चितवन- बजारमा बिक्रीका लागि ल्याइएका तरकारी र फलफूलमा रहेको विषादीको परीक्षण सुरु गरिएको छ। प्रदेश सरकार, भरतपुर महानगरपालिका, कृषि ज्ञान केन्द्र र महानगर फलफूल तथा तरकारी बजारको संयुक्त पहलमा प्रयोगशाला सञ्चालनमा आएको हो।
भरतपुर महानगरपालिका-२ मा कृषि प्रवर्द्धन बजार विकास प्रालिले सञ्चालन गरेको महानगर फलफूल तथा तरकारी बजारमा प्रयोगशाला स्थापना गरिएको हो। कृषि ज्ञान केन्द्र भरतपुरका प्रमुख राजन ढकालका अनुसार प्रयोगशालामा परीक्षण थालिएको छ। केही दिनमा औपचारिक उद्घाटन गरी नियमित परीक्षणसमेत गरिने उनले जानकारी दिए।
प्रयोगशालाले बजारमा आएका तरकारी र फलफूलका दैनिक आठ/दशवटा फरक-फरक ठाउँबाट नमूना लिएर परीक्षण गर्नेछ। एउटा परीक्षण गर्न आधा घण्टा हाराहारी लाग्ने गर्दछ। परीक्षण गर्दा खान अयोग्य देखिएमा बिक्री गर्न बन्देज लगाइनेछ।
ढकालका अनुसार यो विधिलाई ‘स्टेक्टोफोटो मिटर’ भनिन्छ। यसमा ३५ प्रतिशतभन्दा कम देखिएमा खानयोग्य हुन्छ भने ३५ देखि ४५ प्रतिशत भएमा केही समय राखेर मात्र प्रयोग गर्नुपर्ने हुन्छ र ४५ प्रतिशतभन्दा बढी भएमा अखाद्य मानिन्छ।
प्रारम्भिक रुपमा गरिएका परीक्षणमा बोडी र भेण्टामा बढी विषादी पाइएको उनले जानकारी दिए। प्रदेश सरकारको उपकरण, कृषि प्रवर्द्धन बजार विकास प्रालिको स्थान, भरतपुर महानगरपालिकाको स्थानको व्यवस्थापन एवं आवश्यक रसायनसँगै कृषि ज्ञान केन्द्र र महानगर मिलेर कर्मचारी व्यवस्थापन गरेका हुन्।
फलफूल तथा तरकारीको परीक्षण हुने भएकाले कम विषादी प्रयोग गर्न कृषकलाई भनिएको महानगर फलफूल तथा तरकारी बजारका प्रबन्ध निर्देशक थिरप्रसाद धितालले जानकारी दिए। उनका अनुसार बजारमा दैनिक १ सय ५० टन तरकारी र ५० टन हाराहारी फलफूल आउने गर्दछ। चीन र भारतबाट पनि बजारमा फलफूल र तरकारी आउने गर्छ। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
