राजविराज– नेपाली कांग्रेसका नेता डा शेखर कोइरालाले राष्ट्रपतीय प्रणाली मार्फत मुलुकलाई साम्यवादमा धकेल्ने अभ्यास सुरु भएको बताएका छन्।
केपी ओली नेतृत्वको सरकार गठनअघि र पछिका अभिव्यक्ति र क्रियाकलापहरुले देशमा राष्ट्रपतीय प्रणाली लागू गर्ने प्रयास भइरहेको आशंका बढेको उनले बताए।
‘माओवादी विलीन भएर एउटै कम्युनिस्ट पार्टी बन्दै छ, त्यसमा प्रचण्ड राष्ट्रपतीय पक्षधर हुन्’, कोइरालाले भने, ‘अब मधेसी मोर्चा पनि सरकारमा जाँदैछ, त्यसमा उपेन्द्र यादव पनि राष्ट्रपतीय पक्षधर भएपछि कतै देशमा राष्ट्रपतीय प्रणालीको कसरत त भइरहेको छैन?’
दुई तिहाइको सरकार बनाउन भइरहेको प्रयास तथा प्रतिनिधि र प्रदेशसभा निर्वाचन अगाडि एमाले अध्यक्ष ओलीले दिएको अभिव्यक्तिले आफूलाई शंका उत्पन्न भएको उनले बताए। उनले भने, ‘संसदीय व्यवस्था निर्विकल्प होइन भनेर केपी ओलीले बोलेका कुरा र अहिलेका गतिविधि संयोग मात्रै होइनन्।’
राष्ट्रपतिका असंवैधानिक कदम बढ्दै जानु र प्रधानमन्त्रीले शक्ति सञ्चयको अभ्यास सुरु गर्नुले पनि देशमा एकदलीय निरंकुश शासनको सुरुवातका लक्षणहरु देखिन थालेको उनको तर्क छ।
‘प्रधानमन्त्रीलाई अविशिष्ट अधिकार दिने तयारी हुँदै छ’, उनले थपे, ‘शक्ति सन्तुलनको आधारमा अघि नबढे देशमा एकतन्त्रीय शासन चल्छ, त्यसले भलो गर्दैन।’
राष्ट्रको सुरक्षा व्यवस्थालाई सुदृढ बनाउने जिम्मेवारीमा रहेको राष्ट्रिय अनुसन्धान विभाग, राजस्व चुहावट र आर्थिक अपराध नियन्त्रण गर्ने जिम्मेवारीमा रहेको राजस्व अनुसन्धान विभाग र कालोधन छानबिन गर्ने प्रमुख जिम्मेवारीमा रहेको सम्पत्ति शुद्धीकरण विभागलाई प्रधानमन्त्री कार्यालय मातहत ल्याउने निर्णय शक्ति सञ्चयको एउटा कदम भएको उनको तर्क छ।
समग्रमा मुलुक अराजकतातर्फ उन्मुख भएको कोइरालाको जिकिर छ। उनले देशमा भ्रष्टाचार बढेको र अर्थतन्त्र थला परेको बताए।
‘प्रधानमन्त्री एकातर्फ भ्रष्टाचार हुन दिन्नँ भन्छन्, अर्कोतर्फ कालोधनलाई सेतो बनाउने मौका दिनुपर्छ पनि भन्छन्’, कोइरालाले व्यंग्य गर्दै भने, ‘राष्ट्र बैंकले नाजायज भनेर रोकेको अजय सुमार्गीको अर्बौं रकमलाई ओलीले अब कसरी सेतो बनाउँछन्, त्यो चाहिँ हेर्न बाँकी छ।’
उनले न्यायालयको पछिल्लो क्रियापकलापले निरन्तरता पाउँदै गए प्रजातन्त्र धरापमा पर्ने पनि बताए। देशको चौथो अंगको रुपमा रहेको प्रेसमाथि अंकुश लगाउन खोज्नु गलत भएको उनले तर्क गरे। ‘प्रजातन्त्रको स्थायित्वका लागि प्रेस स्वतन्त्रता महत्वपूर्ण छ’, उनले भने, ‘छिनोफानो गर्ने अर्को निकाय हुँदाहुँदै प्रेसमाथि न्यायपालिकाले हस्तक्षेप गर्नु गलत हो।’
पार्टीको सांगठनिक कामका लागि राजविराज आएका कोइरालाले प्रतिनिधि र प्रदेशसभा चुनावमा मधेसी गठबन्धनसँग तालमेल गरेर कांग्रेसले गल्ती गरेको बताए। पद पाउनेबित्तिकै मधेसी गठबन्धन सरकारमा जान तयार भएको भन्दै उनले त्यस्ता नेतालाई जिताउन कांग्रेसले आफ्नो उम्मेदवारी फिर्ता लिनु ठूलो भूल भएको बताए।
सप्तरीमा संघीय समाजवादी फोरमका अध्यक्ष उपेन्द्र यादवलाई जिताउन कांग्रेसले क्षेत्र नम्बर २ बाट सकलदेव सुतिहारको उम्मेदवारी फिर्ता लिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
