काठमाडौं- सागमा पदकको आश गरिएको पुरुष भलिबल खेलमा अन्ततः नेपाल एक खेल पनि नजिती समूह चरणबाटै बाहिरिएको छ। दर्शकको राम्रो उपस्थिति र मैदानको साथ पाएर पनि नेपालको केही सिप लागेन।
नेपाल र भारतबीचको खेलमा सधैँ राष्ट्रिय भावना जाग्छ। त्यो मैदानको खेल मात्रै रहँदैन। हरेक दर्शकको मनमा अनौठो बदलाको भावना जागिदिन्छ। तर, पराजय सधैँ नेपालकै पोल्टामा।
शुक्रबार त्रिपुरेश्वरस्थित कभर्डहलमा १३औं दक्षिण एसियाली खेलकुद (साग) को पुरुष भलिबलमा नेपाल र भारतबीच प्रतिस्पर्धा हुँदै गर्दा त्यही राष्ट्रिय भावना देखियो। तर खेल भने भारतले जित्यो। झण्डै १५ सय दर्शक पुनः स्तब्ध भए।
बिहीबार नेपाली राष्ट्रिय महिला टिम भारतसँगै पराजित भएको क्षणभन्दा दुःखद माहोल दर्शकमा छायो। भारतसँगको हारपछि पनि महिला टिम सेमिफाइनल पुगिसकेको छ। भारतसँगको हारपछि पुरुष टिम भने समूह चरणबाटै बाहिरियो।
पहिलो सेट २५–१५ ले गुमाएको नेपालले दोस्रो सेटमा २५–१३ नतिजा भारतलाई सुम्पिएको थियो। तेस्रो सेटमा केही प्रतिस्पर्धात्मक खेल देखिए पनि नेपाल भारतसँग २५–१६ ले हार्न पुग्यो।
सोझो सेटमा नेपाल पराजित भएसँगै समूह ‘ए’ बाट भारत विजेता हुँदै सेमिफाइनल पुग्यो। बंगलादेशले पनि सेमिफाइनलमा स्थान बनाउँदा नेपाली भलिबलले निराशाको निरन्तरता देखायो।
(1).jpg)
आफ्नै घरेलु मैदानमा साग खेलकुद हुँदा नेपाली पुरुष भलिबल टिमले पदक जित्ने लक्ष्य बनाएको थियो। त्यही लक्ष्यलाई साकार बनाउन नेपाल भलिबल संघले डच प्रशिक्षक लेस्ले डे योङ ल्याएको थियो। इन्डोनेसियामा २०१८ मा भएको एसियाली खेलकुदमा नेपालले उत्कृष्ट प्रदर्शन गर्दै १५औं स्थान हासिल गर्दा लेस्ले नै मुख्य प्रशिक्षक थिए।
त्यसैले पनि उनलाई यो पटक मुख्य प्रशिक्षककै जिम्मा दिइएको थियो। तर यो पटक नेपालले सोचे अनुसारको प्रदर्शन गर्न सकेन। धेरैले भारतको खेलको स्तर नेपालको भन्दा धेरै राम्रो भएकाले हार सामान्य भएको बताए। तर, हार्नु र जितको चाह खेलमा नदेखिनुमा भने पक्कै भिन्नता हुन्छ।
समूह चरणबाटै बाहिरिएपछि नेपालका मुख्य प्रशिक्षक लेस्लेले टिमको प्रदर्शनबाट खुसी नै हुनुपर्ने बताए। आफूले विगत तीन वर्षदेखि नेपाली टिम हेरिरहेको बताउँदै उनले भने, ‘पहिले भन्दा निकै सुधार भएको छ। नेपाल र भारतको टिमबीचमा धेरै अन्तर छ। नेपालको यो प्रदर्शन हामी खुसी हुनु पर्ने प्रदर्शन नै हो।’
नेपालको खराब नतिजामा खेलाडी कुलबहादुर थापा भन्छन्, ‘भारतलाई जित्न त हामीलाई अझै समय लाग्छ। उनीहरु हामी भन्दा धेरै स्तरीय छन्।’
यता, भारतीय प्रशिक्षक र खेलाडीले नेपाल समूह चरणबाटै बाहिरिए पनि टिमको तारिफ गरे।
भारतीय प्रशिक्षक जी.ई.श्रीधरणले नेपाली टिमको प्रशंसा गर्दै भने, ‘नेपालले राम्रो खेलेको हो। अब एक दुई वर्षमा नेपाली टिम राम्रो हुने देखिरहेको छु। नेपालले आजको खेलमा घरेलु दर्शकको साथ पनि राम्रो पायो। यहाँ सबै टिम राम्रा नै छन्। अब हाम्रो ध्यान फाइनलमा छ।’
बंगलादेश बाधक!
नेपाल भारतसँग पराजित भएर समूह चरणबाट बाहिरिए पनि घरेलु टिम नेपालको लागि मुख्य बाधक बंगलादेश बनेको हो। आफ्नो पहिलो खेलमा नेपालले बंगलादेशसँग प्रतिस्पर्धा गर्दा बेष्ट अफ फाइभमा पुगेर ३–२ को सेटमा पराजित भएको थियो।
नेपाल समूह चरणबाट बाहिरिनुको मुख्य कारण बंगलादेशसँग पराजित हुनु रहेको खेलाडी कुलबहादुर थापा पनि बताउँछन्। ‘हामी सेमिफाइनल पुग्नुपर्ने टिम हो। तर बंगलादेशसँग जित्न सकिने खेल हार्न पुग्यौं’, कुलबहादुरले भने।
त्यसो त साग खेलकुदमा नेपालले अहिलेसम्म पदक जित्न सकेको छैन। पदक जित्नको लागि केही समयको तयारीले नपुग्ने मुख्य प्रशिक्षक लेस्लेको ठम्याई छ।
उनी भन्छन्, ‘नेपालको भलिबल सुधार गर्नलाई खेल हुने समयमा मात्र होइन अरु बेला पनि काम गर्नु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
