राजविराज- सप्तरी जिल्ला कारागारमा पुर्पक्षका लागि थुनामा रहेका ३ जना बन्दीलाई उपचारका लागि अन्य कारागार पठाउने आदेश भएको छ। सप्तरी जिल्ला अदालतको बुधबारको तीन वटा इजलासमार्फत फास्ट ट्रयाक प्रयोग गरी उनीहरुलाई उपचारको व्यवस्था मिलाउन लागिएको हो।
उच्च अदालत जनकपुर राजविराज इजलासले मंगलबारदेखि कारागारमा सञ्चालन गरेको न्यायिक शिविरमार्फत बन्दीहरुले उपचार गर्न नपाएको गुनासो गर्दै स्थानान्तरणको माग गरेका थिए।
कारागारमार्फत अदालतमा निवेदन परेकामध्ये सप्तरीको कञ्चनरुप नगरपालिका-५ का ३५ वर्षीय साहुदर सदा, कञ्चनरुप-१२, सितापुरका टिकाबहादुर तामाङ र बोदेबरसाइन नगरपालिका-३, सारेश्वरका 'मस्तकिम' भनिने रइश मियाँलाई बुधबार स्थानान्तरणको आदेश भएको तहसिलदार हरी पराजुलीले बताए।
जिल्ला अदालतको ५ नम्बर इजलासबाट साहुदर तथा ८ नम्बर इजलासबाट रइश मियाँलाई ललितपुरस्थित नख्खु कारागार स्थानान्तरण गर्ने आदेश भएको छ भने ६ नम्बर इजलासबाट टिकाबहादुरलाई सुनसरीको झुम्कास्थित क्षेत्रीय कारागारमा स्थानान्तरण गर्ने आदेश भएको उनले जानकारी दिए।
.jpg)
तीन जनामध्ये साहुदर ज्यान मार्ने उद्योग, रइश खुनडाका र टिकाबहादुर कर्तव्यज्यान मुद्दामा बन्दी जीवन बिताइरहेका छन्। उनीहरुले स्वास्थ्य उपचारका लागि माग गर्दै स्थानान्तरणका लागि अदालतमा निवेदन दिएका थिए। जीउ काम्ने तथा हिँडडुल गर्न नसक्ने अवस्थाका तिनैजनाका लागि कारागारले स्थानान्तरणका लागि अदालतलाई पत्राचार गरेको थियो।
अन्य १/२ जना बन्दीको पनि निवेदन परेको अदालतले जनाएको छ। उनीहरुको अवस्था हेरेर स्थानान्तरणको आदेश भएको तहसिलदार पराजुली बताउँछन्। ‘अदालतले मुद्दाको फैसला नगरेसम्म उनीहरुलाई त्यसको बारेमा विभिन्न जानकारीहरु दिनुपर्ने हुन्छ,’ पराजुलीले भने, ‘त्यसैले निवेदन पर्यो भन्दैमा सवैलाई पठाउने भन्ने हुँदैन। अवस्था हेरेर कार्यान्वयन गर्ने हो।’
तीनैजना कैदी बन्दीको स्थानान्तरणका लागि भएको आदेशपत्र बोकेर पराजुली बुधबारको न्यायिक शिविरमा पुगेका थिए।
कारागारका निमित्त प्रमुख सत्यनारायण यादवले कारागार व्यवस्था विभागमा पत्राचार गरी चाँडै नै उनीहरुलाई सम्वन्धित कारागार पठाउन प्रयास गरिने बताए।
शिविरमा ३९ जनाको गुनासो संकलन
.jpg)
कारागारमा मंगलबार र बुधबार भएको शिविरमा ३९ जना कैदीबन्दीहरुले गुनासो र समस्या संकलन गरिएको छ। मंगलबार ४ महिलासहित २३ जना बुधबार १६ जनाले आफ्नो कुरा राखेका थिए।
मुद्दा फैसला ढिलो भएको, कारागारमा क्षमताभन्दा बढी कैदीबन्दी राखिएको कारण बसाइमा समस्या भएको तथा ज्येष्ठ नागरिकको सुविधा नपाएको लगायतका विषयमा कैदीबन्दीले गुनासो गरेका थिए।
अग्निसाइर कृष्णासवरण गाउँपालिका, प्रसवनीका ६२ वर्षीय शिवनारायण सरदार, खडक नगरपालिका-२ का ७५ वर्षीय पन्चु मण्डल, ६८ वर्षिय भोला सदा, कञ्चनरुपका ७४ वर्षीय दिप नारायण चौधरीलगायतले ज्येष्ठ नागरिकको सुविधाका लागि माग गरेका थिए। उनीहरुका अनुसार कारागारमा करिब ५० जना ज्येष्ठ नागरिक कैदीबन्दी छन्।
.jpg)
'उमेर र शारीरिक अशक्तताका साथै कारागारभित्र कुँजिएर बस्नुपर्दा नर्कको बास भएको’ भन्दै उनीहरुले आफ्नो पीडा सुनाएका हुन्।
तहसिलदार पराजुलीका अनुसार ६० वर्ष माथिका ज्येष्ठ नागरिकका लागि अवस्था हेरेर २५ देखि ७५ प्रतिशतसम्म सजाय छुट दिन मिल्ने कानुनी व्यवस्था छ।
सप्तरी जिल्ला कारागारमा पहिलोपटक भएको न्यायिक शिविर अब हरेक महिना सञ्चालन हुने र ‘टेली इन्क्वाइरी सेवा’ पनि सुरु गरिने इजलासका सहायक सूचना अधिकारी विश्वराज पोखरेलले जानकारी दिए।
‘टेली इन्क्वाइरी सेवा’मार्फत कैदीबन्दीले न्यायाधीश र कर्मचारीसँग आफ्नो मुद्दाको अवस्थाका बारेमा टेलिफोन गरी आफैं जानकारी लिन सक्नेछन्।
र यो पनिः सप्तरी कारागारका बन्दीको गुनासो- मुद्दाको फैसला सुस्त भयो, अनाहकमा दुःख पायौं
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
