सुर्खेत- प्रदेश नम्बर ६ मा बिहीबार सात वटा मन्त्रालय स्थापना गरिएका छन्।
प्रदेश मुख्यसचिव सुरेश प्रधानले मुख्यमन्त्री तथा मन्त्रिपरिषद्को कार्यालयसहित ६ मन्त्रालय स्थापना गरिएको बताए।
दुई साताअघि नै क्षेत्रीय प्रशासन कार्यालय भवनमा मुख्यमन्त्री तथा प्रदेश मन्त्रिपरिषद्को कार्यालय सञ्चालन भइसकेको छ। प्रदेशमा मुख्यमन्त्री तथा मन्त्रिपरिषद्को कार्यालयका साथै आन्तरिक मामिला तथा कानुन मन्त्रालय, आर्थिक मामिला तथा योजना मन्त्रालय, भौतिक पूर्वाधार विकास मन्त्रालय, सामाजिक विकास मन्त्रालय, उद्योग, पर्यटन, वन तथा वातावरण मन्त्रालय र भूमि व्यवस्था, कृषि तथा सहकारी मन्त्रालय रहनेछन्।
भवन डिभिजन कार्यालयमा आन्तरिक मामिला तथा कानुन मन्त्रालय स्थापना गरिएको छ। मन्त्रालयका सचिव केशवराज आचार्यले पदभार ग्रहण गरेर काम थालिसकेका छन्। मन्त्रालयको क्षेत्राधिकारभित्र शान्ति सुरक्षा, प्रदेश प्रहरी, प्रदेश अनुसन्धान ब्यूरो, विपद् व्यवस्थापन, कानुन न्याय तथा प्रदेशसभा र प्रदेश कर्मचारी लगायत पर्छन्। यो मन्त्रालय मुख्यमन्त्रीपछिको शक्तिशाली हो।
क्षेत्रीय शिक्षा निर्देशनालयमा आर्थिक मामिला तथा योजना मन्त्रालय स्थापना गरिएको छ। मन्त्रालयका सचिव ढुण्डी निरौलाले पदभार ग्रहण गरेर काम सुरु गरेका छन्। यो मन्त्रालयले प्रदेशको आर्थिक योजना तथा बजेट निर्माण गर्नेबित्तिकै संस्थाहरुको अनुगमन र नियमन गर्नेछ।
जिल्ला जनस्वास्थ्य कार्यालयमा सामाजिक विकास मन्त्रालय स्थापना गरिएको छ। शिक्षा, स्वास्थ्य, सरसफाइ, महिला, युवा तथा खेलकुद, सामाजिक सुरक्षा, भाषा, संस्कृति र श्रम तथा रोजगार यसअन्तर्गत रहने छन्। निमित्त सचिव भक्तबहादुर ढकालले पदभार ग्रहण गरेर कामकाज सुरु गरेका छन्।
सात मन्त्रालयमध्ये भौतिक पूर्वाधार विकास मन्त्रालय स्थापना हुन बाँकी छ। डिभिजन सिँचाइको कार्यालयले मात्रै नपुग्ने भएपछि नजिकैको जल उत्पन्न प्रकोप नियन्त्रण कार्यालय समेतलाई मिलाएर मन्त्रालय स्थापना गर्ने तयारी गरिएको मुख्यसचिव प्रधानले जानकारी दिए। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
