काठमाडौं- व्यक्तिगत र समूहतर्फ गरी दोहोरो स्वर्ण पदक जितेका मण्डेकाजी श्रेष्ठले २० वर्षपछि दोहोरो स्वर्ण जित्न पाउँदा धेरै खुसी लागेको बताएका छन्। व्यक्तिगत र समूहमा कराँतेको कातातर्फ स्वर्ण जितेपछि प्रतिक्रिया दिँदै उनले विगतका सम्पूर्ण दु:ख भुलेकाे बताए।
दु:खलाई भुलेर खेल्दा २० वर्षपछि स्वर्ण जित्न सफल भएको उनले बताए। कराँतेमा भारत नआएर सहज भएको हो? भन्ने प्रश्नमा उनले त्यसलाई अस्वीकार गर्दै नेपालको प्रतिस्पर्धी श्रीलंका र पाकिस्तान भएको बताए।
यसअघि बंगलादेशमा भएको खेलमा पनि भारतलाई हराएर स्वर्ण पदक जितेकाे सम्झँदै उनले नेपाली कोचहरु सक्षम भएका कारण तीन स्वर्ण कराँतेमा जित्न सफल भएको बताए।
सन्यास कहिले लिने? भन्ने प्रश्नमा मन्डेकाजीले यसबारे अहिले नसोचेको बताए। आठौं सागपछि आफूले दोहोरो स्वर्ण जित्न सफल भएकोमा खुसी लागेको बताए।
११औं सागमा छनाेट भएको तर त्यसमा राम्रो प्रदर्शन गर्न नपाएको कुराबाट शिक्षा लिँदै आफू यहाँसम्म आइपुगेको उनले बताए। ‘थाइल्याण्ड र बैंककमा तालिम गरेका थियौं। त्यो बेला जुन घटना भयो त्यसलाई बिर्सेर निरन्तरता दिएका कारण यो सफलता हात पारेको हुँ,’ उनले भने ‘मलाई परिवारले पूर्णसाथ दिएको छ। सधै मलाई बुबाले तिमी खेलमा ध्यान देऊ भन्नु हुन्थ्यो। यो प्रेरणाले आजको सफलता दिलाएको हो।’
नेपालले कातामा चार स्वर्ण जित्नु पर्नेमा तीन मात्र आएको तर यसमै खुसी हुनुपर्ने उनको भनाइ थियो। दक्षिण एसियाली खेलमा एकै संस्करणमा २ स्वर्ण जित्ने पहिलो नेपाली खेलाडी हुन्। उनले आइतबार सातदोबाटेस्थित कराँते हलमा व्यक्तिगत काता र टिम कातामा नेपाललाई २ स्वर्ण दिलाएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
