तरकारी र फलफूलको विषादी परीक्षणका लागि नाकामै परीक्षण केन्द्र 

चीन, भारतका ११ नाकासँगै त्रिभुवन अन्तराष्ट्रिय विमानस्थलमा पनि उपकरण राखिने
नेपाल लाइभ | २०७६ मङ्सिर २५ बुधबार | Wednesday, December 11, 2019 १८:२०:०० मा प्रकाशित

काठमाडौं– भारत‚ चीन तथा त्रिभुवन अन्तराष्ट्रिय विमानस्थलमै तरकारी तथा फलफूलमा भएको विषादी परीक्षणका लागि आवश्यक उपकरण जडान गरिने भएको छ। 

भारत‚ चीनलगायत विभिन्न मुलुकबाट आयात हुने तरकारी तथा फलफूलको गुणस्तरीयता मापनका लागि सम्बन्धित नाका तथा विमानस्थलमा पनि आवश्यक उपकरण सहितको परीक्षण केन्द्र राखिने तयारी भइरहेको खाद्य प्रविधि तथा गुण नियन्त्रण विभागले जनाएको छ। 

भारत चीन तथा त्रिभुवन अन्तराष्ट्रिय विमानस्थलमा समेत परीक्षणका लागि आवश्यक यन्त्र जडान गरिने विभागका प्रवक्ता मोहनकृष्ण महर्जनले नेपाल लाइभलाई जानकारी दिए। 

‘भारतका ९ वटा नाका, चीनका २ सहित त्रिभुवन अन्तराष्ट्रिय विमान स्थल गरी १२ वटा विषादी परीक्षणका लागि आवश्यक उपकरण जडान गरिने तयारी गरिएको छ, उपकरण जडान गरेसँगै आयात तथा निर्यात गरिने फलफूल तथा तरकारीहरुको गुणस्तरीयता परीक्षणका लागि काठमाडौं धाउनु पर्ने बाध्यताको अन्त्य हुन्छ।’ प्रवक्ता महर्जनले भने। 

विभागका अनुसार महेन्द्रनगर, धनगढी, नेपालगञ्ज, भैरहवा, कृष्णनगर, वीरगञ्ज, विराटनगर, काँकडभित्ता, जलेश्वरसहित ९ वटा नाकामा उपकरण जडान गरिने भएको छ। चीनका तातोपानी तथा रसुवा २ वटा नाकामा तथा त्रिभुवन अन्तराष्ट्रिय विमानस्थलमा उपकरण जडान गरिने भएको हो। 

उपकरण जडान भएसँगै आयात तथा निर्यात हुने तरकारी तथा फलफूलको गुणस्तर तथा विषादीको मात्रा परीक्षण गर्न सहज हुने भएको छ। 

यसअघि पनि तरकारी तथा फलफूलको विषादी परीक्षण सर्लाही, विर्तामोड, काठमाडौं, बुटवल, पोखरा, नेपालगञ्ज, र अत्तरियामा रहेका क्षेत्रीय खाद्य प्रविधि कार्यालयमार्फत गरिने भनिएको थियो। 

अवशेष द्रुत परीक्षण इकाई (प्रयोगशाला) मार्फत विषादी परीक्षण गर्न सकिने भए पनि ती कार्यालयहरुमा विषादी जाँच गर्ने पेस्टीसाइड एनलाइसिस प्रोमोटोग्राफी मेसिन तथा जनशक्तिको अभाव हुँदा समस्या निम्तिएको थियो। आवश्यक उपकरण र जनशक्ति नहुँदा कतिपय प्रयोगशालाहरु बन्दसमेत रहेका थिए। 

जसले गर्दा नाकामा तरकारी थन्काएर विषादी परीक्षणका लागि काठमाडौं कालिमाटी धाउनुपर्ने बाध्यता छ। जसले गर्दा गत असार २ गते राजपत्रमा सूचना प्रकाशित गरी भारतलगायत अन्य मुलुकबाट आयात हुने तरकारी तथा फलफूल विषादी रहित हुनुपर्ने निर्णय नै प्रभावित भएको छ। 

सरकारको यो निर्णयलाई प्रभावकारी रुपमा कार्यान्वयन गरी आयात तथा निर्यात हुने फलफूल तथा तरकारीलाई विषादीरहित बनाउन नाकामा विषादी परीक्षणका लागि आवश्यक उपकरण जडान गरिने भएको खाद्य प्रविधि तथा गुण नियन्त्रण विभागको भनाइ छ। 

गत जेठ १० गते मन्त्रिपरिषद्ले गरेको निर्णयअनुसार असार २ गते राजपत्रमा सूचना प्रकाशित गरी उद्योग वाणिज्य तथा आपूर्ति मन्त्रालयले भारत लगायतका मुलुकबाट आयात हुने क्याफिनयुक्त शक्तिवर्द्धक पेय पदार्थमा समेत पूर्ण रुपमा बन्देज लगाएको छ। भारतलगायतका मुलुकबाट आयात हुने ताजा तरकारी, फलफूल सम्बन्धित भन्सार बिन्दुमा क्यारेन्टाइन र जीवनाशक विषादीको अवशेष परीक्षण गरिनु पर्ने निर्णय गरेको छ। 

नेपालमा भारतको नाका हुँदै सबैभन्दा बढी तरकारी तथा फलफूल आयात हुने गरेको छ। 

स्याउ, सुन्तला, आँप, अंगुर, कटहर लगायतका फलफूल तथा प्याज,बन्दा गोलभेँडा, काउली, आलु लगायतका तरकारी निकै ठूलो परिमाणमा आयात हुने गरको छ। मानवीय जीवनमा दैनिक उपभोग्य यस्ता वस्तुहरु स्वच्छ तथा स्वस्थ हुनुपर्ने भन्दै परीक्षण गरी स्वस्थकर तरकारी तथा फलफूलमात्रै आयात गर्ने तयारी सरकारले गरेको हो।