एजेन्सी– भारतकाे उन्नावमा सामूहिक बलात्कारको सिकार भएकी युवतीको शुक्रबार मध्यरातमा दिल्लीको सफदरजङ्ग अस्पतालमा मृत्यु भयो। आगोमा जलेकी युवतीलाई बचाउने प्रयासमा उन्नावदेखि लखनउ हुँदै दिल्लीको सफदरजङ्ग अस्पतालसम्म पुर्याइयो। तर, उनलाई बचाउन सकिएन।
सामूहिक बलात्कारको सिकार भएको दुई दिनपछि उनले संसार छाडिन्। युवतीको मृत्युपछि गाउँ नै शोकमा डुब्याे। अर्कोतर्फ गाउँमै रहेका अभियुक्तका परिवार उनीहरु निर्दोष रहेको दाबी गर्दैछन्। गाउँमा जुन कुनै समयमा अशान्त हुन सक्ने शंकामा ठूलाे संख्यामा प्रहरी परिचालन गरिएको छ।
शुक्रबार सामूहिक बलात्कारको आरोप लागेका पाँच अभियुक्तलाई अदालत पेस गरिएको थियो। अदालतले थप अनुसन्धानका लागि १४ दिन थुनामा राख्ने अनुमति दिएको छ। पीडित युवतीलाई उपचारको सुरुवाती चरणमै प्रहरीले उन्नाव मजिस्ट्रेट कार्यालयमा केही घन्टामै बयान लिएको थियो। सोही बयानका आधारमा प्रहरीले पाँच जनालाई पक्राउ गरेको थियो।
मुद्दाको सुनुवाइमा अदालत जादाँ बाटोमा जलाइयो
उत्तर प्रदेश प्रहरीका अनुसार अदालतमा हुने सुनुवाइका क्रममा हिडेंकी पीडित युवतीलाई बीच बाटोमै जलाइएको थियो। प्रहरीले प्रारम्भिक अनुसन्धानमा यो कार्य सामूहिक बलात्कारको आरोप लगाएकै युवाहरुबाट भएको अनुमान गरेको थियो। युवतीकै कारण जेल बसेर फर्केका उनीहरुले बदलाको रुपमा यस्तो गरेको हुनसक्ने प्रहरीको प्रारम्भिक अनुमान थियो। तर, यसअघि पीडितलाई धम्की दिने गरेकाे कुनै सुराक भेटिएको छैन।
स्थानीय पत्रकार विशाल सिंहका अनुसार पीडित युवतीमाथि मार्च महिनामा सामूहिक बलात्कार भएको थियो। सोही प्रकरणमा अदालतमा हुने सुनुवाइका लागि उनी रायबरेली हिडेंकी थिइन्। स्टेशन जाँदा उनलाई पाँच जनाले बाटोमा छेकेर पेट्रोल हालेर जिउँदै जलाउने प्रयास गरेका थिए। उनको ९० प्रतिशत शरीर जलेको थियो। लगत्तै उनको उद्धार गरेर लखनउको सिभिल अस्पतालमा लगिएको थियो। त्यहाँ उपचार हुन नसकेपछि एयर एम्बुलेन्सबाट दिल्ली लगिएको थियो। दिल्लीमा हार्ट अट्याकबाट उनको मृत्यु भएको थियो।
पीडितको सुनसान घर
उक्त गाउँ उन्नाव सहरदेखि करिब ५० किमिको दूरीमा रहेको बिहार प्रहरी चौकीअन्तर्गत पर्दछ। यो गाउँभित्र प्रवेश गरेपछि केही मिनेटमै माटो, भुस र खरले बनेका कच्ची झुपडी सहजै देख्न सकिन्छ।
युवतीका अनपढ पिता घर बाहिर चुपचाप बसिरहेका छन्। उनलाई अहिले पनि यही कुराको पीर छ कि उक्त दिन किन स्टेशनमा उनी छोरीलाई छोड्न गएनन्। हरेक दिन उनी छोरीलाई स्टेशनसम्म पुर्याउन जाने गर्दथे। तर, आइतबार उनले छोरीलाई एक्लै स्टेशनसम्म जान दिएका थिए। उनी सधै आफ्नो साथ कोही न कोहीलाई लिएर हिड्ने गर्दथिन्। तर उक्त दिन उनी एक्लै स्टेशनसम्म पुगेकी थिइन्। पाँच बहिनी र दुई भाइमध्येकी उनी सबैभन्दा कान्छी हुन्।
प्रेम विवाह अनि सामूहिक बलत्कारको रिर्पोट
युवतीको छिमेककै एक युवकसँग चिनजान थियो। उनीहरु दुवैले आपसी सहमतीमा प्रेम विवाह पनि गरेका थिए। तर, विस्तारै उनीहरुकाे बीचमा खटपट भयो। युवतीले यही साल मार्चमा उक्त युवक र उसको साथीविरुद्ध सामूहिक बलात्कारको जाहेरी प्रहरी कार्यालयमा लेखाएकी थिइन्। त्यसै आधारमा पक्राउ परेकामध्ये मुख्य अभियुक्त थुनामा गएका थिए र केही दिनपछि धरौटीमा छुटेका थिए।
