काठमाडौं– नेपाली कांग्रेसका नेता गगन थापाले सूचना प्रविधिसम्बन्धी विधेयक संवैधानिक हकविरुद्ध रहेको बताएका छन्।
आइतबार बसेको प्रतिनिधिसभाको विकास तथा प्रविधि समितिले बहुमतले पारित गरेपछि विधेयकका बारेमा धारणा राख्दै नेता थापाले उक्त कुरा बताएका हुन्।
सोमबार फेसबुक तथा ट्वीटरमार्फत् धारणा राख्दै उनले यो विधेयकले नागरिकका मौलिक अधिकार खोसिएको बताए। ‘यो विधेयक यही रुपमा संसदबाट पारित भए यसले हाम्रो संवैधानिक र आधारभूत अधिकारलाई अपहरित गर्छ,’ उनले भने। उनले विधेयकबारे आफूले राखेका संशोधनलाई समेत समितिले ग्रहण नगरेको उल्लेख गर्दै संसोधनका बाबजूद अंक गणितका आधारमा विधेयक पारित गराइएको बताए।
‘संविधानले विचार र अभिव्यक्तिको स्वतन्त्रता दिएको छ, केही कुरामा प्रतिबन्ध छ, त्यसमध्ये गाली बेइज्जति गर्न पाइँदैन, यसबारे फौजदारी संहितामा परिभाषित गरिएको छ, यसलाई थप परिभाषित गर्ने भए संहितामै थप्नेबारे सरकारले सोच्न सक्थ्यो,’ उनले भने, ‘तर विधेयकले कुनै व्यक्तिलाई जिस्क्याउने, हतोत्साही गर्ने, हप्काउने कार्य गरेको ठहर भएमा उसलाई ५ वर्षको जेल सजायँ, १५ लाख जरिवाना वा दुवै सजायँ हुन सक्ने व्यवस्था गरिएको छ, सरकारविरुद्ध कसैले लेख्दा या कार्टुनमार्फत् धारणा व्यक्त गर्ने प्रयास गरिए प्रधानमन्त्रीलाई जिस्क्याएको मानिन सक्छ र ५ वर्षको जेल सजायँको भागीदार बनाउन सकिनेछ।’
तर कसले कसलाई जिस्काएको, होच्याएको भनेर निक्र्यौल गर्ने कार्य सरकारले बनाएको तीन सदस्यीय अदालतले गर्ने भएको नागरिकले के कुरा भन्न पाउने या नपाउने भन्ने कुराको निक्र्यौल कानुनले नभई सरकारले गर्ने भएकाले विधेयक संवैधानिक हकविरुद्ध रहेको उनले बताए।
थापाले विधेयक पारित भए के प्रकाशन गर्ने र के बोल्ने भन्ने कुरा सरकारले निर्धारण गर्ने पनि बताए।
‘के सोच्ने र के गर्ने भन्ने कुरामा नियन्त्रण हुँदैछ, कलाकार कुन रुपमा प्रस्तुत हुने भनेर सोच्नुपर्ने भएको छ, के प्रश्न गर्ने– के नगर्ने भन्ने निर्धारण यो विधेयकले गर्नेछ,’ उनले भने।
उनले विधेयक यही स्वरुपमा पारित नहोस् भन्नका लागि संसदमा लड्ने बताए। ‘संख्याले वैधानिकता दिन्छ, तर, वैधताको हक निर्धारण गर्न सक्दैन। ज्ञानेन्द्र शाहीको कालभन्दा पनि विधेयक कडा रुपमा आएको छ। कानुन नै सरकारले नागरिक हक खोस्ने गरि बनाउन लागेको छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749826086.png)
