काठमाडौं- यही मंसिर १४ गते ५२ पदका लागि भएको उपनिर्वाचनमा नेकपाले एक प्रतिनिधिसभा सदस्य, एक प्रदेशसभा र तीन गाउँपालिका अध्यक्षसहित ३० स्थानमा जित हात पारेको छ। नेपाली कांग्रेस एक प्रदेशसभा सदस्य र धरान उपमहानगरपालिकाको मेयरसहित १३ स्थानमा विजयी भएको छ। समाजवादी पार्टीले ४ र राजपाले ३ वडाध्यक्ष जितेका छन्।
तर आफूलाई वैकल्पिक शक्तिका रुपमा स्थापित गर्न लागिपरेका विवेकशील नेपाली दल, साझा पार्टीलगायतको मत भने अघिल्लो निर्वाचनमा भन्दा पनि खुम्चिएको छ। उपनिर्वाचनको मत पुरानै निरन्तरता भएको र आफूहरुले सोचेभन्दा पनि मतदाताले कम मत दिएको विवेकशील नेपाली दलका अध्यक्ष मिलन पाण्डे बताउछन् ।
‘नेपाल लाइभको समय संवाद’मा कुरा गर्दै अध्यक्ष पाण्डेले वैकल्पिक शक्तिलाई मतदाताले स्पष्ट सन्देश दिएको बताए। ‘तिमीहरुले अहिले जति गरिरहेका छौ, त्यतिले पुगेन। अझ खारिएर आऊ। स्पष्ट एजेण्डा लिएर आऊ, हाम्रो मन जित्ने एजेण्डा लिएर आऊ भन्ने सन्देश दिएका छन्,’ पाण्डेले भने, ‘यसको हामी गम्भीर समीक्षा गर्छौं । यसका लागि हामीले समीक्षा बैठक पनि बोलाइसकेका छौं । हामीमा के कमजोरी रह्यो । आत्मसमीक्षा गर्छौं ।’
उनले निर्वाचन आयोगको मापदण्डअनुसार नै विवेकशील उपनिर्वाचनमा होमिएको बताए ।
‘विवेकशीलले संस्कारको राजनीति गर्न खोजेको हो। निर्वाचन आयोगको आचार संहिताविपरित एउटा काम पनि गरेनौं। मासु भात खुवाएका छैनौं । कार्यकर्तालाई हजार रुपैयाँ भत्ता बाडेका छैनौं । हामीले लिएर गएको संस्कार हो,’ पाण्डे भन्छन् ।
उनले कास्कीमा विवेकशीलले ७७ मत मात्र पाए पनि हेर्दा थोरै सुनिने तर त्यति नै संख्यालाई संस्कार बुझाउन सकेको दाबी गरे। उनले त्यहाँ एक किसिमको बिउ छरेर आएको र त्यसलाई फैलाउन आवश्यक भएको बताए ।
लोकतन्त्रको आधार मत नै भएकाले धेरै सुधार र परिमार्जन हुन जरुरी रहेको र त्यसका लागि पार्टी तयार रहेको विवेकशीलको निष्कर्ष छ । प्रस्तुत छ, उपनिर्वाचनको पछिल्लो परिणामलाई लिएर विवकशील नेपाली दलका अध्यक्ष पाण्डेसँग पुष्पा केसीले गरेको विस्तृत कुराकानीः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
