भैरहवा- लुम्बिनी प्रेस क्लब सिद्धार्थनगर, रुपन्देहीको आयोजनामा आइतबारदेखि ‘लुम्बिनी न्यूज फेस्टिबल–२०७६’ सुरु भएको छ।
‘संघीयतामा सञ्चार, समृद्धिका लागि मोफसल नै मूलधार’ भन्ने नाराका साथ बुद्ध जन्मस्थल लुम्बिनीमा सुरु भएको महोत्सवमा मुलुकभरका विभिन्न सञ्चारमाध्यममा कार्यरत पत्रकारहरूको सहभागिता रहेको क्लबका अध्यक्ष दिपेश पछाईले बताए।
मंसिर ३ गतेसम्म चल्ने न्यूज फेस्टिबलको आइतबार प्रदेश ५ का मुख्यमन्त्री शंकर पोखरेलले उद्घाटन गरे।
‘पत्रकारिताः चुनौती र भविष्य’ विषयक अन्तरक्रिया कार्यक्रममा बोल्ने वक्ताहरुले एउटै पत्रकारले विभिन्न सञ्चारमाध्यममा काम गर्नु पर्ने बाध्यता रहेको बताए। उनीहरूले सामाजिक सञ्जालका कारण पत्रकारिता क्षेत्रमा विभिन्न चुनौती देखा परेको बताएका छन्।
कार्यक्रममा बोल्दै प्रेस काउन्सिलका अध्यक्ष किशोर श्रेष्ठले अनलाइन सञ्चारमाध्यममा प्रकाशित समाचारहरूका बारेमा काउन्सिलमा उजुरी आएको बताए। ‘पत्रकारिता हतारमा गर्न नहुने र हुबहु कपिपेष्ट पत्रकारिता नै सञ्चार क्षेत्रका मुख्य समस्या हुन्, खोजमूलक पत्रकारिताको आवश्यकता छ,’ उनले भने। खोज पत्रकारिता केन्द्रका अध्यक्ष तथा नेपाल पत्रकार महासंघका पूर्व अध्यक्ष शिव गाउँलेले लुकेका र लुकाइएका कुराहरु सार्वजनिक गर्नुपर्ने र सार्वजनिक पदमा रहेका व्यक्तिमाथि प्रश्न तेर्साउनुपर्ने धारणा व्यक्त गरे। उनले भने‚ ‘सञ्चारमाध्यमले सरकारको प्रवक्ता बन्नुभन्दा सरकारलाई प्रश्न गर्नुपर्छ।’
वरिष्ठ पत्रकार किशोर नेपालले पत्रकारिता शास्त्र–विज्ञान भएकोले यो कहिल्यै नसकिने बताए। उनले पत्रकारहरुले न्यूनतम पारिश्रमिक समेत नपाएको तथा स्थानीय सञ्चारमाध्यम सञ्चालनमा समेत समस्या आएको बताए ।
उनका अनुसार मिडियाको परम्परागत शैलीका कारण रेडियोका श्रोता घटे, दैनिक पत्रिकामा कुपोषण लाग्यो, टेलिभिजन हेर्ने सामाजिक सञ्जालमा लागेकाले पत्रकारितामा चुनौती बढ्दै गएको छ।
पत्रकार महासंघका पूर्व अध्यक्ष विष्णु निष्ठुरीले पत्रकारहरू दोहारो चरित्रमा बसेर पत्रकारिता गर्दा निष्पक्ष पत्रकारिता हुन नसक्ने दाबी गरे। उनले राजनीतिक दलको क्याडर बनेकाहरुले पत्रकारिताको कुरा गर्न सुहाउँदैन भन्दै पत्रकारको संख्या बढे पनि उनीहरूको गुणस्तरमा वृद्धि हुन नसक्दा समाजले खोजेको पत्रकारिता हुन नसकेको उल्लेख गरे।
वरिष्ठ पत्रकार मोहन मैनालीले पत्रकारिताको लागि आवश्यक कुराहरूको जानकारी हुन आवश्यक रहेको बताए । उनका अनुसार खोजी पत्रकारिताको बाटोमा जानुको विकल्प छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
