काठमाडौं- व्यवसायिक शिक्षा तथा तालिम अभिवृद्धि परियोजना (इभेन्ट-दोस्रो)ले करिब ११ हजार प्रशिक्षार्थीलाई प्राविधिक तथा व्यसायिक तालिम प्रदान गर्ने भएको छ। तालिमका लागि सबै प्रशिक्षार्थी छनोट गरिसकिएको समेत इभेन्टले जानकारी दिएको छ। आइतबार बुद्धनगरस्थित परियोजना कार्यालयमा पत्रकार सम्मेलन आयोजना गरी इभेन्टले १० हजार ९ सय ४१ जनाका लागि यस्तो तालिम संचालन गर्न लागिएको जानकारी गराएको हो।
काठमाडौं उपत्यकाका ५८ वटा संस्थामार्फत् ३४ वटा विभिन्न पेसागत विषयमा तालिम दिन लागिएको परियोजना निर्देशक चन्द्रकान्त भुसालले जानकारी दिए। भौचरमा आधारित तालिमका लागि छनोट भएका सहभागीहरूलाई परियोजनाले भौचर उपलब्ध गराउने र सहभाभगीले सो भौचर उपत्यकका ३ जिल्लाका तालिम प्रदायक संस्थामा बुझाई तालिम लिन पाउने व्यवस्था गरिएको छ। १६ देखि ४० वर्ष उमेरका बेरोजगार युवालाई लक्षित गरी तालिम दिन लागिएको यो परियोजनामा २६ हजार ३ सय ५९ आवेदन परेका थिए। तीमध्ये १० हजार ९ सय ४१ जनालाई छनोट गरिएको हो।
'छनोट भएका प्रशिक्षार्थीलाई सोमबार र मंगलबार आयोजना गरिने मेलामा भौचर उपलब्ध गराईने छ,' परियोजना निर्देशक भुसालले भने, 'सो भौचर तालिम प्रदायक संस्थामा पेस गरेपछि सो संस्थाले कम्तीमा ३ महिनाको तालिम प्रशिक्षार्थीलाई प्रदान गर्नेछ।' सो मेलामा छनोट भएका संस्था र प्रशिक्षार्थीलाई एकै ठाउँमा भेला गराएर अन्तर्क्रिया गराइने छ। यसले प्रशिक्षार्थीलाई रुचिको विषय छान्न सजिलो हुने अपेक्षा गरिएको उनको भनाइ छ।
परियोजनाले हरेक वर्ष मेला आयोजना गरेर सम्बन्धित संस्थालाई प्रशिक्षार्थीमार्फत् भौचर उपलब्ध गराउने लक्ष्य लिएको छ। छनोट भएका सहभागीलाई भौचर लिनका लागि खबर गरिसकिएको र सहभागीहरुलाई बजारको आवश्यकता र मागलगायतका विषयमा परामर्श समेत दिईने परियोजनाका उपनिर्देशक प्रमोदकुमार शर्माले बताए।
तालिम संचालन हुने ३४ विषयहरू
विभिन्न विधि पार गरेर तालिम दिने संस्थाहरु छनोट गरिने र प्रशिक्षार्थी छनोटका लागि पनि छुट्टै विधि निर्माण गरिएको परियोजनाले जानकारी दिएको छ। प्राविधिक सिप र ज्ञानसहितको शिक्षा प्राप्त गरेपछि मात्रै व्यक्तिले आयआर्जन गर्न सक्ने भएकाले त्यस तर्फ परियोजनाको यो भेला उपयोगी र प्रभावकारी हुने उपनिर्देशक सुदर्शन मरहठ्ठाले अपेक्षा गरे।
छनोट भएका उम्मेदवारलाई ३ सय ९० घन्टा (३ महिना)को तालिम प्रदान गरिने छ। सुविधाहीन समूहका दलित लोपोन्मुख, अतिसीमान्तकृत, तथा गरिबलाई प्राथमिकतामा राखी तालिम दिने र उनीहरुलाई रोजगारी पाउन सहयोग पुर्याउने लक्ष्य परियोजनाले लिएको छ।
प्राविधिक शिक्षाको विस्तार र व्यवसायिक तालिम कार्यक्रमलाई सुदृढ गर्ने उदेश्यसहित विश्व बैंकको ऋण सहयोगमा शिक्षा मन्त्रालय अन्तर्गत सञ्चालन हुने गरी सन् २०११ बाट परियोजना सुरु भएको हो। सन् २०१५ मा पहिलो चरण सकिएको उक्त योजनाको दोश्रो चरण सन् २०२२ सम्म सञ्चालन हुनेछ। ७ हजार ५ सय युवा लाभान्वित हुने लक्ष्य परियोजनाले राखेको भएपनि लक्ष्यभन्दा बढी प्रशिक्षार्थी छनोट भएका हुन्। तथ्यांकशास्त्रीय विधिका आधारमा ७ हजार ५ सय नै प्रशिक्षार्थी छनोट गर्न असहज भएकाले १० हजार ९ सय ४१ लाई छनोट गरिएको हो।
नतिजामा आधारित र भौचरमा आधारित गरी परियोजनाले दुई प्रकारका तालिम प्रदान गर्दै आएको छ। परियोजनाले औद्योगिक प्रशिक्षण र कार्यस्थलमामा आधारित तालिम पनि दिदैं आएको छ। छात्रवृत्ति, गुणस्तर सुधार अनुदान, रोजगारी पदस्थापन जस्ता क्षेत्रमा पनि परियोजनाले काम गर्दै आएको छ।
परियोजनाले सुविधा विहिन अति सिमान्तकृत, अपाङ्गता भएकालाई समेत समेटेर समावेशी तरिकाबाट प्राविधिक शिक्षा र व्यावसायिक तालिमको पहुँच वृद्धि गर्ने लक्ष्य लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770957149.png)
-1764146706.png)
-1770562345.jpg)
