राजविराज– गत वर्षायामको बाढीका कारण प्रभावित सप्तरीवासीको घर मर्मत तथा न्यानो कपडा वितरणका लागि सरकारले उपलब्ध गराएको राहत रकम हालसम्म पनि वितरण भएको छैन।
१८ स्थानीय तहमध्ये वेल्ही चपेना गाउँपालिका बाहेक अधिकांश स्थानीय तहले घर मर्मत तथा न्यानो कपडा वापतको रुकम निकासा लिइसके पनि प्रभावित परिवारलाई वितरण गरिएको छैन।
तत्कालीन मन्त्रिपरिषदको निर्णय अनुसार घर मर्मतका लागि प्रतिपरिवार १५ हजार र न्यानो कपडा वितरणका लागि १० हजार गरी २५ हजारका दरले कुल १२ करोड ८६ लाख २५ हजार रकम उपलब्ध गराइएको छ।
सरकारले ८/९ महिनाअघि नै प्रतिपरिवार २५ हजार रुपैयाँ दिने निर्णय गरे पनि आफूहरुले हालसम्म नपाएको मैनाकडेरीका डम्बर रामले गुनासो गरे। रकम वितरण नहुँदा पीडितले घर मर्मत लगायतका आवश्यक काम गर्न नसकेको उनको गुनासो छ।
‘राहतको संवेदनशीलता नबुझ्दा बाढीपीडितले समस्या भोगिरहेका छन्’, रामले भन, ‘समस्या पर्दा काम चलाउन नपाएपछि त्यस्तो राहतको के काम?’
राजविराज नगरपालिकाका मेयर शम्भुप्रसाद यादवले प्रमुख प्रशासकीय अधिकृतको सरुवा भएका कारण काम अगाडि बढ्न नसकेको बताए। केही प्राविधिक समस्या समेत रहेको भन्दै यादवले प्रशासकीय अधिकृत सोमबार कार्यालयमा हाजिर हुनासाथ राहत वितरणलाई पहिलो प्राथमिकतामा राखेर काम गरिने बताए।
कञ्चनरुप नगरपालिकाका मेयर वसन्त मिश्रले भने कतिपय स्थानमा पीडितको संख्यामा विवाद देखिएका कारण रकम वितरण जटिल भएको बताएका छन्। कतै–कतै वास्तविक पीडितको नाम छुटेको, एकै परिवारका २÷३ जनासम्मको नाम भेटिएको र एउटै नाम धेरै परिवारसँग मेल खाएको र छुट्याउने आधार नभएकाले विवाद समाधान नगरी रकम वितरण गर्न नसकिएको उनको भनाइ छ।
जिल्ला प्रशासन कार्यालय सप्तरीले पनि अधिकांश स्थानीय तहले रकम निकासा लिएर वितरण नगरेको जनाएको छ। प्रमुख जिल्ला अधिकारी भागीरथ पाण्डेको अध्यक्षतामा फागुन २२ गते बसेको विपद् व्यवस्थापन समितिको बैठकले तत्काल राहत रकम वितरण गरी भर्पाई पेश गर्न निर्देशन समेत जारी गरेको छ।
सप्तरीमा गएको वर्षायामको बाढीका कारण ५ जनाले ज्यान गुमाएका थिए भने ३१ हजार १ सय ७० घरपरिवार प्रभावित भएका थिए। क्षतिको मूल्यांकन डेढ अर्ब रुपैयाँभन्दा बढी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
