँग खेल्न सहज छैन, लिगमा खेलहरु धेरै हुने हुँदा सबैमा केन्द्रित भएर अगाडि बढ्नु पनि सजिलो होइन’ उनले भने।
२०२० मा रियल मड्रिडले जित्न मिल्ने पहिलो उपाधि सुपरकोपा हो। जसमा मड्रिडले आउने बिहीबार सेमिफाइनलमा भ्यालेन्सियाविरुद्ध खेल्दैछ। शुक्रबार दोस्रो सेमिफाइनल बार्सिलोना र एथ्लेटिको मड्रिडबीच हुनेछ। घाइते रहेका स्टार खेलाडी इडन हजार्डबिना रियललाई सहज भने छैन।
‘सुपरकोपामा हजार्ड हुने छैनन्, उनलाई हतार गरेर खेलाउनु पनि हुँदैन। उनी सहज रुपमा ठीक भएपछि मैदानमा प्रभावकारी रुपमा देखिनेछन् भन्ने विश्वासमा छौं’ जिदानले भने।
जनवरीमा नयाँ खेलाडी क्बल भित्र्याउने योजनामा पनि जिदान स्पष्ट देखिएनन्। ‘म टिममा रहेका खेलाडीहरुमा विचार गरेर अगाडि बढीरहेको छु। जहाँसम्म पोउल पोग्वाको कुरा आइरहेको छ, उनी अहिले अर्कै टिमका खेलाडी हुन् र उनी पनि पूर्ण फिट छैनन्’ उनले भने।
क्लबमा ल्याउने नयाँ खेलाडीका सम्भावनासँगै बाहिर सक्ने खेलाडीका विषयमा पनि जिदानले खुलेर बताएनन्। मारियानो डाएज, ब्राहिम र इस्कोलाई बाहिर पठाउने विषयमा उनले त्यस्तो केही कुरा नभएको बताए।
‘मलाई त्यस्तो लाग्दैन। महत्वपूर्ण कुरा के हो भने, हरेक खेलाडीसँग व्यक्तिगत रुपमा नै कुराकानी गरेर अगाडि बढ्नुपर्छ, कसैले खेल्ने समय नै पाएको छैन भने त्यो उनीहरुको लागि समस्याको कुरा पक्कै पनि हो। हरेक खेलाडी राम्ररी अभ्यास गरेर खेल्न नै चाहन्छन्’ जिदानले भने।
जिदानको रियल मड्रिड प्रशिक्षण समय यो दोस्रो पटक हो। २०१७–१८ को सिजन लगातार तीन च्याम्पियन्स लिगको उपाधि उचालेपछि प्रशिक्षक जिदानले रियल मड्रिडबाट राजीनामा दिएका थिए। आफूले खेलाडीका रुपमा र प्रशिक्षकका रुपमा कमाएको सफलता
गुमाउन नचाहेर त्यसबेला राजीनामा दिएका जिदान गएको सिजनको अन्त्यमा वर्षकै तेस्रो प्रशिक्षकका रुपमा मड्रिड फर्किएका थिए। उनलाई जारी सिजनको सुरुदेखि नयाँ भूमिका देख्ने अपेक्षा मड्रिड व्यवस्थापनको थियो।
ला लिगामा अहिलेसम्म १८ खेल खेलेको मड्रिड १० मा जित, ७ बराबरी र १ हारसहित ३७ अंक बनाएर दोस्रो स्थानमा छ। पहिलो स्थानमा रहेको बार्सिलोनाको १८ खेलमा १२ जित, ३ बराबरी र ३ हारसहित ३९ अंक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
