वासिङ्टन- अमेरिकामा विद्यालयमा गोलीकाण्ड हुने र विद्यार्थी तथा साना बालबालिकाको मृत्यु हुने घटना समान्यजस्तो बन्दै गएको छ। यस्ता डरलाग्दा घटनाहरु दोहोरिन थालेका छन्। जसले गर्दा यहाँको सरकारलाई विद्यालयमा अपनाउनुपर्ने सुरक्षा व्यवस्थाका बारेमा सोच्नुपर्ने भएको छ।
अमेरिकाको फ्लोरिडास्थित एक विद्यालयमा बुधबार बन्दुकधारीले गोली चलाउँदा कम्तीमा १७ जना विद्यार्थीको मृत्यु भएको थियो।
सो घटनापछि अमेरिकी सञ्चारमाध्यमहरुले अमेरिकाका विद्यालयहरुमा ज्यान लिने गरी भएका यस्तै दुःखद घटनाहरुको सूची सार्वजनिक गरेका छन्।
उनीहरुले यस्ता घटनाहरु हुनु अत्यन्तै दुःखद भन्दै यसको निराकरण नगर्ने हो भने शिक्षण संस्थाहरुको संचालन कार्यविधीका बारेमा सोच्नुपर्ने अवस्था आएको विश्लेषणसहितका समाचारहरु सम्प्रेषण गरेका छन्।
स्थानीय प्रहरीले सो विद्यालयमा बुधबार भएको बन्दुक हमलामा परी १७ जनाको ज्यान गएको पुष्टी गरेको छ। प्रहरीकाअनुसार फ्लोरिडा राज्यको पार्कल्याण्डमा रहेको मर्जोरी स्टोनम्यान स्कुलमा सो गोलीकाण्ड भएको हो।
अमेरिकामा बन्दुक सजिलै उपलब्ध हुने कारणले गर्दा पनि यस्तो अवस्था आएको बताइन्छ। अमेरिकामा घर घरमा बन्दुक राख्नु पनि एउटा संस्कृतिजस्तै भएको छ। यसका कारण बन्दुक हमलाबाट हुने गरेका हत्याका घटनामा वृद्धि भइरहेको छ।
कतिपय विश्लेषकहरुले अमेरिकामा बढ्दै गएको हत्या हिंसाको अन्त्यका लागि बन्दुक संस्कृतिको पनि अन्त्य हुनुपर्ने बताउने गरेका छन्। तर पनि सरकारी उच्चअधिकारी वा सत्तारुढ रिपब्लिकन पार्टीकै नीति निर्माताहरु बन्दुकमाथि तत्कालै प्रतिबन्ध लगाउन सक्ने अवस्थामा छैनन्।
यसले गर्दा विद्यालयजस्तो बालबालिका रहने र पवित्र स्थानमा पनि बन्दुकबाट हमला हुने र शिक्षा आर्जन गर्न पुगेका निर्दोष बालबालिकाहरु नै आक्रमणकारीको शिकार हुने अवस्था आएको उनीहरुको भनाई छ।
वास्तवमा यही दशकमै ठुलो संख्यामा अमेरिकाका विभिन्न स्थानमा यस्ता हत्याका घटना भएका छन्। सन् २००७ मा भर्जि्नियामा भएको यस्तै गोलीकाण्डमा बन्दुकधारीले कम्तीमा पनि ३२ जनाको ज्यान लिएको थियो।
त्यसैगरी सन् २०१२ मा पनि अमेरिकाको स्याण्डी हकमा एकजना बन्दुकधारीले विद्यालयमा नै गरेको हमलामा परी २८ जनाको मृत्यु भएको थियो। सो घटनामा २० बालबालिका मारिएका थिए।
गतवर्षको अक्टोबरमा भएको बन्दुक हमलामा परी ६० जनाको मृत्यु भएको घटना त विश्वव्यापी रुपमा नै निन्दनीय बन्यो। लासभेगासमा भएको सो हमलामा परी करिब ५ सय जना घाइते भएका थिए। यस घटनालाई अमेरिकी इतिहासकै सबैभन्दा क्रुर र दर्दनाक मानिएको छ।
क्रुजले स्वीकारे हत्या
