फाइल तस्बिर
काठमाडौं- नेपाल वायु सेवा निगम (नेपाल एयरलाइन्स) को ३२ वर्षे पुरानो बोइङ खरिदका लागि ३ वटा कम्पनीको आवेदन परेको छ। निगम स्रोतकाअनुसार बोइङ खरिदका लागि दुई वटा अमेरिकन कम्पनी र एउटा पोल्यान्डको कम्पनीले आवेदन दिएका छन्।
जसमा अमेरिकन कम्पनीमा एभियोन र एमके एभिएसन रहेको छ। यसैगरी पोल्यान्डको सिएसबिएस एयरक्राफ्ट सेल्स एन्ड लिजिङ कम्पनी हेको छ। अब निगमले यो ३ वटा कम्पनीमध्ये जसले धेरै रकममा जहाज खरिद गर्न गरी रकम कबुल गर्छ उसैलाई बिक्री गर्ने छ।
विमान सन् २०२० को फेब्रुअरीसम्म मात्रै उड्न सक्ने लाइफ भएकाले छिटो बिक्री गर्नुपर्ने दबाबमा निगमले नेगोसिएसनमा बिक्री गर्ने भएको हो। निगमले वोइङ- ७५७ कर्णाली विमान खरिदको लागि भएको तेस्रो पटकको सूचनामा ३ कम्पनीको आवदेन परेको हो।
निगमले असार ११ गते पहिलो पटक ४५ दिनको समयसीमा राखेर बोइङ बिक्रीका लागि ग्लोबल टेन्डर गरेको थियो। पहिलो पटकको टेन्डर निगमले राखेको न्यूनतम मूल्यका विमान खरिदका लागि आवेदन नपरेपछि पुनः दोस्रो पटक समय थप गरेको थियो।
पहिलो पटक निमगले ७६ लाख ७६ हजार अमेरिकी डलर अर्थात् ८७ करोड ५० लाख रुपैयाँलाई आधारमूल्य तोकेको थियो । टेन्डरमा दुई वटा कम्पनीको आवेदन परे पनि आधार मूल्यभन्दा कम थियो। दोस्रो पटक भने कुनै पनि कम्पनीको आवदेन परेको थिएन।
दोस्रो पटकको टेन्डर थप सयममा कसैको पनि आवेदन नपरेपछि निगमले तेस्रो पटक बोलकबोलको आधारमा बोइङ बिक्रीका लागि गत कात्तिक २६ गते १५ दिनको समय दिएर सूचना प्रकाशन गरेको थियो। उक्त समयमा भने निगमले पहिलो पटकको टेन्डरमा राखेको आधार मूल्यभन्दा ४४ प्रतिशत कम गरी न्यूनतम मूल्य ४२ हजार ५० लाख अमेरिकी डलर तोकेको थियो।
निगमले बोइङ- ७५७ कर्णाली विमानको बिक्रीको लागि स्विस कम्पनी फिन्टेकले तय गरेको मूल्यको आधारमा गरेको थियो। तर, तेस्रो पटकमा भने फिन्टेकले दिएको न्यूनतम मूल्यभन्दा ८३ हजार कम मूल्यमा बोइङ बिक्री गर्ने गरी सूचना प्रकाशन गरेको थियो।
फिन्टेकले भने बढीमा ५२ लाख ९६ हजार डलर र घटीमा ४३ हजार ३३ लाख रुपैयाँमा बोइङ बिक्री गर्न सक्ने भन्दै मूल्यांकन रिपोर्ट नेपाल वायुसेवा निगमलाई बुझाएको थियो।
विमान मर्मत-सम्भार गर्नका लागि धेरै रकम खर्च गरेको तथा विमान पुरानो हुँदै गएकाले सञ्चालन, इन्धन खर्च बढी भएपछि निगमले कर्णाली विमान बेच्ने निर्णय गरेको थियो।
निगमले सन् १९८७ मा तत्कालीन समयमा अमेरिकन बोइङ कम्पनीसँग ऋणमा विमान खरिद गरेको थियो। १९० सिट क्षमता रहेको विमानमा १६ वटा विजनेस क्लासका सिट छन्।
विमानमा २ वटा रोल्सरोयस इन्जिन छन्। विमानले हालसम्म ८९ हजार घण्टा उडान गरिसकेको छ।
२८ अक्टोबर, २०१८ मा निगमले मर्मतका लागि बोइङलाई मलेसिया पठाएको थियो। विमान मर्मतपछि १६ जनवरी, २०१९ मा विमान मलेसियबाट काठमाडौं आउँदै थियो। तर, आकाशमै उडिरहेको बेला 'विङ स्क्रिन’ बिग्रन गयो। समस्या आए पनि विमान काठमाडौं विमानस्थलमा अवतरण गरिएको थियो।
त्यसपछि केही दिन विमान ग्राउन्डेड भयो। ग्राउन्डेड भएको विमान प्राविधिक टोलीले मर्मत गरेर उडान योग्य बनाए। तर, उडानका लागि योग्य हुँदा पनि बोइङ उडान गरिरहेका पाइलटहरुको सिप परीक्षण प्रमाणपत्र (पिपिसी) को म्याद सकिएका कारण उडान हुन सकेको छैन। त्यसपछि भने निगम सञ्चालन बोर्डबाट बोइङ उडान नगर्ने बन्दै निर्णय गरेको थियो।
मर्मतमा मात्रै निगमको २ करोडभन्दा बढी खर्च भएको थियो। सन् १९८७ मा अमेरिकी बोइङ कम्पनीसँग नेपाल एयरलाइन्सले ऋणमा दुई वटा बोइङ खरिद गरिएको थियो। यीमध्ये गण्डकी नाम दिइएको बोइङ यसअघि नै १५ करोड रुपैयाँमा बिबी एयरवेजलाई बिक्री गरिसकेको छ। तर, कर्णाली बोइङ भने लामो समयदेखि ग्राउन्डेड थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
