काठमाडौं- १३औं दक्षिण एसियाली खेलकुद (साग) प्रतियोगिताको उद्घाटन दशरथ रंगशलामा भव्य रुपमा भयो। राष्ट्रपति विद्यादेवि भण्डारीले गरेको उद्घाटनमा विभिन्न साँस्कृतिक कार्यक्रमले दक्षिण एसियाली राष्ट्रलाई नै जोड्यो।
१३औं साग औपचारिक रुपमा भव्यताका साग सुरु भए पनि आइतबार (मंसिर १५) गते नै कतै भने कामको चटारो थियो। सागकै लागि भनेर निर्माण भएको हिटिङ स्वीमिङ पुलले भने अझै पूर्णता पाएको छैन। रंगशालामा तामझामको साथमा सुरु गर्दै गर्दा सागकै लागि भनेर निर्माण गरिएका अन्य भौतिक संरचनाले भने गिज्याइरहेको भान भने हुन्छ।
यसको ज्वलन्त उदाहरण हो हिटिङ स्वीमिङ पुल र पोखरा रंगशाला। यी दुई खेल स्थल जसो तसो सागका लागि झारो टार्ने किसिमले मात्रै निर्माण भए। अन्तिम समयमा दिइएको तिब्रताले दिगो त हुने छैन नै अर्कोतर्फ कम गुणस्तरमा खेल्दा खेलाडीलाई समेत चोट लाग्ने सम्भावना प्रवल रहन्छ।
आइतबार दिउँसो सातदोबाटोस्थित हिटिङ स्वीमिङ पुलमा पुग्दा निर्माण अझै धमाधम भइरहेका थिए। कुनै कामदार रङरोगनमा ब्यस्त थिए भने कोही पौडी पोखरीको वरिपरि टायल हाल्दै थिए। हिटिङ स्वीमिङ पुलमा पानी हालिएको छ। तर यो परिक्षणको लागि हो। पानी चुवाहट भएन भने राम्रै हो तर पानी नै अडिएन भने फेरि निर्माण गुर्न पर्ने बाध्यता रहन्छ। यस्तो अवस्थामा के गर्ने?
जसोतसो निर्माण सम्पन्न भए पनि अत्याधुनिक प्रविधियुक्त स्वीमिङ पुल निर्माण गर्नु पर्ने भएको कारण अन्य धेरै प्राविधिक पक्ष जडान गर्न बाँकी नै छ।
उद्घाटन भन्दा पनि तीन दिन अघि नै भलिबल खेल सुरु भयो। स्वीमिङ खेल भने बिहीबारदेखि सुरु हुनेछ। केही ढिलो गरि सुरु हुने स्वीमिङ खेलले निर्माण कम्पनीलाई केही राहत त दिएको छ। तर समयमै नसक्नुले यसको सन्देश राम्रो भने गएको छैन।
त्यसो त, किरातेश्वर कन्ट्रक्सन एन्ड ड्रिलिङ कम्पनी प्रालीका प्रबन्ध निर्देशक सनकसिंह राईले १० गते नै स्वीमिङ पुलमा पानी हालेर देखाउने दाबी गरेका थिए। उनको त्यो दाबी पनि पाँच दिनपर धकेलियो।
सागको स्वीमिङ यहिँ नै खेलाउनु पर्ने बाध्यता भएको कारणले मात्रै टालटुले काम गरिएको हो।
पछिल्लो ठेक्का सम्झौताअनुसार कात्तिक १५ मा निर्माण सम्पन्न गर्नु पर्ने थियो। समयमै काम सक्छौँ भनेर ठेकेदार कम्पनीले दाबी पनि गरेको थियो।
१८ महिनामा सक्ने गरी किरातेश्वर कन्ट्रक्सन एन्ड ड्रिलिङ कम्पनी प्रालीले २०७४ मा निर्माण थाल्यो। सम्झौताअनुसार गएको वैशाखमा नै हिटिङ स्वीमिङ पुल निर्माण सक्नु पर्ने थियो। तर सकिएन। तीन महिनाको समय थप गरेर असार मसान्तसम्म सक्ने सम्झौता भयो फेरि काम नसकिएपछि तीन महिनाको समय थप गरेर कात्तिक १५ मा सक्नु पर्ने थियो। तर ठेकेदार र सरकारको ढिलासुस्तीका कारण खेल सुरु हुने बेलासम्म पनि स्वीमिङ पुल तयार गर्न गाह्रो छ।
हिटिङ स्वीमिङ पुल त्यस्तो प्रविधियुक्त स्वीमिङ पुल हो जहाँ जुनसुकै मौसममा पनि प्रतियोगिता आयोजना गर्न र खेल्न सकिनेछ। निर्माण भइरहेको हिटिङ स्वीमिङ पुल सट कोर्स हो। अर्थात २५ बाई २५ मिटरको स्वीमिङ पुल निर्माण गर्न लागिएको हो।
अन्तर्राष्ट्रिय मान्यताअनुसार स्वीमिङमा पानीको तापक्रम २५ देखि २७ डिग्री हुनु पर्छ। यो भन्दा बढी या घटी हुनु हुँदैन। तर अहिलेसम्म प्रविधिहरु जडान गरिसकिएको छैन। खेल्ने बेला खेलाडीका तापक्रममै समस्या आए के गर्ने ? तर ठेकेदार कम्पनी भने यस्तो कुरामा कुनै समस्या नआउने दाबी गर्छ।
त्यसो त, स्वीमिङ पुल कै मात्रै समस्या होइन। पोखरा रंगशालाको अवस्था भने झनै नाजुक छ। जहाँ महिला फुटबल र आर्चरी खेल हुँदैछन्। पोखरा रंगशाला निर्माण सम्पन्न गर्न त निकै समय लाग्छ नै तर उद्घाटनको दिनसम्म पनि धेरै काम बाँकी नै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791090469.jpeg)
-1786602170.png)
