काठमाडौं- महानगरीय प्रहरी वृत कीर्तिपुरले चोरीका ९ वटा मोटरसाइकलसहित ११ जनालाई पक्राउ गरेको छ।
वृत कीर्तिपुरले विभिन्न स्थान र मितिमा चोरीका मोटरसाइकलसहित चोरीमा संलग्नलाई पक्राउ गरिएको जनाएको छ।
पक्राउ पर्नेमा चितवनको भरतपुर महानगरपालिका-२४ नयाँबस्ती घर भई कीर्तिपुर नगरपालिका-२ मैत्रिनगर बस्ने २४ वर्षीय मदन तामाङ, चितवनको भरतपुर महानगरपालिका-२४ बुद्दन घर भई काठमाडौं खसीबजार बस्ने २५ वर्षीय सोम सुनार, मकवानपुरको बाग्मति गाउँपालिका-३ घर भई ललितपुर बस्ने २२ वर्षीय सन्देश गोले छन्।
उनीहरुले नागार्जुन नगरपालिका-४ बाफलबाट बा ८४ प ११४२ नम्बरको २२० सिसीको पल्सर मोटरसाइकल गत मंसिर १२ गते चोरी गरेका थिए।
त्यस्तै काठमाडौं चन्द्रागिरी नगरपालिका-४ थानकोट बस्ने तामाङलाई चोरीको मोटरसाइकलसहित पक्राउ गरिएको वृत कीर्तिपुरका प्रहरी निरीक्षक सुशील केसीले नेपाल लाइभलाई जानकारी दिए। तामाङले बा ८४ प १०३३ नम्बरको २२० सिसीको पल्सर, ज १७ प १५०६ नम्बरको २२० सिसीको पल्सर चोरी गरेको प्रहरीले जनाएको छ। प्रहरीले चोरी गरेको मोटरसाइकल समेत बरामद गरेको छ।
बा ९३ प ३८४३ नम्बरको मोटरसाइकल चोरी गरेका बर्दियाको ठाकुरबाबा नगरपालिका-७ घर भई बुढानिलकण्ठ बस्ने राजु पौडेललाई पनि प्रहरीले पक्राउ गरेको छ।
त्यसैगरी पक्राउ पर्ने अन्यमा सिन्धुलीको सुनकोशी गाउँपालिका-२ का २४ वर्षीय विक्रम भुजेल, काभ्रेको रोशी गाउँपालिकाका २५ वर्षीय इन्द्रबहादुर तामाङ, नवलपरासीको दुम्किबास नगरपालिका-९ घर भई सतुंगल काठमाडौं बस्ने २८ वर्षीय भरत थापा र चन्द्रागिरी नगरपालिका-८ मातातिर्थ बस्ने २२ वर्षीय रिक्जेन मोक्तान, चितवनको भरतपुर नगरपालिका घर भई गुर्जुधारा बस्ने २० वर्षीय सन्दीप गुरुङ र काभ्रेको रोशी गाउँपालिका-६ घर भई कीर्तिपुर मच्छेगाउँ बस्ने २९ वर्षीय गणेश लामा छन्।
उनीहरुले चोरी गरेका बा ६७ प ६३७१ नम्बरको २२० सिसीको मोटरसाइकल, बा ७५ प १७९४ नम्बरको २२० सिसीकै पल्सर, बा ९४ प ३६४५ नम्बरको पल्सर, बा ४३ प ८०७४ र बा ६६ प २३३८ नम्बरको मोटरसाइकल बरामद गरिएको निरीक्षक केसीले जानकारी दिए।
उनीहरुले गत कात्तिक २५ गते यी मोटरसाइकलहरु चोरी गरेका थिए। पक्राउ परेका उनीहरुलाई प्रहरीले चोरी केसमा मुद्दा दर्ता गरेर अनुसन्धान गरिरहेको छ।
उनीहरुले चोरी गरेका अधिकांश मोटरसाइकल २२० सिसीका पल्सर छन्। पार्किङ गरेर राखेका मोटरसाइकल कोही नभएको मौका छोपेर उनीहरुले चोरी गर्ने गरेका थिए। यसरी चोरी गरेका मोटरसाइकलहरु नम्बर प्लेट परिवर्तन गरेर सस्तो मूल्यमा बेच्ने गरेको पाइएको अनुसन्धानबाट खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