युवतीकी भाउजुले उनीहरुले कहिले विवाह गरेका थिए भन्नेबारे आफूलाई जानकारी नभएको बताइन्। ‘हामीलाई त विवाह गरेको तबमात्र थाहा भयो जब केटापक्षका मानिसहरु आएर हाम्रो घरमा झगडा गर्न थाले,’ पीडित युवतीकी भाउजुले भनिन्, ‘दुवै पक्षबीच मारपिट सुरु भएपछि उनीहरुले अदालतमा विवाद गरे र अहिले केटाले स्वीकार गर्न मानेनन्।’
अभियुक्तको घरको वातावरण
युवतीको घरदेखि करिब आधा किलोमिटर पर मुख्य अभियुक्त र यो प्रकरणमा पक्राउ परेका अन्य अभियुक्तको घर छ। जहाँ एक मन्दिरबाहिर केही महिला जम्मा भएका छन् र उनीहरु रोइरहेका छन्। यसरी रुनेमा पक्राउ परेका अभियुक्तसँग कुनै न कुनै रुपमा नाता पर्नेहरु देखिन्छन्। उनीहरुको भनाई छ सबैलाई षडयन्त्रपूर्वक फसाइएको छ।
‘मेरो छोराले न दुईवटा विहे गरेको थियो न त सामूहिक बलात्कारमा सहभागी नै थियो’ मुख्य अभियुक्तकी आमा भन्छिन्, ‘युवतीको परिवार र प्रहरीले यसमा षडयन्त्र गरेको हुनसक्छ।’ उनले आफ्नो छोरो सामूहिक बलात्कारको सिकार भएकी युवतीसँग एक महिनादेखि रायबरेलीमा बसेको कुरा पनि अस्वीकार गरिन्। यो प्रकरणमा संलग्न भएकाे आशंकामा प्रहरीले एकै परिवारका बाबुछोरालाई समेत पक्राउ गरेको छ।
एउटै बलात्कार प्रकरणमा बाबुछोरालाई नै समाएपछि प्रहरीले फसाएको परिवारको दाबी छ। ‘बिहान प्रहरी आयो मेरा पति र छोरालाई समाएर लग्यो,’ उनले भनिन्, 'पल्लो घरको अर्को युवालाई पनि पक्राउ गरेर लगियो।’ उनले सामूहिक बलात्कार गर्ने अभियुक्त घरमा आएर आरामसँग नसुत्ने भएकाले यो षडयन्त्र भएको दाबी गरिन्।
यही वर्ष मार्च महिनामा पीडित युवतीले सामूहिक बलात्कारको जाहेरीमा मुख्य अभियुक्तसँगै यी महिलाका छोराहरुलाई पनि आरोप लगाएकी थिइन्। तत्कालीन समयमा प्रहरीले मुख्य अभियुक्तलाई मात्र पक्राउ गरेको थियो। यो प्रकरणमा निष्पक्ष छानबिन नभएकाले केन्द्रीय अनुसन्धान ब्यूरोले छानबिन गर्नुपर्ने अभियुक्तको परिवारकाे माग छ।
अनुत्तरित कयौं प्रश्न
गाउँमा आम मानिसहरु यो प्रकरणलाई लिएर अनेकौ प्रश्न उठाइरहेका छन्। पक्राउ परेका कुनै पनि अभियुक्तविरुद्ध प्रहरीले हालसम्म कुनै पनि अभियोगमा मुद्दा दायर गरेको छैन। प्रहरीका अनुसार घटनालगत्तै मारिएको छापामा सबै अभियुक्त आ-आफ्नै घरमा फेला परेका थिए।
‘यी केटाहरुलाई हामी सानैदेखि जान्दछौ। अहिलेसम्म गाउँमा यस्तो घटना भएको थिएन,’ गाउँका एक वृद्ध सीताराम भन्छन्, ‘अचम्म लाग्छ यस्तो जघन्य अपराधमा उनीहरु संलग्न भएको भए कसरी चुपचाप बसे।’ आफूले यो उमेरसम्म गाउँमा यस्तो घटना नसुनेको र याे पहिलोपटक भएको उनको अनुभव छ। 'गाउँकै युवतीलाई सामूहिक बलात्कार र जिउँदै जलाउनेजस्तो ठूलो अपराध कसरी गाउँकै युवाले गर्न सके होलान्? म कल्पनै गर्न सक्दिनँ।’ उनले भने।
उन्नाव घटनामा सुरुदेखि नै धेरै प्रहरी अधिकारीहरु सीतारामको आशंकामा सहमत छन्। तर, आधिकारीक रुपमा उनीहरु केही बोल्न चाहदैन्। गाउँका मानिसहरु मिडियाले एकतर्फी रुपमा पीडितको परिवारलाई मात्र जोड दिएकोमा आपत्ती जनाएका छन्। प्रहरीले यो प्रकरणमा हरसम्भव अनुसन्धान र प्रमाण संकलनको कार्य भइरहेको बताएकाे छ। प्रहरीले छिटोभन्दा छिटो सत्य पत्ता लाग्ने दाबी गरिरहेको छ।
हाल प्रहरीले यो प्रकरणमा अनुसन्धान गरिरहेको छ। तर, सबै गाउँका हरेक व्यक्ति दुखी छन्। किनकि दुवैपक्ष आफ्नै मानिस थिए, जो अहिले पीडित र पीडकको रुपमा विभाजन भएर एक अर्काविरुद्ध निस्केका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
