काठमाडौं- प्रतिनिधिसभा बैठकको शून्य र विशेष समयमा सांसदहरुले उठाएका विषयबारे सदनलाई जानकारी गराउने सम्बन्धमा सरकार गम्भीर नभएको भन्दै दैनिकजसो सांसदहरुले प्रतिनिधिसभा नियमावलिमा भएको व्यवस्था कार्यान्वयनका लागि ध्यानाकर्षण गराउँदै आएका छन्।
प्रतिनिधिसभाको आइतबारको बैठकको शून्य समयमा बोल्दै सांसद गगन कुमार थापाले शून्य र विशेष समयमा सदनमा उठेका विषयमा सम्बन्धित मन्त्रीले ५ दिनभित्र सदनमा उपस्थित भई जानकारी गराउनुपर्ने व्यवस्था नियमावलि कार्यान्वयन गर्न सभामुखको ध्यानाकर्षण गराए।
विगतमा शून्य र विशेष समयमा उठेका विषय सम्बोधन भएन भनेर नियमावलिमा नै व्यवस्था गरिएको उल्लेख गर्दे उनले 'नियमको कार्यान्वयन किन नभएको?' भन्दै सभामुखलाई प्रश्न गरे।
त्यस्तै, शून्य समयमा बोल्दै सांसदहरुले अन्य समसामयिक र क्षेत्रगत विषयमा सम्बन्धित निकायको ध्यानाकर्षण गराएका छन्।
सांसद अमृतादेवी अग्रहरीले कपिलवस्तुमा किसानले मलखाद र पानीको ठूलो अभाव झेल्नु परिरहेको भन्दै मलखाद र सिँचाइको तत्काल व्यवस्था गर्न माग गरे। उनले यसबारे पटक-पटक कुरा उठाउँदै आएको भए पनि सरकारले बेवास्ता गरेको गुनासो गर्दै कान थुनेर र आखा बन्द गरेर मुलुक चल्न नसक्ने भन्दै प्रधानमन्त्री र कृषिमन्त्रीलाई ध्यानाकर्षण गराए।
सांसद कृष्णभक्त पोखरेलले सर्वसाधरणलगायत इच्छुक जनतालाई संघीय संसद् भवनभित्र निर्वाध प्रवेश गर्ने वातावरण बनाउन सभामुखको गम्भीर ध्यानाकर्षण गराए।
सांसद खगराज अधिकारीले कालीगण्डकीको डाइभर्सन गर्दा केलादीघाट र देवघाटजस्ता पवित्र घाटहरु पानी बिनाका हुने भन्दै चापाकोट, रामपुरलगायतका टार सिँचाइ हुनबाट वञ्चित हुने तथा नारायणीमा पानीजहाज सञ्चालन गर्ने विषय पनि प्रभावित हुने भन्दै विषयवस्तुको गाम्भीर्यतातर्फ विचार गर्न सरकारको ध्यानाकर्षण गराए।
सांसद गणेश कुमार पहाडीले मध्यपहाडी लोकमार्गअन्तर्गत सिन्धुलीको खुर्रकोट घुर्मी सडकखण्डमा दोहोरो यातायात सञ्चालनको लागि आवश्यक पहल गर्न आग्रह गरे। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
