गाईघाट- उदयपुरमा बिहीबार भारतीय नम्बर प्लेटको जिप दुर्घटना हुँदा ३ जनाको मृत्यु भएको छ। उदयपुरगढी गाउँपालिका- ३ तामडाँडामा भएको दुर्घटनामा ५ जना घाइते छन्।
उदयपुरगढीबाट कटारी जाँदै गरेको एसके०१पिबी ३०६८ नम्बरको जिप दुर्घटना हुँदा उदयपुरगढी गाउँपालिका- ३ का ५० वर्षीय ढकबहादुर स्माली मगर, ३६ वर्षीय मीननारायण श्रेष्ठ र ६० वर्षीय टिकनारायण श्रेष्ठको घटनास्थल मै मृत्यु भएको छ।
बाक्लो हुस्सुका कारण जिप सडकबाट दुई सय मिटर तल खसेको थियो। दुर्घटनामा परी ५ जना घाइते भएको र २ जनाको अवस्था गम्भीर रहेको वडा नं ३ का अध्यक्ष मनोज कार्कीले बताए।
उनीहरुलाई थप उपचारका लागि विराटनगर पठाइएको छ। भारतको सिक्किमबाट आएको र उतैबाट आएकाहरु आफन्त भेटघाट गरेर फर्किने क्रममा रहेकाले घाइतेको पहिचान नखुलेको वडाध्यक्ष कार्कीले जानकारी दिए।
मृतक भने मजदुरीका लागि पोखरा जान उक्त जिपमा लिफ्ट मागेर चढेको वडा नम्बर २ का अध्यक्ष इन्द्र राउतले बताए।
घटनास्थल उदयपुर सदरमुकाम गाईघाटदेखि ७० किलोमिटरको दूरीमा रहेको जिल्ला प्रहरी कार्यालय उदयपुरका एसपी वीरबहादुर बुढामगरले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
