काठमाडौं- संघीय संरचना अनुसार शिक्षालाई थप व्यवस्थित बनाउन सरोकारवालाहरुले जोड दिएका छन्। देश संघीय संरचनामा गएपछि शिक्षा क्षेत्रमा झन् समस्या निम्तिएको भन्दै समयमै समाधान गर्न जोड दिइएको हो।
शिक्षा पत्रकार समूहको १८औं वार्षिकोत्सवको अवसरमा आयोजित कार्यक्रममा शिक्षालाई विकासको एजेन्डा बनाएर अगाडि बढाउन सुझाव दिइएको छ।
पूर्व शिक्षामन्त्री धनीराम पौडेलले नयाँ संरचनाका कारण शिक्षाको व्यवस्थापनमा झन् जटिलता आएको बताए।
‘सार्वजनिक विद्यालयको गुणस्तर बढाउन जोड दिनुपर्नेमा अहिले त झन् व्यवस्थापनमा समेत समस्या आइरहेको छ’, उनले भने, ‘यो समस्यालाई तत्कालै समाधान गरेन भने भोलि झन् भयावह अवस्था आउने छ।’
कार्यक्रममा नेपाली कांग्रेसका केन्द्रीय सदस्य गगन थापाले १८ वर्षअघि र अहिलेको शिक्षाको अवस्थामा सुधार आउन नसकेकोमा चिन्ता व्यक्त गरे।
‘१८ वर्षअघि विद्यार्थी नेता हुँदा हामी शिक्षाको जुन विषयमा चर्चा गर्थ्यौं, अहिले पनि त्यही विषयमा बहस भइरहेको छ’, उनले भने, ‘देशलाई समृद्ध बनाउने हो भने शिक्षालाई विकासको एजेन्डा बनाएर अगाडि बढाउनुपर्छ। राजनीतिक दलले शिक्षालाई प्राथमिकतामा राख्नुपर्छ।’
उनले संघीय संरचनाको कार्यान्वयनका क्रममा जनप्रतिनिधिले शिक्षामा जोड दिनुपर्ने बताए।
यस्तै, नेकपा एमालेका नेता रवीन्द्र अधिकारीले शिक्षामा लगानी नगर्दा समस्या आएको बताए।
‘शिक्षामा दिइएको लगानी पनि यहाँ सडक बनाउने काममा खर्च हुन्छ’, उनले भने, ‘विकास भनेको नै सडक बनाउने हो भन्ने मानसिकताबाट अब माथि उठ्नुपर्छ।’
राष्ट्रिय योजना आयोगका उपाध्यक्ष डा स्वर्णिम वाग्लेले शिक्षालाई दिगो विकाससँग जोडेर अगाडि बढ्नुपर्ने बताए। उनले स्थानीय तहले अब शिक्षकको संख्या र विद्यार्थीको उपस्थिति बढाउनेतर्फ पनि जोड दिनुपर्ने बताए।
शिक्षा सचिव मधुप्रसाद रेग्मीले संघीय व्यवस्थामा प्रवेश गरेपछि सार्वजनिक शिक्षामा झन् भद्रगोल अवस्था आएको बताए।
‘अहिले शिक्षा क्षेत्रमा झनै अन्यौल र अस्पष्टता आएको छ’, उनले भने, ‘सार्वजनिक शिक्षा सुधार गर्न सबैले गफ मात्र गरेका छन् तर काम भएको छैन। अब यो अवस्थाको अन्त्य हुनुपर्छ।’
यस्तै, शिक्षा पत्रकार समूहका अध्यक्ष दीपक दाहालले परिवर्तित अवस्थामा शिक्षाका मुद्दालाई प्राथमिकताका साथ सञ्चार माध्यममा ल्याउन जरुरी रहेको बताए।
कार्यक्रममा समूहले सार्वजनिक शिक्षामा योगदान दिने अभिभावक, शिक्षक र पत्रकारलाई सम्मान तथा पुरस्कृत गरेको छ। समूहले त्रिवेणी आधारभूत विद्यालय रुपन्देहीका प्रधानाध्यापक मथुरा यादव र कमला मावि सिन्धुलीका व्यवस्थापन समिति सदस्य देवी खड्कालाई सम्मान गरेको हो।
त्यस्तै, बुटवलका पत्रकार एवं सम्पादक कृष्ण मल्ललाई २० हजार राशिको तीर्थराज भुसाल स्मृति शिक्षा पत्रकारिता पुरस्कार दिइयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
