काठमाडौं- गोकर्ण फरेस्ट रिसोर्टको लिज अवधि थप्ने निर्णय विवादमा परेपछि सरकारले काठमाडौं प्लाजालाई लिजमा दिन टेण्डर आव्हान गर्ने भएको छ। काठमाडौं प्लाजाको ३० वर्षे लिज अवधि सकिन लागेका कारण टेण्डरमार्फत् कम्पनी छनौट गर्ने भएको हो।
‘काठमाडौं प्लाजाको पनि समय थपका लागि अहिलेको कम्पनीसँगै आवेदन मागेका थियौं,’ शुक्रबार आयोजित पत्रकार सम्मेलनमा ट्रष्टका सचिव गजेन्द्र ठाकुरले भने, ‘तर, उक्त कम्पनीले मासिक ८ लाखमात्रै भाडा बुझाउन सक्ने गरी निवदेन दिएपछि टेन्डरबाट कम्पनी छनोट गर्ने निर्णय गरेका हौं।’
कार्यालयले अझै पनि पुरानो कम्पनीलाई एक पटक समय थपका लागि समय दिनसक्ने उनको भनाइ छ। कार्यालयले स्वतन्त्र कम्पनीमार्फत् गरेको मूल्यांकनमा मासिक ६० लाख भाडा आउने भनी प्रतिवेदन बुझाएपछि टेन्डरबाट कम्पनी छनोट गर्ने निर्णय सञ्चालक बोर्डबाट गरिएको ठाकुरको भनाइ छ।
‘सरकारलाई आर्थिक लाभ हुने गरी ट्रष्टको सम्पत्ति लिजमा नवीकरण तथा समय थपको निर्णय हुन्छ’, ठाकुरले भने, ‘ट्रष्टले राष्ट्रहितमै काम गर्छ, व्यक्ति तथा संस्थालाई फाइदा हुने गरी कुनै पनि काम गर्दैन र कानुनको उल्लंघन पनि गर्दैन।’
नेपाल ट्रष्टको काठमाडौं महानगरपालिका कमलादीस्थित ५ रोपनीभन्दा बढी जग्गामा बनेको ६ तले भवनमा अहिलेसम्म कन्सेप्ट डेभलपर्सले रजाइँ गरिरहेको छ। कन्सेप्टसँगको ३० वर्षे सम्झौता आउँदो असार अर्थात् २०७७ असार ३ गतेबाट सकिँदैछ। काठमाडौं प्लाजामा अहिले १ सयको हाराहारीमा विभिन्न कम्पनीहरुले कोठा भाडामा लिँदै व्यवसाय गर्दै आएका छन्। एउटै व्यवसायीसँग मासिक लाखौं भाडा असुल्ने प्रालिले भने नेपाल ट्रष्टको कार्यालयलाई भने वार्षिक ७५ लाख रुपैयाँमात्रै भाडा तिरिरहेको छ।
यो जग्गा तत्कालीन दरबारले २०५० असार ३ गते २७ वर्षका लागि लिजमा उपलब्ध गराएको थियो। तर, राजदरबारले कति भाडा लिन्थ्यो भन्ने कुरा नखुले पनि पुनः सम्झौता पछि भने नेपाल ट्रष्टको कार्यालयले पाउँदै आएको भाडा अति नै न्यून छ। २०६६ पुस ९ गते नेपाल ट्रष्ट र कन्सेप्ट डेभलपर्स प्रालिबीच पुनः लिज सम्झौता भएको थियो। तत्कालीन माधवकुमार नेपाल नेतृत्वको सरकारले नै काठमाडौं प्लाजाको भाडा पुनरावलोकन गरेको थियो।
उक्त समयमा नै सेटिङका आधारमा उक्त भवनको भाडा बाँकी १० वर्षका लागि निर्धारण भएको थियो। उक्त समयमा उक्त जग्गाको भाडा २०६६ असार ३ गतेबाट २०७२ असार २ गतेसम्मको वार्षिक ६१ लाख रुपैयाँ र २०७२ असार ३ गतेबाट सम्झौता अवधि बाँकी रहने समयसम्मका लागि वार्षिक ७५ लाख रुपैयाँमात्रै तोकिएको छ।
सरकारले गोकर्ण फरेस्ट रिसोर्टको ३० वर्षे लिज सम्झौता सकिनु साढे ५ वर्षअघि नै २५ वर्ष समय थप गर्ने निर्णय गरेको थियो। उक्त निर्णयको चौतर्फी विरोध भइरहेको छ। यहीकारण सरकारले नेपाल ट्रष्टकै अर्को सम्पत्ति काठमाडौं प्लाजाको समय थपको निर्णय टेण्डरबाट गर्न लागेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
