पोखरा- १३औं साग भारोत्तोलन अन्तर्गत नेपालले तेस्रो दिन २ रजत र ४ कास्य पदक जितेको छ। योसँगै जारी भारोत्तोलनमा नेपालको पदक संख्या २ स्वर्ण, २ रजत र १० कास्य पुगेको छ।
पदक तालिकामा नेपाली महिला र पुरुष खेलाडीले समान स्वर्ण, समान रजत र समान कास्य जितेका हुन्। २० स्वर्णसहित ६० पदकका लागि भएको स्पर्धामा नेपालले अझै पुरुषतर्फ टु वेट क्याटागोरीमा अन्तिम दिन आइतबार खेल्दैछ।
पोखरामा शनिबार भएको प्रतियोगितामा नेपालकी अस्मिता राई (८७ प्लस) र विशालसिंह विष्ट (९६ केजी) तौल समूहमा रजत पदक जितेका हुन्।
पुरुष ९६ केजी तौल समूहमा बंगलादेशका खेलाडी जाइरुल इस्लामले स्वर्ण जिते। उनले स्न्याचतर्फ १२० र क्लीन एण्ड जर्कमा १४२ गरी कुल २६२ भार उठाउँदै स्वर्ण पदक जितेका हुन्।
रजत दिलाउने नेपाली खेलाडी विष्टले स्न्याचमा १०७ र क्लीन एण्ड जर्कमा १४० गरी कुल २४७ भार बहन गरे। १९ वर्षे विष्ट कञ्चनपुरका हुन्। चार वर्षदेखि भारोत्तोलन खेल्दै आएको बताउने उनले रजत दिलाउन सकेकोमा खुसी लागेको प्रतिक्रिया दिए।
यस्तै, भारोत्तोलनमा पहिलो सहभागिता जनाएको भुटानले उक्त इभेन्टमा पहिलो कास्य जित्न सफल भयो। उसका लागि किन्ले ग्याल्सेनले कास्य पदक जितेका हुन्। उनले स्न्याचमा ८० र क्लीन एण्ड जर्कमा ९० सहित कुल १ सय ७० केजी भार उठाउन सके।
शनिबार नै भएको महिला ८७ प्लस तौल समूहमा श्रीलंकन खेलाडी तिमाली हापुथेनाले स्वर्ण जितिन्। उनले स्न्याचमा ८० र क्लीन एण्ड जर्कमा १०० गरी कुल १८० तौल उठाइन्।
नेपालको तर्फबाट नेपाली सेनाकी अस्मिता राईले स्न्याचमा ६० र क्लीन एण्ड जर्कमा ६५ गरी कुल १२५ तौल भार बहन गर्दै रजत दिलाउन सफल भएकी हुन्।
उक्त इभेन्टमा पाकिस्तानकी फेरोज परविनले स्न्याचमा ५५ र क्लीन एण्ड जर्कमा ६० गरी कुल ११५ तौल उठाउँदै कास्य जितिन्।
यस्तै, महिला ८७ तौल समूहमा भारतले स्वर्ण, पाकिस्तानले रजत र नेपालले कास्य जित्यो । भारतकी अनुराधा पभुन्नराजले स्न्याचमा ९० र क्लीन एण्ड जर्कमा ११० गरी कुल २००, पाकिस्तानकी रब्बीया राजाकले ६३, ७८ र १४१ तथा नेपालकी मनकुमारी कुमालले ६०, ७६ गरी कुल १३६ तौल उठाउँदै क्रमशः स्वर्ण, रजत र कास्य जितेका हुन्। तनहुँकी कुमालले आठौं राष्टिय खेलकुदमा रजत जितेकी थिइन्।
पुरुष १०२ केजी तौल समूहमा नेपालका तर्फबाट सन्देश गुरुङले कास्य जिते। प्रतियोगितामा पाकिस्तानी खेलाडी उस्मान अम्जाद राठोरले स्वर्ण र बंगलादेशले रजत पदक जित्यो। पाकिस्तानी खेलाडीले स्न्याचमा १५० र क्लीन एण्ड जर्कमा १८० गरी कुल ३३० तौल उठाउँदै स्वर्ण जितेका हुन्।
बंगलादेशका इस्लामले स्न्याचमा १०८ र क्लीन एण्ड जर्कमा १४२ गरी कुल २५० भार बहन गरी रजत र नेपालका सन्देशले स्न्याचमा १०० र क्लीन एण्ड जर्कमा १३५ सहित कुल २३५ उठाउँदै कास्य पदक दिलाएका हुन्। चितवन निवासी सन्देश नेपाल प्रहरीमा आबद्ध छन्। उनी आठौं राष्टिय खेलकुद प्रतियोगिताका स्वर्णधारी हुन्।
शनिबार बिहान भएको खेलमा नेपालकी तारादेवी पुनले ७६ केजी तौल समूह र लक्ष्मी वनले ८१ केजी तौल समूहमा कास्य पदक जितेका छन्।
महिला ७६ केजी तौल समूहमा बंगलादेशकी माविया अख्तरले स्न्याचमा ८० र क्लीन एण्ड जर्कमा १०५ गरी कुल १८५ तौल उठाउँदै स्वर्ण जितिन्। त्यस्तै, श्रीलंकन खेलाडी बीसी प्रियन्थीले स्न्याचमा ८३ र क्लीन एण्ज जर्कमा १०१ गरी कुल १८४ किलो तौल बहन गरी देशलाई रजत पदक दिलाइन्। १२ औं सागमा समेत कास्य जितेकी नेपालकी तारादेवीले स्न्याचमा ७५ र क्लीन एण्ड जर्कमा ९७ गरी कुल १७२ तौल उठाएकी हुन्।
त्यस्तै, ७६ केजी तौल समूहमा भारतकी सृष्टि सिंहले स्न्याचमा ८२ र क्लीन एण्ड जर्कमा १०८ गरी कुल १९० भार गरी स्वर्ण र बंगलादेशकी जुहोरा खातोन नीशाले कुल १६८ किलो तौल उठाउँदै रजत जित्न सफल भइन्। उनले स्न्याचतर्फ ७३ र क्लीन एण्ड जर्कमा ९५ तौल उठाएकी हुन्। ३ देशमात्र सहभागी सो इभेन्टमा नेपाल प्रहरीमा आबद्ध लक्ष्मी वनले स्न्याचमा ६० र क्लीन एण्ड जर्कमा ८० गरी कुल १४० तौल उठाउँदै कास्य दिलाउन सफल भएकी हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
