काठमाडौं- प्रदेश २ मा भएको निर्वाचनको जारी मतगणनामा ढिलाइ भइरहेको ठहर गर्दै निर्वाचन आयोगले थप टोली परिचालन गरेको छ।
वीरगञ्ज महानगरपालिका र तीन उपमहानगरपालिकाको गणनालाई तीव्रता दिन निर्वाचन आयोगले केन्द्रबाट थप टोली पठाएको हो । आयोगले शुक्रबार ३० जनालाई गणनामा खटाएको हो।
टोली हाल वीरगञ्जमा रहेको र आवश्यकता अनुसार जनकपुर उपमहानगर, जितपुर सिमरा उपमहानगर र कलैया उपमहानगरमा खटाइने आयोगका प्रवक्ता नवराज ढकालले बताए।
वीरगञ्ज महानगरमा हालसम्म ३६ हजार मत गणना भएको छ । यस्तै, जनकपुर उपमहानगरपालिकाको २५ हजार ९ सय ८५ मत र जितपुर सिमरामा ५३ हजार ९ सय ८४ मत गणना भएको छ । कलैया उपमहानगरपालिकामा भने २० हजार ११ मत गणना भएको छ।
कुनै स्थानमा विवादमा भए ती टोली समाधानका लागि समेत परिचालन हुने आयोगले बताएको छ।
‘केही स्थानीय तहमा विवाद हुँदा गणनामा ढिलाइ भइरहेको छ । आयोगले पठाएको टोली विवाद समाधानमा पनि सक्रिय हुन्छ', प्रवक्ता ढकालले नेपाल लाइभसँग भने।
निर्वाचन आयोगले पाँच दिनभित्रमा प्रदेश २ का १ सय ३६ वटै स्थानीय तहको नतिजा सार्वजनिक गर्ने बताएको थियो । निर्वाचन सम्पन्न भएको चार दिनसम्म ७३ स्थानीय तहको नतिजा सार्वजनिक भएको छ।
महानगरपालिका र उपमहानगरपालिकाबाहेकका ठाउँको मतपरिणाम शनिबारसम्ममा सार्वजनिक हुने प्रवक्ता ढकालले दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