यसैबीच बुधबार भएको गोलीकाण्डका मुख्य अभियुक्त निकोलस क्रुजले आफुमाथिको आरोप स्वीकारेका छन्। उनलाई घटनालगत्तै नियन्त्रणमा लिइएको थियो।
अमेरिकी प्रहरीले उनीमाथि थप अनुसन्धान भइरहेको जनाएको छ। प्रहरीले उनको साथबाट गोली र बन्दुक पनि बरामद गरेको थियो।
सोही विद्यालयका १९ वर्षीय पूर्व विद्यार्थी रहेका क्रुजले किन गोली हानेका हुन् भन्ने बारेमा भने केही पत्ता लागेको छैन। यस विषयमा अनुसन्धान जारी रहेको प्रहरीले जनाएको छ।
प्रहरीको प्रारम्भिक अनुसन्धानबाट ती विद्यार्थीलाई अनुशासनको कारण देखाउँदै विद्यालयबाट निष्काशन गरिएको खुल्नमा आएको छ। तर गोली हान्नुपर्नाको मुख्य कारणको नजिक भने प्रहरी पुग्न नसकेको बताइएको छ।
उक्त विद्यालयबाट निष्कासनमा परेका ती विद्यार्थीले सोही रिस पोख्न यस्तो गरेको हुनसक्ने अनुमान प्रहरीको छ। तर यसको पुष्टी भने भइसकेको छैन।
पहिलो प्राथमिकता विद्यालय सुरक्षा– राष्ट्रपति ट्रम्प
अमेरिकी राष्ट्रपति डोनाल्ड ट्रम्पले आफ्नो प्रशासनको पहिलो प्राथमिकता अमेरिकी विद्यालय र विद्यार्थीको सुरक्षा हुने बताएका छन्।
उनले फ्लोरिडामा बुधबार भएको हत्याकाण्डपछि बिहीबार संसदमा सम्बोधनका क्रममा सो प्रतिबद्धता व्यक्त गरेका जनाइएको छ।
उनले विद्यालयमा देखिएको यो असुरक्षाको अवस्थालाई हटाई शान्त र सुरक्षित वातावरणमा शिक्षा आर्जन गर्न पाउने अमेरिकी बालबालिकाको अधिकारको संरक्षणका लागि सरकारले सक्दो प्रयास गर्ने बताएका छन्।
राष्ट्रपति ट्रम्पले उक्त गोलीकाण्डमा परी ज्यान गुमाएका विद्याथीप्रति श्रद्धाञ्जली व्यक्त गर्दै मारिएका बालबालिकाका परिवारजनमा समवेदना प्रकट गरेका छन्।
आफ्नो ट्वीटर अकाउन्टमार्फत राष्ट्रपति ट्रम्पले बिहीबारै सम्प्रेषण गरेको सन्देशमा कुनैपनि बालबालिका, शिक्षक वा अरू कसैले पनि अमेरिकी विद्यालयमा कहिल्यै असुरक्षित महसुश गर्न नपर्ने लेखेका थिए।
विद्यालयमा सुरक्षाको प्रत्याभूति होस् – महासचिव गुथ्रेस
संयुक्त राष्ट्रसंघका महासचिव एन्टोनियो गुथ्रेसले उक्त गोलीकाण्डमा परी विद्यार्थीको ज्यान गएको घटनाले आफूलाई निकै स्तब्ध तुल्याएको बताएका छन्।
उनले बिहीबार जारी गरेको विज्ञप्तिमा विद्यालयमा ज्ञान आर्जन गर्न जाने विद्यार्थीमाथि भएको यो हमलाको जुनसुकै शब्दले निन्दा गर्दा पनि थोरै हुने उल्लेख छ। यसबाट आगामी दिनमा विद्यालय सुरक्षाको प्रत्याभूतिका लागि आग्रह गरेका छन्।
बालबालिका वा जो कोहीले पनि शान्तिपूर्वक बाँच्न वा विद्यालय जान पाउने अधिकार छ भन्दै त्यसको सम्मान गर्नु सबैको कर्तव्य भएको विज्ञप्तिमा उल्लेख छ। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
