काठमाडौं- नेपालमा पाँच दिने इपिडिमियोलोजी अनुसन्धान सम्बन्धी अन्तर्राष्ट्रिय सम्मेलन हुने भएको छ। नेपाल जनस्वास्थ्य प्रतिष्ठानले नेपाल स्वास्थ्य अनुसन्धान परिषद्सँगको सहकार्यमा फागुन २७ देखि चैत १ सम्म सम्मेलन गर्न लागेको हो।
इपिडिमियोलोजी भन्नाले कुनै निश्चित जनसंख्याभित्र कुनै स्वास्थ्य समस्याको भार र त्यसको सम्भावित कारक तत्वको खोज अनुसन्धान गरी प्राप्त नतिजालाई उक्त समस्याको समाधान गर्न प्रयोग गर्ने भन्ने बुझिन्छ। बोलीचालीको भाषमा भने कुनै पनि रोग तथा स्वास्थ्य समस्याको महामारी भनेर बुझिन्छ।
नेपालमा सरुवा रोग, नसर्ने रोग र दुर्घटनाबाट निम्तिने स्वास्थ्य समस्या विकराल छ। राजधानीको होटल शंकरमा हुने सम्मेलनमा नेपालमा भएका रोग तथा समस्या र तिनीहरुको अनुसन्धान, आगामि दिनमा आउन सक्ने रोगको महामारी र त्यसको अनुसनधान लगायतका विषयमा विज्ञहरुसँग छलफल हुनुका साथै तालिम समेत प्रदान गरिनेछ।
जनस्वास्थ्य प्रतिष्ठानका कार्यकारी अध्यक्ष डा महेशकुमार मास्केका अनुसार पाँच दिने कार्यक्रम अन्तर्गत पहिलो दुई दिन सम्मेलन र अन्तिम तीन दिन तालिम हुनेछ।
‘यो सम्मेलनमा स्वास्थ्य अनुसन्धानमा प्रयोग हुने इपिडिमियोलोजीका विधि, इपिडिमियोलोजीमा भएका परिवर्तनहरु र प्राप्त प्रमाणमा आधारित नीति र कार्यक्रम कसरी बनाउने सम्बन्धी जानकारी आदानप्रदान हुनेछ,’ डा मास्केले भने, ‘तालिममा सहभागीहरुको ज्ञान र सीप विकास गरी आधुनिक इपिडिमियोलोजीको विधि र व्याख्या सम्बन्धी बुझाइ थप गहन बनाउने काम हुनेछ।’
प्रतिष्ठानका महासचिव डा समिरमणि दिक्षितले अनुसन्धानलार्इ दराजमा मात्र थन्काउन नहुने बताए । 'नेपालमा धेरै अनुसन्धान भइरहेका छन् तर ती अनुसन्धान दराजमा थन्किरहेका छन्,' उनले भने, 'यो सम्मेलनमा अनुसन्धान प्रतिवेदनलाइ कसरी सरल भाषामा बाहिर ल्याउने भन्ने कुरा पनि सिकाइने छ।'
सम्मेलेनमा आधुनिक इपिडिमियोलोजीका विज्ञ केनेथ रोथम्यान, बोस्टन युनिभर्सिटी स्कुल अफ पब्लिक हेल्थका डिन डा स्यान्ड्रो ग्यालिया र प्राध्यापक डा एलिजावेथ ह्याच, आइसिडिडिआरबी बङ्गलादेशका कार्यकारी निर्देशक डा जोन डेभिड क्लेमन्स, पब्लिक हेल्थ फाउन्डेसन अफ बङ्गलादेशका उपाध्यक्ष डा सारमिन यासमिन र डा मास्के प्रमुख वक्ताका रुपमा छन्।
सम्मेलनमा नेपालका र अन्तर्राष्ट्रिय क्षेत्रका गरी १ सय ५० जना सहभागी हुने बताइएको छ। सम्मेलनमा सहभागी हुन नेपाल, सार्क राष्ट्र र अन्तर्राष्ट्रिय प्रतिनिधिका लागि छुट्टाछुट्टै शुल्कको व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
