रत्ननगर- चितवनमा स्थानीय निकायसँगको समन्वयमा बाढी, पहिरो लगायत विभिन्न घटनाबाट हुने क्षति रोक्न विपद् व्यवस्थापनको पूर्वतयारी सुरु भएको छ।
जिल्लाको पहाडी क्षेत्र पहिरोको जोखिममा रहेको र तल्लो क्षेत्रका विभिन्न ठाउँ बाढीको उच्च जोखिममा रहेकाले जोखिम घटाउन पूर्व तयारी थालिएको चितवनका प्रमुख जिल्ला अधिकारी तथा विपद् व्यवस्थापन समिति चितवनका संयोजक नारायणप्रसाद भट्टले बताए।
आइतबार विभिन्न राजनीतिक दलका प्रतिनिधि, व्यवसायी र स्थानीय तहका प्रमुखको सहभागितामा बसेको जिल्ला विपद् व्यवस्थापन समितिको बैठकले चितवनका विभिन्न क्षेत्रमा विपद् व्यवस्थापनको क्लष्टर निर्माण गर्ने निर्णय गरेको प्रजिअ भट्टले जानकारी दिए।
पूर्वी चितवन, भरतपुर र पश्चिम चितवनमा सम्भावित घटना रोक्न र भएका घटनाबाट क्षति न्यूनीकरणका लागि समन्वय गर्नेगरी तीन ठाउँमा क्लष्टर निर्माण गर्न लागिएको हो। चितवनको राप्ती नगरपालिकाकी प्रमुख प्रभा बरालले खोलानालामा आउने बाढीबाट बर्सेनि मानिसको मृत्यु हुने र धनजनको क्षति हुने गरेको भन्दै नदी नियन्त्रणका लागि ध्यानाकर्षण गराइन्।
गर्मीको समय बढिरहेकाले आगलागीका घटनासमेत बढ्ने भन्दै यसतर्फ समितिले ध्यानाकर्षण गराएको छ। बैठकले हरेक महिनामा विपद् समितिको बैठक बसी पूर्व तयारीका कार्यक्रमलाई प्रभावकारी बनाउने निर्णयसमेत गरेको छ।
बैठकमा नारायणगढ मुग्लिन सडकअन्तर्गत चितवनको जुगेडी र सिमलतालमा हुने विभिन्न दुर्घटनालाई ध्यानमा राखेर चार वटा स्टेचर, फोकस लाइट र ४०० मिटर डोरी आवश्यक रहेको भन्दै जिल्ला ट्राफिक प्रहरी कार्यालय चितवनका प्रमुख सन्तोष पन्तले प्रस्ताव पेश गरेका थिए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775885529.png)
-1764146706.png)
-1775575666.png)
